3 Te ngaa Yahuda b'ala, peka na, “Ama, ca hari na ai g'ana dhèu aae Masir dhu pasanèd'e le ji'i, aku nèngu na, ji'i bisa boe pad'elo rèhu mi nèngu, ladhe ji'i ngèti boe ari ji'i dhu limuri, Benyamin èèna. 4 Nèti èèna ka, ama ku hud'i laa hia ji'i ngèti Benyamin. Heka ji'i bisa la'a hèli nganga'a hia ama ku kèna. 5 Te ngaa ladhe ama patabuli boe nèngu, ji'i oo la'a boe kahèi. Lula dhèu Masir na peka le sèmi èèna.”

6 Hèia Yakob jèke si, peka na, “Nga tao ka miu lolo dènge dhèu èèna, peka na, miu dènge ari èci era? Miu tenge j'ara ho paj'èra tabha ja'a!”

7 Ka ra dhaa, peka na, “Baku nasa ama, ee! Te lula dhèu ne, karèi taruu-taruu neo ne'a a'ari èdhi. Na karèi peka na, ‘Tasamia? Ama mi era, do? Miu dènge hari ari dhèu mone dhu leo, do?’ Sèmi èèna na, ji'i dhaa tasamia hari? Pakaseti ka ji'i dhaa ka laa, dènge mola-mola. Te pe, cee ne'a na pua ji'i ngèti hari ari ji'i sa nèi?”

8-9 Ka Yahuda padhai lii hari, aku nèngu na, “Ama hud'i patabuli ku Benyamin la'e dènge ji'i. Ja'a jaji mema, ladhe j'aj'i ngaa-ngaa mi ngi'u ari ji'i ne'e, ja'a ka dhu gati ne. Ladhe ja'a kèti heka nèngu mai asa d'ara kacui-aai ama ku dènge mamuri, hud'i laa sasala na ama ku pasae mi dedha ja'a toke madhe. Nèti èèna ka, ama ku hia la, ho ji'i sama-sama la'a dènge ne, te ji'i neo pakèd'i kèna. De karohe mai lati ka, sèna ka cahag'e baku madhe manganga. 10 Ladhe sèmi èdhi mate boe panèbhu sèmi ne'e, na, èdhi lati-mai dua hari le.”

11 Hèia ama ra padhai lii, peka na, “Ladhe sèmi èèna, na, miu nanene! Lami mere isi rai èdhi dhu be'a risi, sèmi: dhua nasu oni, bubhu-bubhu, raa aj'u hèu mèngi, èi na'i salap, kanari^a dènge kab'ui dhu leo sèra. Ho sèna ka mèti hia ai g'ana dhèu aae Masir èèna. Aa peka dènge ne, ne'e ne tadha mata. 12 Aa miu mèti doi risi eele nèti ca hari ni, sèna ka miu bisa hia hari doi kab'ua are uru sèra la'a, dhu miu mèdhi ètu d'ara karo miu sèra. Tao-tao dhèu sèra re'a boe, ka tèka sala. 13 Miu mèti ari mu. De èèna na lèpa hari lai-lai! 14 Ja'a sanao-maena, sèna ka, Ama Lamatua dhu dènge Koasa Kapai Risi Eele èèna, sab'a mi d'ara ai g'ana dhèu aae Masir èèna, sèna ka na sue miu. Aa na hia hari Benyamin dènge Simeon lèpa palere dènge miu. Te, ladhe ana ja'a se ele, hud'i laa ja'a pasae j'aj'èra ne'e taruu.”

15 Hèia lasi pakaboko tadha mata sèra dènge doi, ka lasi asa Masir. Rèti kahèi dènge Benyamin. D'ai nèi ka lasi paraga dènge Yusuf. 16 Ropa Yusuf nèdhi Benyamin dènge a'a na si, na pua kapala urusan na, aku nèngu na, “Lere mèti dhèu se'e sa èmu ja'a! Ho èèna na, pare sapi ci'u, mi pananasu nganga'a dhu be'a. Sèna ka lod'o nètu none, ra'a dènge ja'a.”

17 Hèia kapala urusan èèna, tao sama sèmi lii paredha Yusuf èèna. Na lere nèti dhèu sèra asa èmu Yusuf.

18 Ropa ra kako lasi èmu èèna, a'a na sèra madha'u bia. Ètu talora j'ara, ra papeka, aku rèngu na, “We! Nga tao ka na pua rèti èdhi sa ne'e? Mage dhoka na neo pasusa èdhi. Lula doi dhu ra tao hari asa d'ara karo èdhi ca hari na. Ra sangaja rèti èdhi sa ne'e, sèna ka ra kèpa èdhi j'aj'i ènu nèngu. Ho èèna na, ra parama rara keled'ei èdhi sèra.”

19 Nèti èèna ka, ropa ra dètu èmu Yusuf na, ra padhai lii dènge kapala urusan èèna, peka na, 20 “Ama! Baku nasa dènge ji'i, te ca hari na dhu ji'i mai hèli nganga'a ètu ne'e. 21-22 Ropa ji'i lèpa d'ai talora j'ara, ji'i ae ngara iisi, ho bhèj'i ciki. Hèia ji'i bhoke karo ho neo panga'a badha. Ladhe la'a na, doi bab'ae ji'i èci-èci ka ètu d'ara karo sèra. Ji'i nge'a boe cee ka dhu tao la'a! Nèti èèna ka, ji'i ngèti hari doi sèra ka se'e. Ji'i manèngi sèna ka ama ku baku nasa. Aa ji'i ngèti doi ka risi kahèi, neo hèli hari nganga'a.”

23 Hèia kapala urusan èèna dhaa, aku nèngu na, “Mau-mau, baku madha'u! Ele boe Lamatua miu èèna ka dhu hia miu berkat ètu d'ara karo sèra. Ca hari na, ja'a sèmi le doi miu aa'i-aa'i. Miu pakèlu boe!” D'ai èmu ka, na patalale Simeon pa'èci dènge rèngu.

24 Ka aa'i-aa'i ra lasi asa d'ara èmu Yusuf. Hèia kapala urusan èèna hia èi ho ra rase haga ra. Aa na ani keled'ei si hèi. 25 Ka na peka dènge si, aku nèngu na, “Ladhe èèna na, lod'o nètu miu mi'a dènge ai g'ana dhèu aae.” D'ara ra tatae Yusuf lèpa, rèngu lalau paie tadha mata ra sèra.

26 Ropa Yusuf d'ai èmu, aa'i-aa'i ra patitu kètu urutuu ètu madha na. Ka ra j'ole tadha mata sa hia ne. 27 Hèia Yusuf karèi si, peka na, “Tasamia? Miu be'a-be'a, do? Tasamia dènge ama miu dhu heka èèna? Na be'a-be'a, do?”

28 Ra dhaa, aku rèngu na, “Ènu ama dhu heka na, dhu ama matana ji'i, be'a-be'a.” Hèia ra patitu kètu urutuu pahaha iisi hari mi Yusuf.

29 Hèia Yusuf ladhe palème, ka nèdhi ari na Benyamin. Rèngu dua ra se, ina-ama èci. Hèia, aku nèngu na, “Ooo! Ne'e ne ka ari miu dhu limuri, dhu ca hari na miu lolo èèna, do?”

Ka na lii dènge Benyamin, aku nèngu na, “Ana, ee! Ja'a sanao, sèna ka Ama Lamatua hia èu mamuri dènge mera-milu.”

30 Ropa ladhe nèdhi Benyamin ne, d'ara Yusuf karej'e bia, lula na sue ari na ae titu kèna. Na taha nare heka d'ara na. Ka na kako eele si la'e sa d'ara kama na. Ka na tangi ngob'i-ngob'i ètu èèna. 31 Tangi nare hèia, la'e riu katanga madha na. Èle èèna ka, na pa'èra d'ara na, ka la'e hari paraga dènge si. Hèia na pua dhèu sab'a sèra lasi lalau nganga'a.

32 Ra lalau nganga'a hia Yusuf mei leo. Aa a'ari na sèra ra'a mei leo. Dhèu sab'a dhèu Masir sèra, ra'a ètu mei rèngu mesa ra. Lula dhèu Masir sèra madenge ladhe madhèdi ra'a pa'èci dènge dhèu Ibrani.^b 33 Kapala urusan èèna ator sèna ka a'ari Yusuf sèra, madhèdi patangara dènge Yusuf. Na ator hia si madhèdi mulai nèti a'a uru, padhutu-dhutu toke ari ra dhu limuri. Ropa ra ladhe rèdhi j'ara madhèdi sèmi èèna, ra malaa. 34 Yusuf pua dhèu sab'a sèra, bagi nganga'a nèti mei nèngu, hia a'ari na sèra. Aa'i-aa'i ra abhu nganga'a dhu ae sama. Dhoka Benyamin di abhu ae risi a'a na si lèmi hari. Ka ra'a-rinu d'ai bècu.