Fainekat neu fee-mone
3
Bifee mamoen ein! Fe'e na au 'ak hit ro he tneen ma tatniin anaa' kuasat sin. Onaim hi ro he mneen ma mitniin hi moen naan. Mimnau, fin anbi hi tnaanm ein anmui' mone bian re' ka nromin fa he nmoe' natuin Uisneno In Kabin ma Prenat. Maski sin ka nromin fa he nneen ma natniin hi uab ein, mes sin of anpirsain neun Kristus natuin hi 'monim.a 2 Fin sin nkisun ma nitan hi mmoe' are' rasi nok neek amneot ma amnonot ma nakninu' nbi Uisneno In human ma In matan.3 Bifee nggwin sin namasan, ka na'ko fa saa' re' tkius tiit ee. On re': nbagaya nmoe' 'naak fuun ein, ansoi' ma nbui' sin huma'-huma', ai', natoon ok bainesi' nok sin npaken moro'-muti', ai' npaken tai ma'osa' re' ka pantas fa.b 4 Mes re' nmoe' bifee nggwin anjair namasan batuur, esan re': sin neek ein, re' ka tkius tiit ee fa. On re': neek arekot, ma neek teas. Fin masaf on re' naan ka namneuk fa, maski bifee nggwin namnasin nrarin. Tatuin Uisneno In tenab, masaf on re' naan, ro ma'oos re'uf. 5 Fin un-unu' te, bifee nggwin re' neek akniun' ein, re' anpirsain neun Uisneno, sin namasan on re' naan. Sin nneen ma natniin neun sin moenk ein amsa'. 6 Tait i'tope' ta'ko ain Sara'. In nneen ma natniin in mone, aam Abraham. In nkonan in mone he n'aotr ee msa'. Hi aar ki bifee nggwin, hi ro he mituin ain Sara' in a'mo'en, natuin karu hi mmoe' batuur, hi kais mimtausan saa'-saa'.c
7 Atoin mafe'e sin! Ammoin nekaf mese' mok hi fee nggwin. Amtai mirek-reko' saa' re' reko neu sin, rarit ammoe' mituin. Miruru' ma mikrira' rais hormaat meu sin mbi are' kanan rasi, natuin bifee ji in a'be'in ka huma' mese' fa on re' atoin ii in a'be'in. Fin hi aar ki bu'-bua' amtoup pusaak re' Uisneno he nfee je neu ki. Pusaak naan, es re' hi bu'-bua' amtoupu 'moin fe'u re' Uisneno nfee je na'ko In nekan arekot. Mes hi atoin mafe'e, hi ro he mmoin nekaf mese' mok hi fee nggwin on naan, he karu hi nua ki mait nekaf ma m'onen amtoit rais jes mi'ko Uisneno, In nroim he nneen ma natniin hi onen naan.d
Maski hi mmoe' batuur, hi of mipein susat amsa'
8 Aok-bian manekat aar ki! In amsoupn ii, au he u'uab rais jes a'tein. Hi ok-oke' ro he mmoin nekaf mese' amsa'. Karu tuaf es ansuus ai' anmariin, hi bian ii ro he mnaben mituin on naan. Amneek tuaf ein re' sin anpirsain Kristus. Miruru' ma mikrira' neek arekot es nok es. Kais maikas hi tuam ein, fin hi ro he mneka'paar. 9 Kais ambaras maufinu nok maufinu. Karu tuaf nakritik ki, kais mikritik mifani' tuaf naan. Mes amtoit he Uisneno nmoe' rais reko neu ne. Fin Uisneno no'en naan ki he mjair Iin na, he hi bisa mtoup rais reko na'ko Na. 10 Fin matu'i et Suur Akninu' Uisneno mnak,
“Tuaf re' nami 'moin reko,
ma re' nami 'monit tar namnais,
tuaf naan ro he npanat in fefan he kais anmahaat,
ma kais na'uab puta-kriut.
11 In ro he na'piis na'ko in saant ein, he kais anmoe' rais maufinu ntein,
mes nabani' he nmoe' rais amneot ma amnonot.
In ro he nanoni' he nmoni nmarame' nok are' tuaf ein ok-oke',
rarit naim ranan he nareok nok sin.
12 Fin hit Usi' ntarun mataf,
neu tuaf re' nmoin nok amneot ma amnonot.
Ma In nroim he nneen sin oen ein amsa'.
Mes hit Usi' nraban piut,
neu tuaf re' nmoin nok 'moe' maufinu.”e
13 Karu hi mroim he mmoe' re' batuur, sekau es re' he nmoe' maufinu neu ki ntein? Ka nmui' fa, tua! 14 Mes maski hi mmoe' re' batuur, rarit anmui' tuaf re' nasusab ki, hi mipein upan ma pa'e. Karu nmui' tuaf re' ka nahiin fa Kristus namtau natuin rais jes, hi kais mimtau mituin on naan. Hi teenb ein kais antaisibun ma hi neekm ein kais ansusan on re' sin.f 15 Ammoe' hi neekm ein antainina', natuin hi mtoup Kristus et hi neekm ein he njair hi Usi' re' akninu'.
Karu tuaf antoit ki he mitoon hi rais pirsait, ma nansaa' am es hi mifnekan ma mharap mak, Kristus of anmoe' are' raisn ein ok-oke' anjarin reko, hi ro he mibarab piut-piut he mitaah sin.g 16 Mes hi ro he mitaah sin mi'ko neek arekot, miruru' ma mikrira' rais hormaat meu sin, he sin nahinin nak hi mmoe' rais reko re' amneot mi'ko neek akninu'. Maski hi mmoe' reko on naan amsa', mes of anmui' tuaf re' he na'uab namouf ki, natuin hi mmafuut mok Kristus. Onaim karu hi mmoe' are' rais reko piut-piut, tuaf-tuaf re' ankana'paar ki of namaeb ok. 17 Karu rasi naan natuin Uisneno In romin, kais amnikan, fin reko nneis hi mipein susat natuin hi mmoe' rais reok amneot; kais natuin hi mmo'e msaan.
18 Fin Kristus anmaet no mese',
natuin hit mansian ii tmo'e tsaan.
In re' anmoin namneo ma namnoon,
anmaet neu kit re' tmoin nok saant am penu.
In nmaet he hi bisa mmarame' mfain mok Uisneno.
Kristus naan, mansian on re' hit imsa'.
Tuaf anroor na'maet Je,
rarit Uisneno In Asmaan ee namonib nafain' Ee.
19 Asmanaf naan neik Je nnao he nanoni' nitun re' an'o'of sin anbin baer jes on re' bui. 20 Sin re' naan esan re' tuaf-tuaf re' un-unu' te, sin ka nromin fa he nneen ma natniin Uisneno. Oras naan, ka'o Noh anmo'e bnao oe kou' gwes. Uisneno npa-pao he niit kar-karu are' tuaf ein he nmoe' natuin In romin, mes sin ka nromin fa. Etun suma tuaf faun gwah re' nsoi naan sin na'ko noe sako' naan.h 21 Noe sako' naan anjari 'tope', on re' oras nasrain ki. Asranit naan naruru' ma nakrira' mnak, Uisneno nsoi nafetin ki na'ko hi sanat ma penu sin, natuin Yesus Kristus anmoni nfain. Oras sin nasrain ki, sin ka naniu ki fa he nakninu' hi aom ein naan, natuin in batuurn ii, es re' hi mba'an meu Uisneno he mikninu' hi neekm ein naan. Nok ranan naan hi bisa mmoin ma mmoe' rais amneot ma amnonot. 22 Oras ia, Nai' Yesus ansae nfain et sonaf neno tunan. Anbi nee In ntook et bare mahormaat re'uf anbi Uisneno In aon-bian a'ne'u. Rarit ameupt ein abitan sonaf neno tunan, are' kuasa sin ok-oke', ma are' anaa' kuasa bian sin, ro he nneen ma natniin Kristus.