3 Oras naan, sin nheek naan bifee jes oras in nmakaek. Onaim tunggur agaam ein ma atoin Farisis tuaf fauk anheer neik je neu Nai' Yesus. Rarit sin na'seke' bifee naan he nhake nbi sin maatk ein ok-oke'. 4 Onaim sin natonan Nai' Yesus am nak, “Aam Tungguru. Bifee re' ia, napein je oras anmakaek. 5 Tatuin ka'o Musa in Atoorn ein, anmu'i prenat re' nak, ‘Tuaf re' anmakaek ro he napein hukun. Hukun naan es re' tpoir je tar antea nmaet.’ Natuin Ho te, on mee, tua?”^a 6 Sin he nakreo Gwe, he bisa nasaeb sanat he namouf Gwe.

Nai' Yesus ka nataah sin fa, mes In ntook ma ntui nbi afu, npaek In akrurun. 7 Sin nataan Ee piut. Rarit In nhaek, onaim natonan sin im nak, “On nai. Karu nmui' tuaf es na'ko hi aar ki re' ia, re' ka mmo'e msaan miit fa, ro in es re' anpoir nahuun he nhukun bifee re' ia.” 8 Rarit In ntook ma na'ruri' ntein, onaim antui nteni' nbi afu.

9 Oras sin nnenan nrair In na'uab on re' naan ate, sin namaeb ok. Fin anbi sin neek ein sin nahinin nak, sin nmoe' nitan sanat amsa'. Rarit sin es-es ate nsisa'en, nmurai na'ko mnasif tar antea munif. Namuni te, aar Nai' Yesus nok bifee naan anmesen nbin naan. 10 Rarit Nai' Yesus anhake nfain, onaim nataan am nak, “Sin etan mee? Ka tiit fa tuaf anbi bare ia, re' he nasaan ko, he nhukun ko, oo?”

11 Onaim in nataah am nak, “Ka tiit fa, tua.”

Rarit Nai' Yesus na'uab neu ne mnak, “Au ka 'roim fa he 'hukun ko msa'. Amfain nai. Mes mumnau. Kais ammoe' sanat amtein!”]^b

12 Rarit Nai' Yesus na'uab antein nok too mfaun ein am nak, “Au re' ia, on re' me'u 'eu mansian pah-pinan ia. Tuaf re' natuin Kau ka nmoin fa nbi meis'okan, mes in nmoni nbi me'u re' neiki 'monit re' amneot ma amnonot.”^c

13 Anmui' atoin Farisis tuaf fauk re' anprotesan am nak, “Hoe! Ho he mjair saksii nmatoom nok Ho tuam aan kuum, oo? Ka bisa fa! Fin natuin hit atoran, ro he tuaf bian na' njarin saksii neu tuaf es, ka tuaf naan fa neikn on. Onaim hai ka mtoup reko fa, ma ka mroim fa he mpirsai.”^d

14 Nai' Yesus nataah am nak, “On nai. Maski Au 'jair saksii 'eu Au tuak ii kuuk, mes Au uabak naan, ro batuur. Fin Au kuuk es uhiin batuur Au 'uum u'ko mee, ma he 'nao 'eu mee. Hi ka mihiin fa Au u'ko mee, ma hi ka mihiin fa au he 'nao 'eu mee msa'. 15 Hi mruuk ma m'ukur atoni' mpaek mansian ii in ruku. Mes Au ka 'paek fa mansian ii in ruku he 'ruuk ma 'ukur tuaf es amsa'. 16 Karu Au 'ruuk ma 'ukur atoni', Au ruku ma ukur naan, ro batuur. Fin Au ka 'ruuk ma 'ukur a'mees fa, mes Au 'moe' sin ok-oke' ubu-bua 'ok Au Ama' re' nhaefan Kau. 17 Kais amnikan! Fin matu'i nbi hi Atoran rais pirsait am nak, “Karu nmui' saksii tuaf nua re' na'uab rasi huma' mese', naan saah ma batuur!” 18 Onaim ka Au 'mees fa re' 'jair saksii nmatoom nok Au tuak. Fin Au Ama' re' nhaefan Kau njair saksii na'uab anmatoom nok Kau msa'.”

19 Sin natanan am nak, “Te ho Ama' naan, et mee?”

Onaim Nai' Yesus nataah am nak, “Hi ka mihiin Kau fa reko. Hi ka mihiin fa Au Ama' msa'. Fin karu hi mihiin Kau rek-reko te, hi mihiin Au Ama' msa'.”

20 Rasin re' ia ok-oke', Nai' Yesus natoon sin oras In nanoni' tuaf anbi Uim Onen Uuf, anpaumaak anbi bare re' sin anpaek je he nabuab ein roi kolekte. Ka tiit fa tuaf es he nheek Ee, natuin in oors ee ka ntea fa fe'.

21 Nai' Yesus antuut antein neu sin im nak, “Au of a'nao usaitan ki, he 'nao 'eu bare 'teta'. Hi of mam-maim Kau, mes ka miteef Kau fa, fin hi ka mmui' fa hak he mnao meu bare naan. Ma oras hi mmaet, hi misaah hi sanat fe'.”

22 Rarit atoin Yahudis sin a'naet ma kaes kou'n ein anmaktaan ein es nok es am nak, “In na'uab saa' es re' ia? In he nakfirit niis on, aa oo? Fin In nak, ‘Hi ka bisa mnao fa meu bare naan.’”

23 Onaim Nai' Yesus na'uab neu sin am nak, “Hi mi'ko pah re' et a'pinan. Mes Au u'ko neon gwe tnanan. Hi atoni' mi'ko pah-pinan ia. Mes Au ka u'ko fa pah-pinan ia. 24 Es naan ate, Au utoon fe'e na 'ak, oras hi mmaet, hi mroi ma misaah hi sanat ma penu sin fe'. Fin karu hi ka mpirsai fa mak, Au re' ia, es re' Kristus, re' Uisneno nreek Ee neem, oras hi mmaet, hi mroi ma misaah hi sanat ma penu sin fe'.”

25 Rarit sin nataan Ee mnak, “Hoe! Te Ho re' ia, sekau?”

Nai' Yesus nataah am nak, “Au utoon 'ain u'ko ahun-hunut.^e 26 Anmui' rasi mfaun re' Au bisa utoon anmatoom nok ki. Hi saant ein namfaun amsa'. Mes Au ka ururu' ma ukrira' fa rasin naan. Re' nhaef Kau 'uum a'bi ia gwi, oras In na'uab, In suma na'uab nahiin rasi re' batuur aah. Ma Au suma utoon 'eu mansian abit pah-pinan ia, rasin re' Au 'neen sin u'ko Na.” 27 (In sairt ii nak, In Amaf abit sonaf neno tunan. Mes sin ka nheek naan fa In sarit naan.)

28 Rarit Nai' Yesus na'uab antein am nak, “Oras hi mikfirit amrair Kau, Mansian Batuur-Batuur re' ia, nbi hau nehe te, na' hi mihini mmak, Au re' ia, es re' Kristus. Ma Au ka 'moe' fa saa'-saa' u'ko Au tuak ii kuuk, mes Au suma unoni' tuaf anmatoom nok rasin re' Au Ama' abit sonaf neno tunan nanoni' Kau. 29 Re' anhaef Kau nok Kau piut amsa'. In ka nkonan niit Kau fa 'mees, natuin Au 'moe' utuin In romin piut.”

30 Oras Nai' Yesus natoon rasin ia te, anmui' too mfaun re' anpirsai Je.

31 Rarit Nai' Yesus na'uab neu atoin Yahudis sin re' npirsai Je mnak, “Karu hi mmoni mmafuut mok Au noin' ein, ma hi minoni' piut mi'ko Au te, hi mjair Au atoup noin' ein re' batuur. 32 Rarit hi bisa mihiin rasi huma'-huma' re' batuur. Ma rasin re' batuur naan, esan re' nafetin ki, he hi kais amjair ate mtein.”

33 Rarit sin nprotesan am nak, “Hai re' ia, ka mjair fa ate meu tuaf bian! Fin hai re' ia, ka'o Abraham in sufan-ka'un! Onaim nansaa' am es Ho mu'uab am mak, hi of mipein fetin?”^f

34 Onaim Nai' Yesus na'uab am nak, “Re' Au u'uab naan, ro batuur. Fin mansian ein aar sin re' nmonin nbin 'moe' sanat, sin njarin on re' ate, re' suma natun-tuin aah saant ee in romin. 35 Mes nati' te, on nai: atoin ate sin ka biasa natuan nkonon fa nbin uim jes. Fin suma usi' in anah, re' natua nkono nbi naan. 36 Onaim karu Au, Uisneno In Anah, Au 'noes 'ain hi saant am penu sin ite, hi mipeni mrair fetin, ma ka mjair fa ate meu sanat naan antein. Nok ranan naan, hi mipein fetin batuur, ma kais mituin sanat naan in romin antein!

37 Au uhini 'rair ki, hi es re' ka'o Abraham in sufan-ka'un. Maski on naan, mes hi mam-maim ranan piut he mi'maet Kau, natuin hi ka mroim fa he mtoup Au rais noni'. Fin anbi hi neekm ein, ka nmui' fa bare ntein he mihiik ma mipaan Au Uab ein. 38 Au utoon rasin re' Au 'kisu 'rair sin, re' Au Ama' naruru' ma nakrira' nrair sin neu Kau. Ma hi mmoe' mituin rasin re' sin hi ama' natoon anrair sin neu ki.”

39 Sin natahan am nak, “Hai re' ia, ka'o Abraham in sufan-ka'un!”

Nai' Yesus na'uab am nak, “Karu hi mjair ka'o Abraham in sufan-ka'un re' batuur, hi ro he mituin a'tope' na'ko na. 40 Mes ka'o Abraham ka nmoe' niit fa maufinu on re' hi! Fin hi mam-maim ranan he mi'maet Kau. Te kaah, Au re' ia es re' utoon 'eu ki rasin re' batuur, re' Au 'neen sin u'ko Uisneno. 41 Hi 'moe'm ein, ro tebes, ka na'roo fa na'ko hi ama' in i'moe'k ein.”

Mes sin anprotesan am nak, “Hae! Hai re' ia, anah-anah saah! Kais mak, hai re' ia, ri'aan nasi! Fin hai Ama', suma mese' kuun, es re' Uisneno!”

42 Onaim Nai' Yesus natonan sin im nak, “Mes karu Uisneno batuur-batuur anjair hi Ama', tebes hi ro he mneek Kau. Fin Au mneemk ii u'ko Na, ma Au es re' ia. Au ka 'uum fa utuin Au roimk ii kuuk. Mes Au 'uum, utuin In es anhaefan Kau. 43 Nansaa' am es hi ka mihiin fa Au uab ein aan? Oni' natuin hi ka mroim fa he mneen ate!

44 Hi re' ia, huma' mese' on re' nitu 'nakaf. Fin hi mroim he mmoe' mituin in romin! Na'ko oras ahun-hunut, in aroor mansian. In nraban rais reko, fin in ntorak nain are' saa'-saa' re' batuur. Karu in nputa-kriu te, naan in monin. Fin in re' naan aputa-kriut, ma apoit ee tuan! 45 Au re' ia, es re' utoon rasi re' batuur. Mes hi ka mpirsai Kau fa. 46 Neu! Sekau na'ko ki bisa miruru' ma mikrira' bukti mmak, Au 'moe' sanat? Au 'sanmaak! Karu Au u'uab batuur, nansaa' am es hi ka mpirsai Kau fa?

47 Tuaf re' In amneemn ee na'ko Uisneno, nneen In Kabin ma Prenat. Mes hi re' ia, hi ka mi'ko fa Uisneno, es naan ate hi ka mroim fa he mneen Kau.”

48 Atoin Yahudis sin a'naet ma kaes kou'n ein natahan am nak, “Hoe! Hai mi'uab batuur. Fin hai mi'uab amrair mak, Ho re' ia, ka atoin Yahudis batuur-batuur fa, mes Ho re' ia atoin Samarias. Ho mniut sae msa'!”

49 Rarit Nai' Yesus nataah am nak, “Au ka 'niut sae fa, tua. Au 'hormaat Au Ama' abit sonaf neno tunan, mes hi ka mhormaat Kau fa. 50 Au ka 'aikas fa Au tuak ii he ururu' ma ukrira' Au pinak ma krahak kuuk. Mes anmui' Tuaf es, re' he naruru' ma nakrira' Au pinak ma krahak. Maut he In kuun es re' nafeek nak, Au uabak batuur, ai' kaah?!

51 Ro tebes, Au Uab ein, batuur! Rarit atoni' re' nneen ma nmoe' natuin Au Uab ein naan, of ka nmaet fa.”

52 Annenan on naan ate, atoin Yahudis sin a'naet ein natoon Ee mnak, “Oras ia hai mihiin mak, Ho mu'uab tafi'-tafi' on re' amaunut, natuin Ho mniut sae mrair. Fin ka'o Abraham anmate msa'. Uisneno In mafefa kniun' ein anmaten amsa'. Mes Ho mak, ‘atoni' re' nneen ma nmoe' natuin Au Uab ein naan, of ka nmaet fa.’ Batuur ho mumaun umrair! 53 Ai' Ho mutenab mak, Ho ma'tani' mneis mu'ko asae nenot ka'o Abraham? Ai' Ho ma'tani' mneis mu'ko Uisneno In mafefa kniun' ein re' nmate nrarin? Ho mutenab mak, Ho re' ia, sekau?!”

54 Onaim Nai' Yesus nataah am nak, “Karu Au 'aikas Au tuak ii, atoni' ka ntoup reko fa. Te kaah, Au ka 'aikas fa Au tuak ii kuuk, mes Au Ama' es re' nait na'rat-ratan Kau. In re' naan, re' hi mmanaku' mmak, In anjair hi Uisneno. 55 Mes hi ka mihiin Je fa. Au es re' uhiin Je batuur. Karu Au 'ak Au ka uhiin Je fa, Au apoit Kau on re' hi. Mes Au uhiin Je batuur, ma Au 'moe' utuin In Kabin ma Prenat amsa'. 56 Hi ka'o Abraham in neekn ee nmariin anneis, oras in nhaat ma npao he nkius niit Kau 'uum. In niit anrair, rarit in nnaben ate, nanokab ma namtiis inrair.”

57 Atoin Yahudis sin a'naet ein na'uab neun Ee mnak, “Ho ka mmoin maan fa toon bo' niim fa fe'e msa'! Mes Ho mak, Ho mkius miit amrair ka'o Abraham. Batuur, aa oo?”

58 Onaim Nai' Yesus nataah am nak, “Batuur! Fin ka'o Abraham ka nmoin fa fe', mes Au 'moin 'ain.”

59 Rarit atoin ein naan naitin fatu he npoir Je, natuin In naikas In tuan ee nahuum on re' Uisneno. Mes In nnao na'kor-koro' he npoi na'ko Uim Onen Uuf ee in kintal.^g