Yakob peka tatao ana na si èci-èci, aa manèngi berkat nèti Lamatua
49
Hèia Yakob pua ana na aa'i-aa'i ra pakaboko. Ropa ra kaboko aa'i, na peka dènge si, aku nèngu na, “Ana ja'a aa'i-aa'i! Mai padètu dènge ja'a. Te ja'a neo peka dènge miu j'ara mamuri mi èci-èci lod'o limuri.” 2 Ka na peka mema dènge ana-ana na si, aku nèngu na,“Sèmi ne'e, ana-ana Yakob! Mai titu lingu mere ja'a.
Mi nanene, ama miu Isra'el ne, neo padhai lii.
3 Ruben! Èu ne, ana ja'a dhu uru tèka! Èu ne'e tatea ja'a, dènge ai g'ana ja'a. Dhèu pakab'ua risi èu. 4 Te ngaa d'ara èu èra boe, sama sèmi rii dhasi dhu la'e-mai la'e-mai. Cag'ag'a laa, èu lamu j'unu dènge dhèu èmu ja'a, ka pakaj'alu era j'unu ama èu. Tatao èu èèna ka, pamanahu eele kolongara ca dhèu a'a.
5 Simeon dènge Lewi! Miu dua mi ca rupa. Miu dua mi, malai titu kèna ded'e samala, ho paj'èra dhèu. 6 Ladhe miu pare pama'ète kalua haga sapi, ho ra kapod'e reo-reo ètu era, na lèke dad'èi miu kèna. Aa bhabhelu miu hari, ladhe miu kadhi ngutu, na mi pamadhe dhèu. Nèti èèna ka, ja'a pahae boe lii padhai lii miu. Aa ja'a d'èi boe tao madha-dhilu mi lii langu miu. 7 Nèti èèna ka, ja'a dhoo bhelu-katub'a miu ne, te seli-kolane nga! Dènge nanasa miu dhu dènge boe sasue ciki sa hèi. Ladhe èèna na, miu pasae unu mi, bhelu-katub'a miu sèra. Ho èèna na, Lamatua ceb'e ana-èpu miu, asa g'ana asa kariu. Ka ra paceb'a asa mia-mia, ètu dedha rai Isra'el.
8 Yahuda! Ngara èu ne, sasoa na, ‘koa-kio’. A'ari èu èèna na ra koa èu, aa ra pacud'u kètu ho pakab'ua èu. Èu ne, j'èli musu èu, toke ra bisa heka doa kètu. 9 Èu ne, sama sèmi singa ngèru dhu èra, ho tenge nganga'a unu mu. Aa èu ne, sama sèmi singa mone, dhu tèku iisi neo bhèj'i; èci sa bani boe pagagai dènge èu. Èu kahèi sèmi singa rena, dhu madhenge ana; èci sa bani boe gagu. Èci èèna ka dènge èu. Dhèu èci sa bani boe padadisi, aa bani boe tao macam-macam mi dedha èu. 10 Èèna na èu mèd'u paredha. Ana-èpu èu oo rèd'u paredha padhutu-dhutu, toke abhu èci dhu hak nèngu risi eele nèti cahag'e, ho nèd'u paredha na. Ka dhèu aa'i-aa'i ètu rai-haha ne'e, pahaha iisi ho nanene lii paredha nèngu hèi.a 11 Èèna na, èu ne mamuri dènge karej'e-karae. Èu neo ngaa, na abhu. Èu neo tao ngaa, na j'aj'i! Aa ladhe èèna na, badha-manu, dènge isi rai nèti oka-tedhe èu, asa ae d'ai ceb'e lebhe eele hèi. 12 Nganga'a-nginu èu, dhu be'a hua, aa dhu èle boe.
13 Sebolon! Rai pusaka dhu èu unu, kapai seli, nèti nebhe dhasi toke d'ai too dènge kota Sidon. Kapa-kapa mai nèti mia-mia ho panahu dènge be'a ètu d'ara hèb'a-namo dhasi èu.
14-15 Isaskar! Èu ne, sama sèmi keled'ei dhu èra, te ngaa èu kètu hadhu papake na aad'o. Ladhe èu j'unu ètu talora j'ara,b dhèu èci sa bisa boe pakèd'i èu ho kako taruu. Te ngaa ladhe èu mèdhi rae ètu ca bèka nèi be'a, èci sa dhae pua mèka èèna ka, mu pasae mèti le mèdha-panyau èu ho lamu. Tatu èu sama sèmi èèna ka!
16 Dan! Ngara èu ne, sasoa na, ‘dhèu pama'ète lii’. Aa èu ne, dènge ana-èpu èu, ladhe bèli-camèd'a pama'ète lii nèti dhèu èu Isra'el sèra, dènge boe bia ca bèka. 17 Aa èu ne, sama èci èèna ka dènge mege kaisao dhu j'unu ètu sebhe j'ara. Dhèu ca'e jara ho èèna na, èu kadhi haga jara èèna nèti kabodho, toke dhèu manahu sa rai.
18 O LAMATUA! Ja'a ke'a na Èu hia mamuri mi ji'i aa'i-aa'i mi.
19 Gad! Ngara èu, lii na oe èci èèna ka dènge, ‘age’. Ladhe èèna na, dhèu parapo mai age èu, te ngaa èu kabèli hari age si, ka mu segi si.
20 Aser! Ladhe èèna isi rai nèti oka-tedhe èu be'a risi, d'ai èu tao koki dhu be'a bia, ka dhèu aae-dhèu kapai mai hèli ètu èu.
21 Naftali! Èu ne sama sèmi rusa hui, dhu dhèu èci sa ator rare boe èu. Ana-ana matana èu, bhèni iia dènge mone iia.
22 Yusuf! Èu ne, sama sèmi aj'u loro dhu dètu dènge madha èi. Dadana na loro asa tembok dhu dedha aae.c 23 Abhu kahèi dhèu tèka d'ara dènge èu, sama èci èèna ka, dènge musu dhu neo kataki èu. 24 Te ngaa Ama Lamatua dhu ja'a mangaj'i na, bera-bera dènge èu. Ho Na pa'èra ai èu, ka èu kataki si hari, masi ka nèti kaj'èu èèna ka. Èu segi si, lula Ama Lamatua dhu tolong èu. Mema koasa Na risi aa'i ngaa-ngaa! Nèti èèna ka, Nèngu j'aj'i era sarai ja'a, lula Nèngu na ka dhu madhenge ja'a. 25 Aa Nèngu madhenge èu kahèi. Dènge Na pala-bagi hia èu mèngi-nale nèti dedha-liru, nèti rai-haha, dènge berkat ho matana ana ae-ae dhu ngi'u èra. 26 Ledhe-ledhe ra ele boe. Aa mamèngi-nale dhu ja'a peka mi èu ne, dedha risi nèti ledhe aa'i-aa'i ra. Sèna ka hud'i laa berkat se aa'i-aa'i sabhori asa èu, lula èu ne risi nèti a'ari èu se aa'i-aa'i si.
27 Benyamin! Babani èu sama sèmi busa hui dhu manganga. Mad'ae aae era, na kèd'i le èèna, ho bata-magèla badha hui, ho j'aj'i mi nganga'a na. Aa, ladhe d'ai ka mèda, la'e papala dhu sisa hia mi ana-ana nèngu. Babe'a ana-èpu èu sèmi èèna kahèi.”
28 Sange ne'e ka, Yakob peka dènge ana-ana na, tasa mera mia mamuri rèngu pala lod'o limuri, èci-èci ka dènge ana-èpu rèngu. Rèngu aa'i-aa'i se'e ka, j'aj'i mi bèi-baki nèti canguru dua suku dhèu Isra'el.
Yakob madhe
29-30 Èle èèna ka, Yakob manèngi sèna ka ana-ana na pajaji mema, peka na, “Nèbhu heka, ja'a madhe. Ladhe bèli-camèd'a ja'a madhe, na miu hud'i padhane ku ja'a asa d'ara ro'a baki ku Abraham. Ro'a ne, ètu d'ara loe padètu dènge rae Makpela, dènge Mamre ètu rai Kana'an. Uru na baki Abraham ka dhu hèli loe dènge oka na, ho j'aj'i mi era ro'a nèngu. Na hèli pama'ète nèti dhèu suku Het, ngara na Efron. 31 Ètu era èèna, ra padhane baki èdhi Abraham dènge bèi èdhi Sara; ama ja'a Isak dènge ina ku Ribka ètu èèna kahèi. De èèna na, miu hud'i padhane ja'a mi era èèna, ètu sebhe ro'a dhèu èmu ja'a Lea. 32 De mage mi bhèlu, padhane ja'a ètu d'ara loe dhu baki Abraham ku hèli nare èèna.”
33 Yakob padhai lii nare sèmi èèna, na bhèj'i dènge ka ètu dedha koi na, hèia na madhe dènge ka.