Sa'a birang qauwa. Ga'ing sa, Tuang Latala Gwaqa gai carita.^a Genu su Yesus Kristus, Tuang Latala tula soma ba Ga'ing tufa wouwa. Gai carita sa'a gagga halla gsali:

2 Yesus Ai krayang pinni yedda, Tuang Latala wa'ang nukku gitti wouwa, genu Yohanes. Yohanes kuddi yia ela mari Yesus Gai anna gaggi. Tula-tula su'u, Tuang Latala Ai birang pinni waci gitti, genu Yesaya. Gang tulis akku:

4-6 Lee biasa Yohanes gatta, bamma iila-srani. Gang illa axori nukku gammi bangnga. Gai lanna su'u lee unta gai muddi ma ela. Gai sapukamang su'u lee binatang gai waqa ma ela. Gai qarra su'u oo mari ta'ung hutha gaggi. [Yohanes gai bangnga su'u, Elia gai bangnga tula-tula nissi.]^d

Sudana su'u, serang dumma kota Yerusalem mari propinsi Yodea ge wa'ang gopa'i anna Yohanes gecing suma gatarana. Ging anna Yohanes ga'ing billi mari ge ajaran watti gaggi. Yohanes giabirang akku, "Hing kuddi hi tmeci gopa'i su ma birang wa acci cua, gsuli ni Tuang Latala hi tmeci su gopa'i api cua. Hi'ing na'a kuddi iila-srani ni, su'u ni gai tanda akku, hing hiola Tuang Latala Ga qauwa wouwa.”

Watti gsuli, ging i tmeci birang, Yohanes galla ballung Yordan gammi gi'ing iila-srani.

7 Gang giabirang akku, "Maqa Wa'ang nukku pata hebat na'ing gafakki sama anna. Mang Gai wa'ang gitti waci na'a, na'ing ba'a waai.^e 8 Na'ing sa'a mang iila ba mari hi'ing iila-srani, Ga'ing su'u maqa ela nai gafakki, Gang hiammi gammi su'u Tuang Latala Gai Roh Blela mari mi'a walla.”

9 Sudana su'u, Yesus havang Nasaret propinsi Galilea soma, galla anna Yohanes gatharana gaggi. Ba Yohanes iila Yordan suma Ga'ing iila-srani. 10 Sudana Yesus iila gammi ola cira, Gang riaqqu billi, hundas a'ing cxanna. Tuang Latala Gai Roh hilla Ga'ing wa cukku daga waddi daiya uqhululung gsuli. 11 Gai na'a Tuang Latala gamang undas soma watti gsali,

12 Wouwa su'u, Tuang Latala Gai Roh Yesus Ga gia, illa cikka axori nukku mia. 13 Suma su'u binatang hutha gaggi na'a wanna. Yesus illa su'u ma missi weri qaa uthu. Suma su'u, snara ina gi ada anna Yesus Ga'ing akal galanna gaggi, su'u na'a gai mia waai. Galla su'u, Tuang Latala Ai knii sorga gaggi gitti anna Ga'ing bleta.

14 Tula su'u, ging Yohanes, bamma iila-srani, ga gia buui gammi gadu, ni Yesus galla propinsi Galilea gia, soma Gang Tuang Latala Gai Birang Qauwa ma lee giabirang. 15 Gang birang akku,

16 Weri nukku, Yesus apa dano Galilea gai tuthu su'u gara lola. Gang wa'ang nukku gsarru, genu Simon, alimaraqqu ai wee, genu Andrias. Alimaraqqu jala cua pating. Su'u gi krayang weri-weri. 17 Yesus alimaraqqu gitta akku, "Bah! Hing ma Nalanna! Hing huma hafi lafi, waddi sa'a Nang ela hing wa'ang lafi gaggi.” 18 Watti gsuli, alimaraqqu jala su'u maiya, galla cira Galanna.

19 Wouwa su'u, Yesus apa wa qorunnu nissi, Gang galla Sabadeus gwaqa ina gsarru. Ganaang su'u genu Jakobus, alimaraqqu ai wee, genu Yohanes. Alimaraqqu hee gammi missi puka ela gang qauwa. 20 Yesus alimaraqqu gitta akku, "Bah! Hing ma Nalanna.” Ba alimaraqqu galla apa gimaang mari wa'ang hee gammi krayang su'u gadu. Ging galla cira gia Galanna.

21 Yesus itanapa wa'ang lamma uthu Galanna su'u, galla gia Kapernanum ba'a. Sudana Yahudi waci gi weri sembayang,^h ba Yesus na'a see sembayang gammi waa galla suma wa'ang gi'ing ajar. 22 Gai birang watti, wa'ang gopa'i mang a'agaxa, Ga'ing ba ajaran gagga iici su'u ecicci klala. Yahudi gi guru agama ina su'u, gi esamma waai.ⁱ

23 Sudana su'u, wa'ang nukku snara ga'ing wanna. Ge na'a see sembayang gammi wa, snara wa'ang gammi mia su'u galla wuara birang 24 akku, "Heh! Yesus, Nasaret waci! Hang nai anna ela gi! Hang na'ing ela mucci gaggi? Nang Ha'ing klala. He'ing su, tula soma ba Tuang Latala lalla, Ha'ing panatu anna wouwa. Ha'ing su, Tuang Gai Wa'ang Blela, He tmeci na'a wanna waai.”

25 Yesus snara su'u gadigang akku, "Ha'a su ta pinni! Cukku wa'ang su'u ga auwa gia!”

26 Snara su'u galla ela wa'ang su'u ga'ing baqqa a'ing keri kang gatta. Wouwa snara wa'ang gammi mia su'u cukku ni wuara silaka-laka. 27 Wa'ang see sembayang gammi mia su'u gopa'i mang a'agaxa. Ba ging iabirang akku, "Bah! Ga'ing sa yamma? Gang snara gitti cukku gia, gopa'i Gai yawa galanna. Ga'ing sa ajaran safa'a dena? Bamma su Gai birang mang inaqhoqa!”

28 Ba wa'ang ina su'u apa wa nukku gabirang ma nukku gabirang i goyawa, su'u ba havang propinsi Galilea mia su'u gopa'i watti.

29 Ging see sembayang suma cukku, Yesus itanapa Simon mari Andrias gi see gia. Jakobus mari Yohanes na'a itanapa gia esamma-samma. 30 Simon grasi alla lilla ba gang bali tagga ta'a. Sudana Yesus itanapa Ai knii ina see su'u gammi wa, lee anna giabirang akku, "Bammala tlaqqu.”

31 Qauwa ba, Yesus wa bammala su'u ga'ing billi, gathaang pinni, moli ga'ing oci cira missi. Sudana na'a gai lilla galla maxavu. Bammala galla cukku gia gi'ing bleta.

32 Sudana weri hoyang ba'a, lee i wa'ang lilla ina su'u ga anna, wa'ang snara gi'ing wanna na'a ging ga anna. Ging ga Yesus gannu anna Gabanga giamoli gaggi. 33 Wa'ang kota nukku gopa'i cira anna see su'u wlaga'ai su'u i walla. 34 Wa'ang ina su'u gi lilla gafa'a-gafa'a, gopa'i na'a Yesus ela maxavu. Gai na'a snara yeci ina dumma-dumma su'u githiala gia. Tapi Gang atawaya snara ina su'u ia birang, gi'ing na'a Ga'ing klala.

35 Gagga bacci illa hoyang blola, yedda qana, Yesus entula cira se su'u cukku gia. Gang gia illa axori nukku sembayang, Amaang Tuang Latala Gabirang gaggi. 36 Sudana Simon ina cira, ging Yesus gsarru waai, ba ging gia Ga'ing lafi. 37 Ging galla gia Gatarana, ba ging Gabirang akku, "Namaang, wa'ang dumma He'ing lafi su.”

38 Gang giamaragu akku, "Su'u na'a qauwa. Tapi lebaai ping havang gafa'a pe'ing-pe'ing sama sa, ma gia ni. Nang Birang Qauwa mari gi'ing na'a giabirang ni. Ga'ing su'u ba Nai krayang su.”

39 Ba Gang galla propinsi Galilea gammi suma goyawa apa gia, gi see sembayang ina gammi su'u Latala Gai Birang Qauwa mari giabirang. Ni Gang galla snara ina gagga wa'ang gammi mia su'u githiala cukku.^j

40 Sudana su'u, wa'ang nukku hakiburang ga'ing wanna Yesus Gannu anna. Gang aya ukku i muddi Yesus Gabanga akku, "Namaang, ee! Nomoli ni! Nang klala, Hang nai lilla sa ela maxavu qauwa, su'u ni lee nethu gammi yeci-yeci oli. Asal Hang mang yawa.”

41 Yesus galla wa'ang su'u ammi ga'ia ba Gang Athaang lunna, ga'ing papa akku, "Ecicci, Nang yawa! Hang galla maxavu su!” 42 Mang gomaqa, wa'ang su'u ge lilla iata. Gang galla qauwa wouwa ba su'u. 43 Qauwa ba Yesus wa'ang su'u gitti gang ola gia, Gang ga birang 44 akku, "Hami ela-ela! Hang maxavu wa, ba apa lee giabirang oli, ee! Hang kuddi Musa tula su gai parenta galanna. Qauwa ba kafala agama ganni gia ni, banga gang ha'ing baqqa paresa, ni gang galla billi hang maxavu wouwa e, yedda. Hai na'a kuddi pambriang pinni gia, su he tanda hang banga indumma, su'u ni wa'ang gopa'i klala, hang ecicci maxavu wouwa.”^k

45 Wa'ang su'u galla cukku gia, i taa-taa gonung apa lee giabirang. Ba wa'ang dumma anna Yesus Ga'ing lafi, ela Gang hoyang kota gammi Affang tufa na'a gasaya. Ba Gang galla gia illa axori kota gorana suma missi. Gsuli na'a, i taa-taa, lee mang qrari anna, Yesus Gatarana gaggi.