Yakob manèngi Lamatua ho hia mèngi-nale mi ana-ana Yusuf, Efraim dènge Manase
48
Nèbhu boe ka, dhèu lasi peka dènge Yusuf na, ama na pèd'a aae. Hèia la'e nèti dènge ana na, Efraim dènge Manase, sèna ka lasi ladhe baki ra Yakob. 2 Ropa Yakob tadèngi Yusuf si mai le, ka na pakaseti madhèdi.3 Hèia na padhai lii dènge Yusuf, aku nèngu na, “Ana Yusuf, ee! Ama Lamatua dhu dènge Koasa Kapai Risi na, uru èèna, Na pad'elo le iisi Na dènge ja'a ètu rae Lus, ètu rai Kana'an. Ètu nèi, Na moa tèke mi ja'a. 4 Na padhai lii, peka na, ‘Bèli-camèd'a Ja'a hia ana-èpu èu j'aj'i ae, ho rèngu j'aj'i suku dhu kapai. Rai ne'e ne, ja'a hia j'aj'i unu rèngu, ho j'aj'i pusaka ra toke d'ai rai-haha èle.’
5 Aa ana èu Efraim dènge Manase èèna, hak rèngu sèmi ne'e ka: lod'o dhu ja'a d'ai Masir na, mere iisi le rèngu dua ra. Masi ka sèmi èèna, ja'a tao rèngu sèmi ana d'èlu ja'a, sama sèmi Ruben dènge Simeon. 6 Aa ladhe bèli-camèd'a èu abhu hari ana, na èèna di unu èu kèna. Ja'a tao boe rèngu sèmi ana d'èlu ja'a. Pe pusaka ra, rèngu abhu nèti a'a ra, Efraim dènge Manase. 7 Ja'a tao sèmi èèna, sèna ka èdhi sanèd'e ina mu Rahel. Lod'o ji'i mai nèti Mesopotamia asa Kana'an, d'ai talora j'ara, ina mu madhe ropa nara iisi aa'i. Èèna na, ji'i dètu rae Efrata ètu rai Kana'an. Lod'o èèna, ja'a susa d'ai seli. Ka ja'a padhane ne ètu sebhe j'ara la'e asa rae Efrata.” (Limuri ne, rae èèna ra gati ngara na Betlehem.)
8 Ropa Yakoba padhai lii nare sèmi èèna hèia, na boti kètu na, ladhe nèdhi ana-ana Yusuf ètu èèna. Hèia na karèi Yusuf, aku nèngu na, “Se'e se, ana cee?”
9 Ka Yusuf dhaa, “Se'e, ana dhu Ama Lamatua hia ja'a ètu Masir.”
Yakob peka hari, “Ladhe sèmi èèna, na hia ra mai padètu dènge ja'a, ho ja'a manèngi Ama Lamatua hia si mèngi-nale.” 10 Yakob heka le, aa musi madha na ahu le. Na ladhe nèdhi be'a heka. Hèia Yusuf nèti ana na sèra padètu asa madha Yakob, ka na liku nare si, aa na uu si dua ra. 11 Ka na peka dènge Yusuf, aku nèngu na, “Nèbhu nare sange ne'e, ja'a pangee na, ja'a bisa heka kèdhi rèhu èu. Te ngaa Ama Lamatua, tao risi eele nèti ngaa dhu ja'a ngee, toke ja'a bisa kèdhi ana-ana èu kahèi.”
12 Hèia Yusuf hari eele ana na dhèu dua sèra nèti madha Yakob,b ka na patitu kètu urutuu na, aa na pacud'u rèhu na d'ai rai, ètu madha ama na. 13 Èle èèna ka, Yusuf kèd'i. Na nare ana na dhèu dua sèra, ka na hia ra titu padètu-dètu dènge ama na. Na patitu ana uuru na Manase, re bèka g'ana Yakob. Aa ana ka dua, Efraim, re bèka kariu Yakob. 14 Te ngaa ropa Yakob soro ai na neo manèngi mèngi-nale hia ana dua sèra, na soro ai g'ana na mi kètu Efraim, aa ai kariu mi kètu Manase. 15 Ka na manèngi Ama Lamatua hia berkat mi Yusuf, peka na,
“Baki mu Isak,
dènge ama na Abraham,
dua ra madhutu taruu dad'èi Ama Lamatua.
Ama Lamatua ladhe-leru ja'a kahèi, nèti ana ngèru toke d'ai deo ne'e ne.
16 Na pakaj'èu ja'a nèti rupa-rupa sasusa.c
De ja'a manèngi sèna ka Na hia mèngi-nale mi ana èu se'e, dènge ana-èpu ra.
Aa ladhe ra manèngi-mangaj'i mi Ama Lamatua,
ra bhèlu boe ale kolongara baki Abraham, kolongara Isak, aa kolongara ja'a,
sèna ka ana-èpu rèngu asa bèba-kacanga,
ho j'aj'i kapai ètu rai-haha ne'e.”
17 Te ngaa ropa Yusuf ladhe nèdhi ama na tao ai g'ana na mi kètu Efraim, hèia kèpe nare ai ama na, ho tao sa kètu a'a na Manase. 18 Ka na peka dènge ama na, “Ama, ee! Baku tao sèmi èèna. Nèngu ne, ari Efraim. Nèngu ana limuri. De ai g'ana ama hud'i tao sa kètu a'a na Manase. Lula èèna hak ana uuru.”
19 Te ngaa ama na Yakob d'èi boe. Ka na peka na, “Ana, ee! Ja'a ke'a. Ladhe èèna na, Manase j'aj'i èra, aa ana-èpu na tabha ae, ho j'aj'i suku kapai. Te ngaa ari na Efraim èèna, bèli-camèd'a kapai risi hari nèti nèngu. Sèmi èèna kahèi ana-èpu na ae risi eele hari, ho ladhe èèna na, rèngu j'aj'i suku-suku dhu kapai aae.”
20 Ka na peka dènge ana se dua ra, “Ladhe dhèu Isra'el manèngi Ama Lamatua ho hia mamèngi-nale mi dhèu, rèngu ale ngara miu dua mi hèi. Ladhe èèna na, ra peka sèmi ne'e: ‘Ji'i sanao sèna ka Ama Lamatua hia mamèngi-nale mi èu, sama sèmi Na hia mi Efraim dènge Manase.”’
Dènge j'ara ne'e, Yakob ale uuru ngara Efraim nèti ngara a'a na Manase.
21 Èle èèna, hèia Yakob padhai lii dènge Yusuf, peka na, “Ana, ee! Ja'a nèbhu heka madhe. Te ngaa Ama Lamatua dènge miu, ho èèna na nèti hari miu asa era pea-palu'u bèi-baki miu. 22 Te ngaa ne'e ne, ja'a hia èu risi eele nèti a'ari èu. Aa ja'a hia tabha èu, ledhe ètu rai Kana'an èèna, dhu uru na ja'a kore nèti dhèu Amori, lod'o ja'a segi rèngu ètu d'ara pamusu.”