Usif Yesus on re' hau roet anggur uu' gwes
15
Nai' Yesus antuut antein am nak, “Amneen! Hi mmafuut mok Kau. Au on re' hau roet anggur uu' gwes. Mes Au re' ia, hau roet anggur re' batuur!a Ma Au Ama' re' naan, on re' araip po'on. 2 Onaim tuaf re' suma nak in nmafuut nok Kau, mes ka nmoe' fa saa'-saa', Au Ama' nait inporin, on re' araip po'on re' natkuni nporin taef re' ka nafuan fa. Mes ansuun tuaf re' nmafuut nok Kau, Au Ama' nakninu' makrafu' ma 'oemetan na'ko in nekan, on re' araip po'on re' natkuin na'paran taef es, he in nafua mfa-faun. 3 Au Uab ein naan, bisa nakninu' hi neekm ein naan, on re' araip po'on natkuin nakninu' in hau roet ein sin taek ein. 4 Hi ro he mmafuut piut mok Kau, on re' Au 'mafuut 'ok ki. Fin taef re' natfeek anrair na'ko in tau' ainan ka bisa nafua fa saa'-saa'. On naan amsa' hi aar ki. Hi ka bisa mmoe' fa saa'-saa' re' reko, karu hi ka mmafuut fa piut mok Kau.
5 Au re' ia, on re' hau roet anggur uu' gwes. Hi re' naan, on re' in taek ein. Onaim tuaf re' nmafuut piut nok Kau, ma Au 'mafuut piut 'ok ne msa', in re' naan on re' taef es, re' nafua mfa-faun. Natuin karu hi ka mmafuut piut mok Kau fa, hi ka bisa mmoe' fa saa'-saa' re' reko. 6 Tuaf re' ka nmafuut nok Kau fa piut, in on re' taef es, re' ka mapake' fa. Taef humaf on re' naan, biasa atoni' anketu nporin, maut he nmeot. Rarit na'bua' naan taef ein naan, ma nporin nataam sin neun ai je nanan, he nout nakrati' sin. 7 Mes karu hi mmafuut piut mok Kau, ma Au Uab ein natuan piut anbin hi neekm ein amsa', hi mtoit saa' ahaa meu Uisneno te, In of anmoo' je neu ki.
8 Karu hi mmoe' rais reko mfa-faun, on re' taef es nafua mfa-faun, naan naikas na'rat-ratan Uisneno. Nok ranan naan, hi miruru' ma mikrira' msa' mak, hi re' naan, Au atoup noin' ein goa.
9 On re' Au Ama' nneek Kau, Au 'neek ki on re' naan amsa'. Hi ro he mmafuut piut mok Kau, maut he Au bisa ururu' ma ukrira' Au rais manekat 'eu ki msa'. 10 Karu hi mmoe' mituin Au preent ein, hi mmafuut piut mok Kau, ma Au bisa ururu' ma ukrira' Au rais manekat 'eu ki. Naan on re' Au unaob utuin Au Ama' In aprenat, rarit In naruru' ma nakrira' In rais manekat neu Kau piut.
11 Au utoon ki rasin ia na'ko unu', maut he hi neekm ein bisa nmarinan, on re' Au neek ii nmariin amsa'. Fin Au 'roim he hi neekm ein anmarinan kou'-ko'u! 12 Au preent ii on nai: hi ro he mmaneek es nok es, on re' Au 'neek a'rair ki msa'.b 13 Karu tuaf es anroim he nmaet he in partei jes bisa nmoin, in nneek batuur neu in partei naan. Ka nmui' fa rais manekat re' ma'tani' nneis na'ko naan. 14 Karu hi mmoe' mituin meu Au preent ii piut, hi mjair Au partei nggwin. 15 Au ka 'roim fa he 'teek a'tein ki, 'ak Au ‘aan renu'’. Fin aan renu' tuaf es ka nahiin fa batuur in uisn ee in romin. Mes Au 'teek ki, 'ak Au ‘partei’, natuin Au 'fei maat-maat are' saa' ii ok-oke' re' Au Ama' natoon anrair sin neu Kau. 16 Hi ka mpiir Kau fa. Mes Au 'piir ma 'ait ki he minaob mepu ia. Onaim hi ro he mnao mmoe' rais reko mfaun re' antahan a'roo. Naan on re' hau roet anggur uu' gwes, re' nafua arekot piut-piut. Karu hi mmoe' on naan, hi bisa mtoit saa' ahaa meu Au Ama' meik Au kanak, rarit In nmoo' je neu ki. 17 Onaim re' Au preent ii 'eu ki ji, on nai: hi ro he mmaneek es nok es.”
Mansian pah-pinan ia nsaken Usif Yesus Iin na
18 Nai' Yesus antuut antein am nak, “Karu abitan pah-pinan ia nsaken ki, mimnau, fin sin nsaken nahunun Kau. 19 Karu hi re' ia, huma' mese' on re' biak ein re' abitan pah-pinan ia, sin of anneek ki. Mes hi ka on fa sin re' naan. Fin Au 'piir 'aan ki he 'batis ki na'ko sin. Es naan ate, sin nsaken ki.
20 Kais amnikan re' Au utoon a'rair ki 'ak, ‘Aan renu' tuaf es ka ko'u nneis fa na'ko in usin.’ Onaim karu sin nha'mui' ma nasusab Kau, sin of anha'mui' ma nasusab ki msa'. Karu sin anneen Au Uab ein, sin nneen ki msa'.c 21 Sin of anha'mui' ma nasusab ki, natuin hi mmafuut mok Kau. Fin sin ka nahiin fa Tuaf re' anhaefan Kau msa'. 22 Karu Au ka 'uum u'uab 'iit fa 'ok sin, rarit ururu' ma ukrira' raan a'honis re' batuur 'eu sin, sin natenab piut nak, sin ka nmu'in fa sanat saa'-saa'. Mes Au 'uum a'rair, ma u'uab a'rair on naan. Onaim oras ia, karu sin anmo'en sanat, sin ka nmu'in fa 'sukif antein he na'uab ein am nak, ‘Hoe! Hai re' ia, ka mihiin fa, nak re' hai mmoo' je naan, ansaan.’
23 Tuaf re' nsaken Kau, in nsaken Au Ama' msa'. 24 Au 'mo'e 'rair rais sanmakat huma'-huma' 'bi sin humak ma sin maatk ein, re' atoni' bian ka nmoe' niit sin fa. Karu Au ka 'moe' fa rasin naan, sin ka nsanan fa msa' karu ka nroim he ntoup Kau fa. Te kaah, sin nkisun nrair rais sanmakat naan re' Au 'moe' 'rair sin. Maski on naan amsa', mes sin fe' nsaken Kau ma Au Ama' abit sonaf neno tunan. 25 Mes rasin ia ok-oke' njarin anrarin, he nmoe' natuin saa' re' matu'i nrair anbi Uisneno In Atoran nak, ‘Sin nsaken Kau. Te kaah sin sake naan, ka nmui' fa 'sukif saa'-saa'.’d
26 Mes of Asiat-Anabit naan he neem. In re' naan, Asmanaf re' nmoe' ki mihiin rasi re' batuur. In neem na'ko Au Ama'. Oras Au 'nao 'rair 'eu Au Ama', Au of a'sonu' In Asmaan ee 'eu ki. In natoon ki rasi nmatoom nok Kau. 27 Hi of mitoon meu atoni' rasi nmatoom nok Kau msa', natuin hi mibu-bua mok Kau na'ko un-unu'.