Dhèu aae hia a'ari Yusuf era pea
47
1-2 Èle èèna ka, Yusuf dènge a'ari na dhèu lèmi, lasi paraga dènge dhèu aae. D'ai madha dhèu aae, ka Yusuf patadha si dènge dhèu aae, ka na peka na, “Ama dhèu aae! Ama ku dènge a'ari ku mai le nèti Kana'an. Rèngu mai dènge kahib'i-kalèbho, sapi, dènge mèdha-panyau aa'i-aa'i ra. Nuka ra ètu rai Gosen nèi.” 3 Dhèu aae karèi si, aku nèngu na, “Sasab'a miu ngaa?”
Ra dhaa, peka na, “Ji'i se, ana madhutu badha, sama sèmi bèi-baki ji'i sèra. 4 Limuri ne'e, ètu rai ji'i Kana'an, hèru hadhu madhera, ka nganga'a dènge j'u'u tèdhi heka. Nèti èèna ka, ji'i mai taha asa kabarai ne'e. Ngèti dènge badha-manu ji'i. De ji'i manèngi ama dhèu aae, ho hia ji'i pea ètu rai Gosen, sèna ka ji'i piara badha ji'i ètu nèi.”
5 Hèia dhèu aae padhai lii dènge Yusuf sèmi ne'e: “Ama mu dènge a'ari mu ètu ne'e le. 6 De hud'i laa rèngu tao kabarai ne'e, sama sèmi kabarai rèngu. Madhutu kake'a ja'a, Gosen èèna era dhu be'a risi nèti era leo ètu rai Masir ne'e. De be'a risi rèngu pea ètu èèna ka la. Aa ladhe rèngu cee dhu ladhe-leru badha dènge hua iia, na ja'a hia badha ja'a ho na piara si ètu èèna.”
7 Èle èèna hèia, Yusuf patadhe ama na dènge dhèu aae. Ka Yakob manèngi mi Ama Lamatua, sèna ka hia mèngi-nale mi dhèu aae.
8 Dhèu aae karèi Yakob, aku nèngu na, “Ama umur pèri tèu kèna?”
9 Yakob dhaa, “Umur ja'a cangasu tèlu nguru tèu kèna, te ngaa ja'a pea boe mi ca era sa. Bèi-baki ja'a sèmi èèna kahèi. Ladhe pakasame dènge rèngu, na umur ja'a kura nèti rèngu. Te ngaa mamuri ja'a pènu dènge j'aj'èra.” 10 Hèia Yakob manèngi parmisi neo lèpa. Te ngaa kalua mèka nèti d'ara èmu, na manèngi hari ca tèka mi Lamatua ho sèna ka hia berkat mi dhèu aae.
11 Èle èèna ka, Yusuf pad'elo era pea hia a'ari na si ètu Gosen, madhutu lii pua dhèu aae deo na. Era èèna be'a titu kèna. (Ra pangare era èèna ‘Rameses’.) Ka ama na dènge a'ari na sèra pea taruu ètu èèna. 12 Hèia Yusuf sadia nganga'a hia ama na, a'ari na, dènge ana dhèu èmu ra, aa'i-aa'i ra, nèti dhèu kapai toke d'ai ana susu.
Tèu manganga ètu rai Masir
13 Taa èèna, rai manganga titu kèna, tèdhi boe nganga'a ca lamusi sa ètu mia-mia. Nèti Masir toke Kana'an, dhèu-dhèu manganga roe ca palèpa, taga nèti ra'a-rinu heka. Dhèu bisa heka sab'a ngaa-ngaa, lula manganga titu kèna. 14 Dhèu-dhèu nèti d'ara rae-rae ètu Masir, sèmi èèna kahèi dhèu-dhèu nèti d'ara rae-rae ètu Kana'an, mai hèli nganga'a ètu Yusuf. Doi-doi dhu na sèmi sèra, na pakaboko aa'i ka, la'e tèke asa èmu dhèu aae. 15 Tèu èèna, èla aa'i doi dhèu Masir dènge dhèu Kana'an ka ra bisa heka hèli nganga'a. Hèia ra mai roma iisi mi Yusuf, aku rèngu na, “Ama wakil! Hia ku ji'i nganga'a ciki la, sèna ka ji'i baku madhe manganga. Te doi ji'i, èla aa'i mèu-mèu le.”
16 Hèia Yusuf dhaa, peka na, “Ladhe tare'a doi miu aad'o heka, na sèmi ne'e ka la! Mèti badha miu, ho pasilu dènge nganga'a.” 17 Ka dhèu se'e mai pasilu badha ra dènge nganga'a. Badha-badha sèmi jara, kahib'i-ka'ia, kahib'i-kalèbho, sapi, dènge keled'ei. Lula tèu èèna, Yusuf dhu moa tèke le.
18 Tèu mai na, rèngu mai hari sa madha Yusuf, ka ra peka, “Ama wakil, ee! Ji'i peka tare'a-re'a kèna. Doi ji'i dènge badha ji'i ama pasilu aa'i-aa'i le. Limuri ne'e, ji'i dènge heka ngaa-ngaa. Dhu ètu ji'i dhodhoka ngi'u dènge rai ji'i di. 19 Baku tèke eele ji'i madhe manganga. Te ladhe ji'i madhe na, cee ka dhu sab'a oka-tedhe se'e? De hua iia, ama wakil more ji'i, ho j'aj'i ènu mu. Aa more aa'i rai ji'i kahèi. Pe, èèna na, ama hia hini ho ji'i sèla hia ama. Gaji dènge kab'ua rai ji'i, ama pasilu dènge nganga'a. Sad'i ji'i baku madhe manganga.”
20 Lula rai manganga ae, ka dhèu Masir pahie aa'i rai rèngu. Nèti èèna ka, Yusuf hèli nara aa'i rai ètu Masir j'aj'i mi pusaka dhèu aae. 21 Dènge j'ara sèmi èèna ka, dhèu Masir aa'i-aa'i ra j'aj'i ènu nèti dhèu aae.a 22 Dhoka rai unu ama agama sèra di, Yusuf hèli nare boe, te dhèu aae hia taruu dhèu se nganga'a na. Nèti èèna ka, dhèu se pahie boe rai rèngu.
23 Lod'o èèna, Yusuf peka dènge ana kabarai sèra, aku nèngu na, “Naa! Miu j'aj'i le ènu nèti dhèu aae. Ja'a hèli kore aa'i le, rai miu hia dhèu aae. De mere hini se'e ho lami sèla ka mi dedha rai sèra. 24 Ladhe miu puu-g'ètu na, bagi mi lèmi. Ho ca pala hia dhèu aae. Aa èpa pala sèra, miu tao hini dènge mi pake mi'a-minu dènge a'ari miu.”
25 Hèia ra dhaa, aku rèngu na, “Ama pamamuri ji'i le, de ji'i manèngi tarima kasi. Ji'i neo j'aj'i ènu nèti dhèu aae.”
26 Nèti èèna ka, Yusuf tao madha j'ara ne'e, j'aj'i ad'a kabarai ètu Masir. Ladhe ra puru rare are na, ra bagi mi lèmi pala. Ho ca pala rèngu hia mi dhèu aae. Aa èpa pala rèngu abhu. Te ngaa rai ama agama sèra, dhèu aae hèli boe. Ad'a èèna, ra pake taruu.
Yusuf jaji na nèngu padhane ama na Yakob ètu era ro'a bèi-baki ra
27 Karèi nèti lod'o èèna, dhèu Isra'el pea taruu ka ètu Masir, ètu rai Gosen. Ra j'aj'i dhèu kaja, aa ana-èpu rèngu asa tabha ae.
28 Ètu Masir, Yakob mamuri hari 17 (canguru pidhu) tèu era. J'aj'i umur Yakob aa'i-aa'i ra, 147 (cangasu èpa nguru pidhu) tèu. 29 Lod'o dètu na madhe èèna, na paroa Yusuf, ka na padhai lii dènge ne, aku nèngu na, “Ana Yusuf! Ja'a rasa na, mamuri ja'a madhera heka. Nèbhu heka, Lamatua paroa ja'a lèpa kèna. Èèna ka ja'a manèngi sèna ka ladhe èu sue ja'a, èu subha sèna ka baku padhane ja'a ètu rai Masir ne'e. 30 Èu hud'i mèti ngi'u aae ja'a, ho padhane asa era ro'a bèi-baki èdhi. Ho èu padhane ja'a ètu èèna. Ne'e ne, dad'èi d'ara ama.”
Ka Yusuf dhaa ne, aku nèngu na, “Be'a ama! Ladhe dad'èi ama ku kèna, na ja'a madhutu.”
31 Ka Yakob padhai lii hari, peka na, “De ladhe sèmi èèna, èu hud'i subha uuru ku, ho ke'a na èu madhutu dad'èi ama.”
Hèia Yusuf subha madhutu dad'èi Yakob. Ka Yakob patitu kètu urutuu ètu dedha era j'unu na, ka na manèngi makasi mi Ama Lamatua.