4 Èle beke pidhu nguru lod'o, hèia Yusuf peka dènge dhèu sab'a na sèra, “Mi nanene! Mèti ku lii ja'a ne asa dhèu aae, peka sèmi ne'e: 5 ‘Lod'o ama ku oe madhe, na moa sèna ka ja'a laku padhane ne asa rai Kana'an. De ja'a manèngi ho ama dhèu aae hia ja'a ijin laku padhane ama ku. Ladhe èle na, ja'a lèpa hari mai.”’

6 Ropa tadèngi, hèia dhèu aae dhaa, peka na, “Ladhe èu dhu moa le mi ama mu sèmi èèna na, lamu ho padhane ne ètu nèi.”

7 Ka Yusuf pakèd'i ka, la'e padhane ama na. Dhèu ae madhutu lasi dènge ne kahèi. Sèmi kapala urusan nèti dhèu aae, dènge dhèu kapai aa'i-aa'i nèti Masir. 8 A'ari Yusuf dènge dhèu-dhèu sab'a ra aa'i-aa'i, lasi padhane Yakob. Dhu ata ètu Gosen dhoka dhèu èmu ra, ana iiki, dènge badha-manu ra di. 9 Sordad'u ae madhutu kahèi. Cahag'e ca'e kareta, aa cahag'e hari ca'e jara. Taga dhèu dhu madhutu na, ae d'ai seli, nèti èèna ka, rombongan dhu rèti dhèu madhe ne, madhera titu kèna.

10 Rèngu lasi, ka ra pège loko Yarden ètu era èci, ngara na Atad. Era ne'e, dhèu biasa mai j'èli are. D'ai era ne'e, Yusuf si tangi mamadhe ama na. Aa ra beke hari pidhu mèda.

11 Ropa dhèu Kana'an ètu sèra, ladhe na ra j'èra ae titu kèna, hèia ra papeka, aku rèngu na, “We! Miu laladhe ku laa! Babeke mamadhe dhèu Masir se, ra susa bia nga! J'ara tatangi rèngu sèmi nèi ni ka.” Nèti èèna ka, ra pangare era èèna, ngara na Abel-Misraim. Sasoa na, ‘sasusa dhèu Masir’.

12 Hèia ana-ana Yakob se, tao madhutu sèmi lii moa rèngu uru na. 13 Ka nedhe rèti ngi'u aae Yakob na, lasi padhane asa d'ara loe dhu padètu dènge rae Makpela dènge Mamre. Abraham hèli nare era ne'e nèti dhèu suku Het, ngara na Efron, ho j'aj'i mi era udhu rui rèngu.

14 Yusuf padhane nare ama na, hèia nèngu dènge a'ari na lèpa hari asa Masir. Sama-sama dènge dhèu leo dhu madhutu sèra.

15 Ropa rèngu d'ai Masir, a'a Yusuf se mulai madha'u. Lula ama rèngu aad'o heka, ka ra papeka, aku rèngu na, “We! Ta pangee ku la! Sèmi Yusuf tèka d'ara dènge èdhi era, ho na b'ala tatao karehe èdhi mi nèngu uru èèna, na èdhi tasamia?” 16 Hèia rare lii èci, ka ra hia lii la'e asa Yusuf, peka na, “Ama wakil. Ji'i sanèd'e era, lod'o ama èdhi mamuri era, na pua ji'i 17 ho padhai lii dènge ama wakil, peka na, ‘Yusuf hud'i bhabhèlu eele ka sasala a'a na si. Lula uru na ra paj'èra ne.’ Ji'i nge'a kahèi ama èdhi ne, karèi nèti uru ka mai, na mangaj'i dhoka mi Ama Lamatua di. Ji'i kahèi j'aj'i ana pajuu Lamatua. Nèti èèna ka, ji'i mai manèngi abho, lula uru na ji'i paj'èra le, ama wakil.”

Ropa tadèngi lii ne'e, hèia Yusuf tangi.

18 Èle èèna ka, a'a na si mai unu ra, ka patitu kètu urutuu ètu madha na. Hèia ra padhai lii, peka na, “Hud'i laa ama tao ji'i j'aj'i ènu ama.”

19 Te ngaa Yusuf padhai lii dènge ra, “Miu se a'a ja'a! Miu baku madha'u ia ka! Dhoka Ama Lamatua di, dhu dènge hak hia huku mi dhèu. Te ja'a ne, aad'o. 20 Mema tare'a, uru na miu mere lii èci, ho neo paj'èra ja'a. Te ngaa Ama Lamatua ka dhu ub'a eele tatao miu dhu karehe èèna, j'aj'i mi babe'a. Nèti èèna ka, Na ded'e ja'a j'aj'i dhèu kapai ètu ne'e, sèna ka dhèu ae abhu mamuri dènge karej'e. 21 Nèti èèna ka, ja'a peka dènge miu kèna! Baku madha'u ia ka. Ja'a pamoa dènge miu se, èèna na, ladhe-leru miu, dènge ana-èpu miu aa'i-aa'i ra.”

Dènge lii padhai lii sèmi ne'e ne, Yusuf pa'èra hari d'ara a'a na si.

22 Èle èèna ka, Yusuf pea taruu ètu rai Masir, dènge a'ari na si, aa'i-aa'i ra. Nèngu mamuri d'ai 110 (cangasu canguru) tèu. 23 Nèngu d'ai hari nèdhi ana-èpu Efraim kahèi. Aa na leru èpu Manase, nuka ana-ana nèti Makir.

24 Yusuf peka mi a'a na si, aku nèngu na, “A'a ku si ee! Ja'a rasa na mamadhe ja'a dètu le! Te ngaa ja'a parcaya, Ama Lamatua tatu ladhe-leru miu. Bèli-camèd'a Nèngu ka dhu lere miu kalua nèti rai ne'e. Nèngu kahèi dhu nèti hari miu lèpa asa rai dhu Na padhadha le pake lii subha, ho hia mi baki èdhi Abraham, Isak dènge ama èdhi Yakob.” 25 Ka Yusuf manèngi mi a'ari na si, sèna ka ra subha, peka na, “Miu hud'i jaji ku mi dedha ja'a. Ladhe lod'o d'ai Ama Lamatua nèti hari miu asa rai Kana'an, miu hud'i mèti ngi'u aae ja'a asa nèi.”

26 Èle èèna ka, Yusuf madhe ètu Masir, dènge umur nèngu 110 (cangasu canguru) tèu. Hèia ra tao bubhu mi ngi'u aae na. Ka ra tao asa d'ara kopa.