Nai' Paulus neik Rais Reko neu ka atoin Yahudis sin fa
3
Uisneno ka nbetis fa atoin Yahudis ai' ka atoin Yahudis fa. Es naan ate In nreek haefan kau, nai' Paulus kau, he 'nao ma utoon Yesus Kristus In Rais Reko 'eu ki re' ka atoin Yahudis fa 'bi kota Efesus. Au unaob au mepu naan, tar antea au 'jair atoin bui. 2 Tebes, hi ro mihiin mak, Uisneno anreek haefan kau, natuin In nroim he naruru' ma nakrira' In nekan arekot neu ki. 3 Batuur, unu' te, Uisneno ka natoon fa fe' neu mansian anmatoom nok saa' re' In nafeek anrair je neu ka atoin Yahudis sin fa. Mes oras ia, In natoon anrair rasi ia neu kau. Nok ranan ia, es re' au 'tui re' paar-para' a'bi ia 'eu ki. 4 Karu hi mrees amrair je te, hi bisa mihiin batuur-batuur Uisneno In sarit anmatoom nok Yesus Kristus, re' In nfei nrair je neu kau. 5 Fin un-unu' fe', mansian ii ka nahiin In sairt ee batuur-batuur fa fe'. Mes oras ia, In npaek In Asmaan ee he natoon sarit naan neu In mafefa kniun' ein ma In haef ein. 6 Fin na'ko unu' te, Uisneno nafeek anrair nak on nai: karu atoni' re' ka atoin Yahudis fa npirsai Yesus Kristus In Rais Reko, sin bisa ntaman njarin Uisneno In aanh ein amsa', on re' atoin Yahudis sin. Nok ranan naan, oras ia, hit aar kit atjair nonot-asar mese', ma hit bisa ttoup bu'-bua' tetus-athoen na'ko hit Ama' Uisneno.7 Uisneno naruru' ma nakrira' In nekan arekot, onaim In npiir naan kau 'jair In haef. Ma In anfee In kuasa neu kau msa', he unaob In mepu naan. 8 Na'ko Uisneno Iin na, au re' ia es re' aan'-ana'. Maski on naan amsa', mes Uisneno npiir naan kau he unaob In mepu re' ma'tain re'uf. In nroim he au 'nao utoon 'eu atoni' ka atoin Yahudis sin fa anmatoom nok Kristus In nekan arekot re' ka natfeek niit fa. 9 Anmurai na'ko oras Uisneno nmoe' pah-pinan ia, In sarit he nsonu' Kristus neem, ma'nifa'. Mes oras ia, In nroim he au 'fei rais ma'nifa' naan in sarit. 10 In sarit naan, mahiin ii kah een. In nroim he npaek Iin na he nakrira' In mahinin naan, neu are' kuasa sin ma neu sin re' naprenat et neon gwe tnanan. 11 Oras In ka nmoe' pah-pinan ia fa fe', In nafeek anrair he nfei ranan he nsoi nafetin mansian. Es naan ate, In npaek hit Usi' Yesus Kristus, he nmoe' on naan. 12 Nok ranan naan, hit aar kit re' atpirsai trair teu Yesus Kristus, kais tamtau ttein he teem ma ta'uab tok Uisneno. Fin In nroim he ntoup kit, oras mee-mee jah.
13 Mimnau! Au upein ha'mu'it natuin au 'tuthae ki, tuaf-tuaf re' ka atoin Yahudis fa. Maski on naan amsa', hi neekm ein kais an'oren. Au usaah ma utaah kuuk ha'mu'it ia, maut he hi mtoup in arekon.
Nai' Paulus an'onen ma ntoit makasi neu Uisneno
14 Oras au utenab 'aan kuuk Ama' Uisneno In nekan arekot ma'tani' naan ate, au 'ri'tuu ma 'toit makasi 'eu Ne. 15 Fin In re' naan, are' kanan nonot-asar pah-pinan ma sonaf neno tunan sin Amaf.
16 Au 'onen he In nfee tetus-athoen neu ki natuin In nekan arekot ma'tani' naan.
Ma au a'toit he In nsonu' In Asmaan ee msa', ma anfee kuasa, maut he hi neekm ein naan na'be'in.
17 Au 'toit he Yesus Kristus anmoni nbi hi neekm ein, natuin hi mpirsai meu Ne piut-piut.
Ma au 'onen he hi mmoin ma mmafuut meik In manekan, on re' hau roet re' in a'baa'n ee ntaam anbi afu.a
18-19 Au 'onen amsa' he hi mok Uisneno Iin na ok-oke', bisa mihiin batuur-batuur Kristus In manekan neu mansian, re' mansian ii ka bisa n'ukur ma nruuk naan ee fa. Natuin manekat naan, kou' re'uf, mainua re'uf, mnaun re'uf, ma mfau re'uf.
Au 'onen amsa' he hi bisa mnaben miit In manekan, tar antea manekat naan nahenu nbi hi neekm ein ma hi 'moinm ein.b
20 Uisneno In kuasa, ma'tain re'uf, anneis nain na'ko are' saa'-saa' re' hit bisa ttoit sin, ma na'ko are' saa'-saa' re' hit bisa tatenab sin. Ma In npaek kuasa re' ma'tani' naan, he nmepu nbi hit nekak. 21 Nok ranan naan, iim aar kit re' tmafutu' atbi Kristus, tait ta'rat-raatn Ee. Pures ma bo'is neu Ne piut-piut, na'ko oras ia, tar antea nabar-baar. Batuur on naan, tua!