Uisneno In Asmanan anfee kit kuasa he tmeup huma'-huma'
12
Aok-bian manekat aar ki! Au 'roim he hi mihiin anmatoom nok kuasat ma manoef ein re' Uisneno In Asmaan ee nfee sin neu kit he hit tpaek sin. 2 Hi mihini mrair mak, oras hi ka mjair Uisneno Iin na fa fe', hi mi'besan piut meu baer maruna' re' anmuu. Hi mitun-tuin ahaa sin. 3 Es naan ate, au 'roim he hi mihiin am mak, ka neu fa tuaf re' anmafuut nok Uisneno In Asmaan Akninu' re' nak, “Kasat neu Yesus naan!” Ma ka neu fa tuaf re' ka nmafuut fa nok Uisneno In Asmaan Akninu' nak, “Nai' Yesus naan, au Usi'!”4 Uisneno In Asmanan anfee neu tuaf mese'-mese' nok in mahinif ma manoef kuun, he es-es ate nanaob kuuk sin mepu. Mes are' mahinif ma manoef sin neman na'kon Asmanaf mese'. 5 Tuaf mese'-mese' napenin mahinif ma manoef huma'-huma' he ntuthae tuaf bian, mes sin aar sin suma nneen ma natniin na'kon Usif mees' aah. 6 Tuaf mese'-mese' napenin mepu huma'-huma' he nanaob Uisneno In mepu, mes suma Uisneno mese' re' naan, es re' anturun ma nbaab sin he nanaob sin mepun naan. 7 Uisneno naruru' ma nakrira' In Asmanan anbi tuaf mese'-mese' nok ranan huma'-huma', mes In sairt ii he sin ok-oke' napenin upan ma pa'e bu'-bua'. 8 In nfee In Asmaan ee In kuasa neu Iin na. Bian antoupun mahinif ma manoef he sin bisa nateenb ein namnuut, rarit anfee fainekat re' natai nok rasi. Bian antoupun mahinif ma manoef he natoon namnoon gwah saa' re' sin nahiin sin. 9 Bian antein antoupun kuasa he npirsai naheran neun Uisneno, natuin sin nmafutun naher-heran nok In Asmanan. Bian antein antoupun kuasa he nareko' amenat. 10 Bian atein antoupun kuasa he nmo'en rais sanmakat huma'-huma' re' naruru' ma nakrira' Uisneno In pinan ma krahan. Bian antein antoupun mahinif ma manoef he natoon Uisneno In haan beno neu Iin na. Bian antein antoupun mahinif ma manoef he nahinin smanaf mee es re' na'uu ma na'baa' anbi Uisneno, ma mee es re' kahaf. Bian antein antoupun mahinif ma manoef he bisa na'uab ein anpaken uab huma'-huma'. Bian antein antoupun mahinif ma manoef he natoon uab ein naan sin a'moufk ein. 11 Mes suma Asmanaf mese' re' nmoe' he sin aar sin bisa nmepun on re' naan. In nfee neu tuaf mese'-mese' he sin bisa nmepun natuin Asmanaf naan In romin.a
Aof mese', nok in nama' huma'-huma'
12 Au he utaib mahinif ma manoef sin re' naan nok aof. Aof mese' naan nok in nama' huma'-huma'. Mes nama' huma'-huma' naan, anmafuut anjair aof mese'.
Naan on re' Kristus Iin na.b 13 Hit aar kit tmafuut tok Asmanaf mese'. Es naan ate, oras hit tasrain, hit tjair on re' pah mese'. Maski hit atoin Yahudis ai' ka atoin Yahudis fa, ate ai' ka ate fa, Uisneno nfee neu kit aar kit Asmanaf mees' aah. Naan on re' hit tbukae oe re' neiki 'honis na'ko oe mata' mese'.
14 Batuur, aof ii ka na'ko fa nama' mese'. Fin in re' naan, anjair na'ko nama' amfaun. 15 Kar-karu ho haem aan nak, “Au re' ia, ka 'nimaf fa. Onaim au ka 'jair fa nama' es u'ko ho aom.” Maski in na'uab on naan, mes in fe' njair nama' na'ko ho aom. Batuur, ai'? 16 Ma karu ho ruikm aan nak, “Au re' ia, ka mataf fa. Onaim au ka 'jair fa nama' u'ko ho aom.” Maski in na'uab on naan, mes in fe' njair nama' na'ko ho aom. 17 Mitenab miit! Karu ho aom aan suma njair mataf mees' aah, ho bisa mneen on mee? Ma karu ho aom aan suma njair rukif mees' aah, ho bisa mufoi on mee?
18 Mes hi mihiin mak, Uisneno nmoe' kit atjair on re' aof mese', ma In n'ator in nama' huma'-huma', natuin In human ma In masan. 19 Karu hit aok ii suma njair nama' huma' mees' aah, in kaann ee ka ‘aof’ fa ntein, oo? 20 Mes in batuurn ii, hit aok ii nmui' nama' huma'-huma'. Naan es re' anmoo' je njair aof a'teme-'teme.
21 Atoni' in matan ka bisa nasmeru' ma nkana'paar fa neu atoni' naan in a'niman nak, “Au ka 'perluu ko fa!” Ma atoni' in a'nakan ka bisa natoon fa neu in haen am nak, “Au ka 'perluu ko fa!” 22 In batuurn ii, es re' aof ii anmui' nama' re' hit taan ee an'oer ma ka pentiing fa, mes hit tperluu sin fe'. 23 Anmui' nama' bian re' hit taan sin suma mapake' kreo' gwah, mes hit tpijaar ma tpairoir sin fe' nok reko. Ma nmui' nama' bian re' hit tamaeb ok, ma ka troim fa he takrira' sin, rarit hit tkuub ma t'aum sin nok reko. 24 Mes karu nama' re' ka namaeba' kit fa, hit ka tansaa' sin fa.
Mes Uisneno nabuab naam' ein naan anjair aof mese'. Rarit In n'ator he naam' ein re' hit taan sin ka pentiing fa, hit tpijaar ma tpairoir sin nok reko, 25 fin In ka nroim fa karu hit aok ii nbaits on. In nroim he hit aar kit atmakius es nok es. 26 Fin karu naam' es napein susat, sin aar sin annaeb ein amsa'. Ma karu naam' es napein hormaat, sin aar sin anmarinan amsa'.
27 On naan amsa' hi aar ki. Fin hi on re' Kristus In aon a'teme-'teme. Ansuun tuaf apirsait es-es ate, anjair on re' naam' es na'ko Kristus In aon. 28 Fin anbi apirsait ein sin atnaank ein, Uisneno nfee kuasa he nmepun huma'-huma'.
Nahunu te, In nreek haef tuaf bian he nnao natoon In haan beno.
No nuan ii, In npaek tuaf bian anjair In mafefa kninu'.
No teun ii, In nmoe' tuaf bian nanoni' nahiin tuaf anmatoom nok Ne.
Rarit In nfee kuasa neu tuaf bian he bisa nmoe' rais sanmakat huma'-huma', he naruru' ma nakrira' In pinan ma krahan.
Bian napenin kuasa he nareko' amenat.
Bian napenin mahinif ma manoef he nturun ma nbaab tuaf.
Bian napenin mahinif ma manoef he bisa na'haba' ma n'urus tuaf ein he sin nmepun nabu-buan nok reko.
Ma In nfee kuasa neu tuaf bian antein, he sin bisa na'uab ein anpaken uab huma'-huma'.c
29 Hi mitenab on mee? Uisneno nreek kit aar kit he tnao tatoon In haan beno, oo? Kaah fa, tua. In nmoe' kit aar kit atjair In mafefa kniun, aa oo? Kaah fa, tua. In nmoe' kit aar kit atjair anoni' ahinit, aa oo? Kaah fa, tua. In nfee kuasa neu kit aar kit he tmoe' rais sanmakat, aa oo? Kaah fa, tua. 30 In nfee kuasa neu kit aar kit he bisa tareko' ameent ein, aa oo? Kaah fa, tua. In nmoe' kit aar kit he bisa ta'uab atpaek uab huma'-huma', oo? Kaah fa, tua. In nmoe' kit aar kit bisa tahiin uab ein naan sin a'moufk ein, aa oo? Kaah fa, tua.
31 Hi ro he mibarab he mtoup ma mpaek mahinif ma manoef re' mapake' nneis neu too mfaun ein.
Maski on naan amsa', mes au fe' he ururu' ma ukrira' 'eu ki ranan re' reko nneis.