Moo hualaa pudhi Yusuf ele
44
Ra'a-rinu rara hèia, Yusuf paholo dènge kapala urusan na, aku nèngu na, “Ssst! Èu lamu isi are asa d'ara karo dhèu sèi, papènu d'ai hèb'a. Èle èèna na, èu tao hari doi ra, asa d'ara karo ra èci-èci. 2 Aa more moo hualaa pudhi ja'a èèna, ho tao asa d'ara hèb'a karo ari ra dhu limuri èèna.” Ka na la'e tao madhutu lii paredha Yusuf.3 Asa bèli d'ara cika lii sa, Yusuf hia si lèpa. Rèti nganga'a dènge keled'ei rèngu. 4 Ra lasi dhae kaj'èu mèka nèti d'ara kota, ka Yusuf paredha kapala urusan, peka na, “Èu karohe lamu magèla si. Ladhe paraga dènge si, èu peka sèmi ne'e: ‘Nga tao ka miu pake d'ara aapa sèmi èèna mi ai g'ana dhèu aae? Miu b'ala babe'a na dènge tatao karehe sèmi ne'e! 5 Nga tao ka, miu mana'u mèti moo hualaa pudhi na? Miu me'a boe, do? Mèdha èèna na, na pake boe ho dhoka ninu di! Te ngaa biasa na pake ho ne'a tasamia dènge mamuri dhèu. Èèna, mèdha sogo-tagu! Tatao miu ne, mema seli-kolane!”’
6 Èle èèna ka, kapala urusan èèna la'e magèle si toke abhu. Ropa na raga si, hèia na peka sèmi ngaa dhu Yusuf moa èèna.
7 Ka ra bari ne, aku rèngu na, “Ama peka ngaa èèna? Ji'i subha. Ji'i se'e bisa boe tao karehe sèmi èèna! 8 Ama, èu me'a era, si ma? Doi-doi ca hari sa, dhu ètu d'ara karo ji'i sèra, ji'i hia hari le sa ama, to? Tasamia ka ji'i bisa mana'u hualaa iia do hualaa pudhi ètu d'ara èmu dhèu kapai èèna! Bisa boe! 9 Ama parisa la! Ladhe abhu mèdha èèna ètu d'ara karo cee, na huku pamadhe ne! Aa hud'i laa, ji'i dhu leo se'e, j'aj'i ènu èu.”
10 Hèia kapala urusan na dhaa, peka na, “Aad'o! Sèmi ne'e. Ladhe abhu moo èèna ètu cee, na dhoka nèngu di j'aj'i ènu ja'a. Miu dhu leo lèpa.”
11 Ra papuru ka karo sèra. Ka ra bhoke dènge. 12 Hèia kapala urusan èèna parisa karo sèra èci-èci, mulai nèti karo unu a'a na, toke d'ai ari limuri tèka. Ka nèdhi moo èèna, ètu d'ara karo Benyamin.
13 Rèdhi sèmi èèna hèia, d'ara a'a na sèra j'èra ma'ète mae-mae sène. Hèia ra paca'e hari ka karo deo sa asa dedha keled'ei, ka ra lèpa hari asa d'ara kota.
14 Ropa ra d'ai èmu Yusuf, na ètu èmu era. Hèia ra patitu kètu urutuu ètu madha na. 15 Yusuf jèka si, aku nèngu na, “He! Nga tao ka miu tao ne'e mi ja'a! Miu me'a boe, ja'a ne dhèu kapai ètu ne'e. Ja'a pake na'i dhu bisa ke'a tatao dhèu, dhu dhèu leo re'a boe!”
16 Hèia Yahuda dhaa, aku nèngu na, “Irii! Te Ama Lamatua pasabhoka kèna sasala èdhi. Pe ji'i peka lii mia hari, ama? Ji'i sili iisi sa mia hari? Ladhe ama neo taha ari ji'i ne'e, na be'a risi, taha ji'i aa'i-aa'i mi. More ji'i aa'i-aa'i, j'aj'i mi ènu ama ka laa.”
17 Te ngaa Yusuf dhaa, aku nèngu na, “Aad'o! Abhu moo èèna ètu cee, na nèngu di dhu j'aj'i ènu ja'a. Miu dhu leo, lèpa hari dènge mera-milu sa ama miu!”
Yahuda manèngi sèna ka nèngu gati Benyamin
18 Hèia Yahuda la'e padètu asa madha Yusuf, ka na padhai lii, aku nèngu na, “Ama wakil! Ja'a ke'a koasa ama sama sèmi koasa dhèu aae! Uru nèti èèna, ja'a manèngi ama baku nasa dènge ja'a. Ja'a neo padhai lii ciki dènge ama. 19 Med'a na, ama karèi le ji'i, peka na, ‘Ama miu, dènge ari miu dhu èci na, era do?’
20 Ka ji'i dhaa peka na, ‘Ama ji'i heka d'ai seli le. Aa ari ji'i dhu limuri èci. Lod'o nara iisi ari ji'i ne'e, ama ji'i na heka le. Ari ji'i dhu limuri ne'e dènge a'a d'èlu na èci, te ngaa na aad'o heka. Ina ra madhe le. Ka di nèngu ka mesa na. Nèti èèna ka, ama ji'i ne sue ne titu kèna!’
21 Ka ama pua ho ji'i ngèti ari ji'i na mai, sèna ka ama nèdhi ne. 22 Ka ji'i dhaa na, ‘Ana èèna, bisa boe tèke eele ama na mesa na. Ladhe na tèke eele, na ama ji'i na tatu madhe dènge kèna.’
23 Hèia ama dhaa na, ‘Ladhe miu mèti boe ari miu na, baku mi pad'elo hari rèhu mi sa ne'e.’
24 Èle èèna ka, ji'i lèpa. D'ai nèi ka, ji'i lolo lii dhu mu moa sèra dènge ama ji'i. 25 Nèbhu-nèbhu, nganga'a ji'i èla. Hèia ama ji'i pua hari ji'i mai hèli nganga'a sa Masir ne'e. 26 Te ngaa ji'i dhaa na, ‘Ama, ee! Ji'i la'a heka sa nèi. Te ai g'ana dhèu aae na dhu moa le, aku nèngu na, ladhe ji'i ngèti boe ari ji'i dhu limuri na, bisa heka ji'i pad'elo rèhu sa nèi. De ladhe ari ji'i la'e hèi, na heka ji'i la'a kèna.’
27 Ama ji'i peka hari, aku nèngu na, ‘Miu me'a kahèi, si ma? Dhèu èmu ja'a Rahel èèna, ana na dhoka dua di. 28 Ana uuru èèna, aad'o heka. Ele boe badha hui na'e aa'i le. Nèti èèna ka, ja'a kèdhi heka rèhu na toke d'ai sange ne'e. 29 Ladhe miu mèti hari ana limuri ne, ho sèmi na abhu j'aj'èra, èèna miu paj'èra ja'a dhèu heka ne'e. Ladhe sèmi èèna na, ja'a madhe dènge kèna.’
30-31 Nèti èèna ka, ama, ladhe ja'a lèpa kèti boe dènge ari ji'i ne, ama ji'i madhe dènge kèna. Te samanga na dhu pa'èki dènge ana ne'e di. Dènge ètu d'ara haheka na ne'e, ladhe ji'i tao ne tabha j'èra, tatu na madhe dènge kèna. 32 Ngaa hari, ja'a moa le mi ama ku, peka na, ‘Ja'a ka dhu tago ana ne'e. Ladhe ja'a kèti heka ana ne'e mai sa madha ama, ja'a ka tago sasala na, toke d'ai ja'a madhe.’