Tuaf re' anpirsai Yesus Kristus antoupu 'moin fe'u
2
Unu' fe'e te, hi mtanhai Uisneno In apreent ein. Hi mmoe' sanat huma'-huma'. Es naan ate, In naan ki on re' atoin amates. 2 Unu' fe' hi mmoin mituin pah-pinan ia in romin. Hi mmoin mituin furi' na'ko a'naak niut reu'f ee in romin. Antea oras ia, nitu naan anfuri' mansian he nraban Uisneno fe'. 3 Unu' fe', hit tmoin on re' naan amsa', tar antea saa'-saa' aah, re' hit tnaben tiit ai' tatenab tiit ee, he tmoe' tatuin hit roimk aa kuuk. Hit tmoe' maufinu on re' tuaf bian sin ok-oke', etun Uisneno natoo' ko'u neu kit, 4-5 ma naan kit on re' amates amsa' re' anbetis ma nbaits on nok Ne. Maski on naan amsa', In nkasian kit, natuin In nneek niis kit. Es naan ate, In naruru' ma nakrira' In nekan arekot. Onaim In nsonu' Yesus Kristus he nfee 'moin fe'u neu kit. Onaim Uisneno es re' ansoi nafetin kit, natuin In neekn ee reko.a 6 Yesus Kristus anmaet, mes Uisneno namonib nafain' Ee. Rarit Uisneno nait nasaeb Ee he nnaa' aprenat et sonaf neno tunan. Uisneno anmoe' on naan amsa' neu kit. In nfee 'moin fe'u neu kit, rarit In nait nasaeb kit ma hit atnaa' aprenat tok Kristus atbi sonaf neno tunan. 7 Nok ranan naan, anmurai oras ia tar antea nabar-baar, Uisneno naruru' ma nakrira' In manekan kou'-ko'u, ma In nekan arekot ma'tani' naan, natuin hit tpirsai Yesus Kristus. 8-9 Oras hi mpirsai Kristus, Uisneno nsoi nafetin ki natuin In nekan arekot. In nsoi nafetin ki on naan, ka nak fa In he nbaras saa' re' hi mmoe' sin. Naan anjair parseen neu ki ruum-ruum aah. Es naan ate, hi ka mmui' fa uab re' ma'u'u he mifeef nok saa' re' hi mmoe' sin.b 10 Hit tmoin, natuin Uisneno es re' anmoe' ma npakae kit. Rarit Yesus Kristus anfee 'moin fe'u neu kit, maut he hit tmoni tbi 'moe' arekot ma rais arekot re' Uisneno nafeek nain sin na'ko un-unu'.Uisneno antoup tuaf na'ko are' kanan uuf ma pah
11 Aok-bian aar ki! Hi mihini mrair mak, atoin Yahudis sin annaa' naher-heran sin atoran rais ma'heri', mes sin nkana'paar ki re' ka atoin Yahudis fa, natuin hi ka mituin fa atoran naan. Te kaah, naan suma atoran mansian re' anmatoom nok in aon, ka ntea fa in nekan. 12 Oras hi ka mpirsai fa fe' meu Yesus Kristus, hi ka mmui' fa hak he mtaam amjair Uisneno Iin na. Unu' te, hi ka mtaam fa fe' meu Uisneno In rais manba'an re' In nahake' nain je nok nai' Abraham ma in sufan-ka'un sin. Oras naan, hi mitua mbi pah-pinan ia, ka mharap ma mifnekan fa meu Uisneno, natuin hi amjair tua sona' fe', 13 re' mabetis na'ko Uisneno. Mes oras ia, Yesus Kristus anfei ranan he hi bisa mmafuut mok Uisneno. Kristus anmaet he nhainiik Uisneno In nekan, he hi bisa mmarame' mok Uisneno, ma bisa mjair Iin na.
14 Unu' fe', hai atoin Yahudis ka bisa fa mmoin nok mamut meu ki atoin ka Yahudis fa. On re' anmu'i 'bata' re' nmoe' kit ma atma'bata'. Mes natuin Yesus Kristus anmate nbi hau nehe, onaim In nareu' nani 'bata' naan, he hit re' unu' fe'e te atmamuus, bisa tmarame' tfain, atjair pah mese'. 15 Fin unu' fe', atoin Yahudis sin namin ranan he nmonin rek-reko nok Uisneno anpaken atoran rais pirsait ein. Mes oras Yesus Kristus anmaet, In nkaibata' nain raan amnaa' ma nfei raan fe'u, he tuaf na'ko pah Yahudis ma bian na'kon pah a'teta' sin, bisa ntaam nabu-buan ma nmoin nabu-buan nok Uisneno. Nok ranan naan, sin aar sin anmafutun njarin pah feu' gwes, re' nmoin nok rais rame' es nok es.c 16 Onaim Kristus anmaet anbi hau nehe, he nmoe' rais mapanaf nua bisa natefan njair mese', ma neik sin anfanin neun Uisneno. Kristus annoes ma nsaok nain are' saa'-saa' re' unu' te anjair rasi re' neik sin njarin musu es nok es.d 17 In nkoen On neem anbi pah-pinan neik Rais Reko neu atoin Yahudis ma ka atoin Yahudis fa mnak, “Unu' fe'e te, hi mmamusun, mes oras ia anmui' ranan he hi bisa mmarame' es nok es.”e 18 Onaim hai atoin Yahudis ma hi re' ka atoin Yahudis fa bisa tapein ranan he tnao teu hit Ama' Uisneno tabu-bua, natuin Nai' Yesus anfei nrair ranan neu kit aar kit. Ma Uisneno In Asmaan Akninu' msa' naruru' ma nakrira' ranan neu kit aar kit.
Yesus Kristus In tuaf ein on re' uim onen
19 Natuin Yesus Kristus In mepu naan, es naan ate, hi atoni' re' ka atoin Yahudis fa, hi ka mjair fa tua sona' mtein, re' ka nmui' fa hak saa'-saa'. Fin oras ia, hi mmui' hak et sonaf neno tunan, natuin hi mjair Uisneno In nonot-asar. 20 Naan on re' Uisneno he nahake' uim jes. In ntao fatu 'suik susuf, es re' Yesus Kristus. Rarit In nahake' fanderen, es re' In mafefa kniun' ein ma In haef ein. Rarit In nsusun ma nbakin fatu anbi faofk ein ok-oke'. Fatun naan es re' hit aar kit re' attaam atjair In nonot-asar. 21 Umi naan anhaek naheer ma'tani' anbi fatu 'suik susuf. Umi naan na'siu piut, tar antea tuaf-tuaf neem ma n'onen neu Uisneno. 22 Onaim oras ia, Uisneno nmoe' he hi re' ka atoin Yahudis fa msa', amjair on re' fatu, mibua mok kai atoin Yahudis. Uisneno nsusun kit aar kit, he tjair In sonaf re' Uisneno In Asmanan natua ma namaik.