Yusuf patadhe ngi'u mi a'ari na, aa na manèngi sèna ka ama na si pidha asa Masir
45
Ropa tadèngi nare lii Yahuda na, d'ara Yusuf roe bhilu, toke taha nare boe ètu madha dhèu sab'a na sèra. Nèti èèna ka, na hia ra lasi asa li'u, sèna ka mesa na di, dènge a'ari na ètu d'ara èmu. Dènge j'ara ne'e, nèngu bisa patadhe iisi na, mi a'ari na sèra. 2 Hèia dhèu sab'a se'e kalua asa li'u, ka Yusuf tangi dènge d'ara pèd'a. Lii tangi na mèdhu, ka dhèu-dhèu Masir ètu li'u sèra tadèngi kahèi. Mesa boe dhèu ètu li'u sèra, te dhèu ètu èmu dhèu aae tadèngi kahèi.3 Ka Yusuf peka mola-mola dènge a'ari na si, aku nèngu na, “A'ari, ee! Ja'a ne'e ka Yusuf èèna! Ama ku mamuri era, do?”
Ropa tadèngi rare, a'a na sèra madha'u titu kèna. Ra bisa heka bhoke hèb'a padhai lii ngaa èci sa.
4 Hèia Yusuf paroa si, peka na, “Mai ku padètu-dètu dènge ja'a.”
Ka ara lasi padètu sa madha Yusuf. Ka na peka hari, “Ja'a ne, Yusuf, dhu uru èèna, miu pahia eele asa Masir ne'e. 5 Miu se tare'a pahie eele ja'a. Te ngaa mage miu madha'u, aa baku peka cee ka dhu sala. Lula Ama Lamatua ka dhu hia uuru ja'a mai sa ne'e. Ho dènge j'ara ne'e, Na pake ja'a ho hia mamuri mi dhèu ae. Sèna ka baku madhe manganga.
6 Rai manganga ne heka dua tèu kèna. Lèmi tèu era. Bèli-camèd'a dhèu tao heka oka-tedhe, sèla heka, aa abhu heka nganga'a hèru èj'i lai. 7 Dènge j'ara dhu èdhi te'a boe ne, Ama Lamatua hia ja'a mai asa ne'e uru nèti miu. Sèna ka, miu dènge ana-èpu miu abhu mamuri.
8 De dhu lèke, nèti boe tatao miu ka ja'a d'ai era ne'e, te ngaa tatao Ama Lamatua di. Nèngu ka dhu hia ja'a j'aj'i ai g'ana dhèu aae Masir. Ka ja'a j'aj'i mi kapala urusan ètu d'ara èmu dhèu aae. Abhu boe dhèu leo èci sa dhu kapai risi nèti ja'a.
9 De miu lami ka lai-lai ne, ho peka lii padhai lii ja'a ne dènge ama ku, sèmi ne'e: ‘Yusuf, ana ama ku, mamuri era! Nèngu j'aj'i le dhèu kapai ètu rai Masir. Na manèngi ama ku la'e lai-lai asa nèi. 10 Ho èèna na, ama pea ètu rai Gosen padètu dènge nèngu. Era na be'a aa taleo. Sèna ka ama bisa piara kahib'i-kalèbho, kahib'i-ka'ia dènge sapi aa'i-aa'i ra. Aa na manèngi kahèi ho ama la'e dènge ana-èpu, dènge isi èmu, dènge mèdha-panyau, ho pea taruu mi nèi.a 11 Ladhe ama pea ètu Gosen, nèngu ladhe-leru ama ètu nèi. Te rai manganga lèmi tèu era. Sèna ka na tenge j'ara ho ama dènge ana-èpu, aa dènge badha-manu bisa mamuri dènge be'a.”’
12 Yusuf peka nare hèia, na padhai lii hari, peka na, “Miu unu mi mèdhi le, si? Aa èu kahèi, Benyamin. Ja'a ne'e, tare'a-re'a Yusuf. 13 De miu peka dènge ama èdhi, na, ja'a ne'e dènge koasa kapai titu kèna, ètu kabarai Masir ne'e. Aa lolo dènge ama, ngaa aa'i-aa'i dhu miu mèdhi le ètu ne'e. Ho èèna na, karohe mèti ama sa ne'e mai!”
14 Èle èèna ka, liku nare ari na Benyamin, hèia dua ra tangi. 15 Sèmi èèna kahèi, na liku nare a'a na si èci-èci, ka na uu si. Ka heka ra bani padhai lii dènge ne kèna.
Dhèu aae Masir sèmi nare a'ari Yusuf sèra
16 Ropa dhèu aae dènge dhèu-dhèu kapai na sèra, tadèngi rare a'ari Yusuf mai asa Masir, ra karej'e kahèi. 17 Ka dhèu aae peka dènge Yusuf, aku nèngu na, “Ari! Peka dènge a'ari èu sèra, ho hua ka nganga'a asa dedha keled'ei rèngu, sèna ka rèti sa Kana'an. 18 Aa peka dènge si, rèti ama mu dènge ana-èpu aa'i-aa'i, mai pea sa ne'e. D'ai ne'e, pe ja'a hia rèngu rai, era dhu hèu mèngi risi, sèna ka rèngu bisa mamuri nèti isi rai èèna. 19 Aa hia rèti mema dènge kareta pèri-pèri nèti ne'e, ho sèna ka hua ana iiki-ana iiki dènge ama mu. 20 Baku ra pangee mèdha-panyau dhu rèngu bisa boe nedhe rèti, te, ngaa-ngaa dhu be'a ètu rai Masir ne, èèna na j'aj'i unu rèngu.”
21 Tadèngi sèmi èèna, ka Yusuf hia si kareta pèri-pèri bua, dènge parèko ra'a j'ara, sama sèmi lii paredha dhèu aae. Aa a'ari nab pa'èra ka, ho lèpa madhutu lii paredha dhèu aae. 22 Ka Yusuf hia si mèdha-papake dhu hiu, ca dhèu ca pasa. Te ngaa Benyamin, na hia doi iia tèlu ngasu, dènge mèdha-papake dhu hiu, lèmi pasa. 23 Yusuf pa'adhu mèdha-panyau dhu be'a risi nèti Masir hia ama na. Rèngu hua mi dedha keled'ei canguru ngi'u. Sèmi èèna kahèi, na hia are, roti, dènge nganga'a ae-ae, dhu j'aj'i parèko j'ara, lod'o dhu rèngu mulai pakèd'i nèti Kana'an asa Masir. Nganga'a se, ra hua ètu dedha keled'ei dhu leo hari canguru ngi'u. 24 Èle èèna ka, na hia si lèpa, aa na moa si, aku nèngu na, “Miu baku patao-palaha ètu talora j'ara, ee!”
Yakob tadèngi na Yusuf mamuri era
25 Hèia ra pakèd'i ka lasi sa ama ra ètu Kana'an. 26 D'ai nèi ka, ra lolo dènge ama ra, peka na, “Ama! Ana mu Yusuf na, dhu mamuri era di. Na j'aj'i le dhèu kapai, ka na paredha ètu rai Masir!”
Yakob tadèngi hiu-hiu na, loo-loo sène, te na lèka boe. 27 Te ngaa ropa na tadèngi nare lii lolo rèngu sèra, aa na ladhe nèdhi kareta dhu Yusuf pa'adhu mai ho hua ne asa Masir, heka na lèka kèna. 28 Hèia na padhai lii, aku nèngu na, “Hea! De ana ja'a dhu mamuri era di! Ja'a heka karej'e kèna. Ja'a hud'i laku kèdhi ku ne, heka ja'a madhe dènge karej'e kèna.”