Yakob dènge isi èmu na pa'èra mèdha neo pakèd'i asa rai Masir
46
Èle èèna ka, Yakoba si pa'èra ka mèdha ra, ka ra pakèd'i nèti Kana'an. Ropa ra d'ai rae Barseba, ka na roro badha tao korban hia Lamatua, dhu uru na ama na Isak mangaj'i. 2 Mèda ca lod'o ka na nii. Ètu d'ara nii ne'e, na tadèngi na Ama Lamatua paroa ne, peka na, “Yakob! Yakob! Èu kèd'i ho nanene ku la!”
Hèia na dhaa, peka na, “Nga tao, Ama?”
3 Ka Lamatua peka na, “Ja'a ne, Ama Lamatua dhu ama mu mangaj'i nèti uru ka. Mage èu madha'u kahèi lamu Masir. Te èèna na, Ja'a tao ana-èpu èu j'aj'i suku kapai ètu rai nèi. 4 Ja'a laku hèi Masir sama-sama dènge èu. Ho ladhe èèna na, Ja'a kahèi dhu kèti hari ana-èpu èu lèpa asa rai Kana'an ne'e. Ropa èu madhe, na, ana mu Yusuf madhèdi ètu baboa èu.”
5 Èle èèna ka, Yakob dènge ana-ana na sèra,b lasi taruu tèke eele rae Barseba. Ra paca'e ne dènge bhèni-ana iiki na asa kareta sèra dhu dhèu aae Masir pa'adhu hia si. 6-7 Rèti aa'i mèu-mèu mèdha-panyau dènge badha-manu dhu j'aj'i kakaja rèngu ètu rai Kana'an. Hèia Yakob dènge ana-èpu na, bhèni-mone aa'i-aa'i ra pakèd'i ka lasi rai Masir.
Ana-èpu Yakob dhu madhutu lasi sa Masir
8 Ana-èpu Yakob dhu madhutu lasi asa Masir, nuka se'e:c
10 Simeon, dènge ana-ana na: Yemuel, Yamin, Ohat, Yakin, dènge Sohar. Dènge Saul kahèi, ana na nèti dhèu èmu na bhèni Kana'an.
11 Lewi, dènge ana-ana na: Gerson, Kehat, dènge Merari.
12 Yahuda, dènge ana-ana na: Sela, Peres, dènge Sera. Ana Yahuda dhu leo, Er dènge Onan, madhe le ètu Kana'an. Na nèti dènge ana-ana Peres, Hesron dènge Hamul.
13 Isaskar, dènge ana-ana na: Tola, Pua, Ayub, dènge Simron.
14 Sebulon, dènge ana-ana na: Seret, Elon, dènge Jahleel.
15 Rèngu se'e, ana-ana nèti Yakob dènge dhèu èmu na Lea, lod'o rèngu pea ètu Mesopotamia. Ana bhèni rèngu èci, ngara na Dina. Ana-èpu nèti Yakob dènge Lea, aa'i-aa'i ra 33 (tèlu nguru tèlu) dhèu.
16 Aa Yakob abhu ana-ana dènge dhèu èmu dhu leo hari. Nuka: Gad, dènge ana-ana na: Sifion, Hagi, Suni, Esbon, Eri, Arodi dènge Areli.
17 Aser, dènge ana-ana na: Yimna, Yiswa, Yiswi, Beria, dènge ana hèni ra èci, ngara na Sera.
Beria, dènge ana le kahèi: Heber dènge Malkiel.
18 Rèngu aa'i-aa'i ra, canguru èna dhèu. Ana-èpu nèti Yakob dènge dhèu èmu na Silpa. Silpa ne'e ka dhu Laban hia j'aj'i ènu nèti Lea, dhèu èmu uru Yakob na.
19 Aa ana-ana nèti Yakob dènge dhèu èmu na bhèni leo hari, ngara na Rahel, nuka: Yusuf dènge Benyamin. 20 Lod'o èèna, Yusuf leo le dènge Asnat ètu Masir. Ama Asnat èèna, ama agama ètu kota On. Ngara na, Potifera. Ana-ana Yusuf dènge Asnat: Efraim dènge Manase.
21 Benyamin madhutu hèi lasi Masir dènge ana-ana na: Bela, Beker, Asibel, Gera, Naaman, Ehi, Ros, Mupim, Hupim dènge Aret.
22 Ana-èpu Yakob dènge dhèu èmu na Rahel, canguru èpa dhèu.
23 Dhèu èmu Yakob èci hari, ngara na Bilha. Ana-ana ra, Dan, dènge Naftali.
Ana Dan, ngara na Husim.
24 Ana nèti Naftali: Yasel, Guni, Yeser dènge Silem.
25 Yakob dènge dhèu èmu na Bilha, ana-èpu rèngu dhèu pidhu. Bilha ne, ènu nèti Rahel, dhu na abhu nèti ama na Laban.
26 De ana-èpu Yakob dhu lasi Masir, aa'i-aa'i ra dhèu 66 (èna nguru èna) dhèu. Se'e se, ige mèka dènge dhèu èmu nèti ana-ana nèngu sèra. 27 Ladhe tabha dènge ana-ana Yusuf dhu ina na nara iisi ètu Masir dhèu dua, na Yakob dènge ana-èpu aa'i-aa'i ra si, 70 (pidhu nguru) dhèu.
Yakob paraga hari dènge ana na Yusuf
28 Ropa ra dètu dènge Masir, Yakob pua Yahuda la'e uuru, paroa Yusuf ho mai paraga dènge ne ètu Gosen. Ropa ra d'ai Gosen, 29 Yusuf ca'e nare kareta na, mai paraga dènge ama na. Ropa ra paraga, liku nare ama na, ka na tangi nèbhu bia.
30 Hèia Yakob padhai lii dènge Yusuf, aku nèngu na, “Ana, ee! Ja'a unu ku kèdhi le èu. Aa ja'a ke'a le èu mamuri era. De ladhe ja'a madhe èèna ka oo, ngaa-ngaa tao heka.”
31 Ka Yusuf peka dènge a'ari na aa'i-aa'i, peka na, “Ja'a laku peka ku dènge dhèu aae, sèna ka ne'a na a'ari ja'a mai le nèti Kana'an. 32 Aa, pe ja'a peka kahèi dènge ne, miu biasa ani kahib'i-kalèbho dènge sapi. Nèti èèna ka, miu mèti dènge badha-manu dènge mèdha-panyau miu nèti Kana'an. 33 De ladhe dhèu aae paroa miu, ho na karèi miu biasa sab'a ngaa, 34 na, miu dhaa ne peka na, miu se aa'i-aa'i mi nèti ana iiki ka mai piara badha, sama sèmi bèi-baki ji'i. Sèna ka na pua miu pea ètu rai Gosen.” Yusuf peka sèmi èèna, lula dhèu Masir madenge pea pa'èci dènge ana madhutu badha.