Hit Usi' he nkoen On anfain neem
3
Aok-bian manekat aar ki! Surat re' ia, au surat no nuan ii 'eu ki. Anbi suur nua' ein re' ia, au umnaub ki, he hi bisa mitenab anmatoom nok rasin re' namneo ma namnoon. 2 Mimnau mafefa kninu' Uisneno sin uabk ein un-unu'. Mimnau Nai' Yesus In haef ein imsa'. Mitenab mirek-reko' anmatoom nok saa' re' hit Usi' naprenat sin he natoon ki. Fin In es re' nsoi nafetin ki na'ko hi sanat ma penu sin! 3 Mimnau on nai fe': anbi neon amsoupt ein anmui' tuaf akana'parat sin re' anmo'en tafi'-tafi' natuin sin roimk ein kuuk. Sin na'uab na're'uf are' kanan rasi re' batuur.a 4 Sin na'uab ein am nak, “Phueh! Nai' Yesus anba'an am nak, In he nkoen On anfain neem, ai'? Karu on naan, In et mee? Fin anmurai na'ko hit be'i-na'i sin anmaten, tar antea oras ia msa', ka na'bani' niit fa. Saa' ii ok-oke' nnao piut, anmurai na'ko Uisneno nmoe' neno tunan ma pah-pinan.”5-7 Mes anmui' rais jes re' atoin aputa-kriut ein ka nahiin naan ee fa. Es re', na'ko ahun-hunut Uisneno suma na'uab ahaa, rarit neno tunan anjair nain. Onaim Uisneno anmoe' oe. Rarit In nbetis oe na'ko auf meto', ma nmoe' auf meto' npoi ma nboor neem na'ko oe. Uisneno na'uab anrair on mee te, naan nabaar piut.b A'roo-'roo te, Uisneno npaek noe sako' msa' he nareu' mansian ii ok-oke' et pah-pinan ia re' nmonin nbin oras nai' Noh anmoin.c Mes oras ia, Uisneno natoon nain saa' re' In he nmoo' je neu neno tunan ma pah-pinan. Oras ia In antah-tahan, mes nateef in oras, In he notu nporin sin. Fin Uisneno of nafeek hukun he nareu' nain tuaf re' ka ntoe natuin Ee fa. Maski on naan, mes atoin aputa-kriut ein naan ka namnaun fa nak, Uisneno of anmoe' natuin saa' re' In na'uab anrari.
8 Aok-bian manekat aar ki! Kais amnikan rasi ia. Hit Usi' ka nsoi' fa oras on re' hit. Fin tatuin Ee, neno mese' bisa on re' toon niufn es. Ma toon niufn es, bisa on re' neno mees' aah.d 9 Karu hit Usi' anba'an he nmoe' rais jes, In nmoo' je natai nateef nok in oras, ma ka npa-pao fa. Anmui' tuaf bian natenab am nak, In mepu te 'roo. Te kaah fa, tua! Fin In sabaar ahaa, he npao in oras. Hit Usi' nroim he tuaf mese'-mese' ok-oke' na'pisan na'kon sin saant ein fe', he nasaitan sin saant ein ma penu sin, rarit nabain ein ma natuin Ee. Fin In ka nroim fa he tuaf-tuaf anbaits ok nok Ne.
10 Mes oras hit Usi' ankoen On anfain neem naan, ka tiit fa tuaf re' nahiin nain. Fin In amneman naan, nok askeekn aah, on re' abakat re' he ntaam neu uim jes in nanan. Oras naan, are' kanan baer' ein nbin neon gwe tnanan anputun nmaten, on re' manas, funan ma kfuun ein ok-oke'. On naan amsa', pah-pinan ma in afan-nesan ok-oke'.e
11 Onaim karu saa' ii ok-oke' nputun nmaten on naan, hi ro he mjair tuaf on re' mee? Hi ro he mhaek ma'tani' he mmoin mituin Uisneno In romin. Hi ro he mmoin nok akninu'! 12 Hi ro he mpa-pao msa' Uisneno In amneman. Onaim hi ro he mhaek ma'tani' he mmoe' neno naan neem rabah. Oras naan, neon gwe tnanan anputun nmaten. Ma are' kanan baer' ein nbin neon gwe tnanan amsa' nputun ma nre'u nmaten.
13 Mes of anmui' neno tunan huum fe'u ma pah-pinan huum fe'u. Uisneno nba'an anrair on naan, onaim hit tpa-pao rasi naan. Anbi bare naan suma nmu'i haa tuaf re' nmonin namneon ma namnonon.f
14 Onaim aok-bian manekat aar ki! Oras hi mpa-pao rasin re' ia, hi ro he mhaek ma'tani' he mjair atoin neek reko, tatuin Uisneno In tenab. Nok ranan naan, ka nmui' fa tuaf re' bisa nasaeb sanat neu ki. Amhaek ma'tani' he mmoin nok rais rame' msa'.
15a Fin hit Usi' naan ansabaar, maut he In bisa nsoi nafetin ki na'ko hi saant am penu sin.
Nai' Petrus nasoup in surat
15b Hit aok-bian nai' Paulus antui nrair neu ki anmatoom nok rasi mfaun re' huma' mese', ai'? Uisneno es re' anfee ne mahinif on re' naan, es naan ate, in ntui on naan amsa'. 16 Ansuun oras, oras nai' Paulus antui surat, in ntui rasin ia msa'. Na'ko in suurt ein, anmui' rasi re' hit ro he taim ranan fe' na' theek taan in sarit. Anmui' tuaf amsa' re' na'e'ob nai' Paulus in sarit. Sin na'e'ob rasi bian amsa' anbi Uisneno In Suur Akninu'. Sin re' naan, esan re' apehet, ma tuaf re' sin rais pirsait ee ka na'kii' fa. Tuaf humaf on re' naan, of namre'un nkoon.
17 Aok-bian manekat aar ki! Hi mihiin tunggur aputa-kriut ein naan sin raan a'honis. Onaim ampaant om! Fin sin ka nromin fa he nneen ma natninan atoran saa'-saa'. Sin nsoba' he nputa-kriu ki, maut he hi mbeon om mi'ko raan amneot. Mes kais amkonan sin he niis naan ki on naan. Fin hi ro he maran ma mtahan piut. 18 Reko nneis, hi rais pirsait aan na'baab on piut. Fin hi mihiin hit Usi' Yesus Kristus, re' nsoi nafetin kit na'ko hit saant am penu sin. In he naruru' ma nakrira' In nekan arekot neu ki. Ma In nromi msa' he hi bisa mihiin mirek-reok' Ee mtein.
Au 'roim he mansian ii ok-oke' naikas na'rat-raatn Ee, na'ko oras ia tar antea nabar-baar!g
Saloom,
Au nai' Petrus kau, tua.