3 Ka a'a Yusuf canguru dhèu se'e pa'èra ka, lasi hèli nganga'a asa Masir. 4 Te ngaa Yakob hia boe ari Yusuf dhu ngara na Benyamin, la'e dènge a'a na si. Te, na pangee, “Mage dhoka, ana ne'e abhu hari j'aj'èra ètu talora j'ara.” 5 Lula dhèu ae nèti mia-mia tadèngi le abhu nganga'a ètu Masir, ka ra lasi hèli asa nèi. Manganga ne d'ai le rai Kana'an kahèi. Ka ana-ana Yakob se,^a lasi hèli kahèi asa Masir.

6 Tèu èèna, Yusuf j'aj'i ai g'ana dhèu aae Masir. Ladhe dhèu nèti mia-mia mai hèli are, Yusuf ka dhu pahia. Nèti èèna ka, lod'o a'a na si d'ai nèi, rèngu patitu kètu urutuu, ho tab'e Yusuf toke rèhu rèngu oe d'ai rai. 7-8 Ropa Yusuf ladhe nèdhi a'a na si, na tadhe le èèna. Te ngaa Yusuf tao iisi sèmi dhèu Masir. Nèti èèna ka, rèngu tadhe boe ne hèi. Hèia na jèka si, aku nèngu na, “Ee! Miu se nèti mia?”

Hèia ra dhaa, aku rèngu na, “Ji'i se nèti Kana'an. Ji'i mai hèli nganga'a sa ama wakil.”

9 Hèia Yusuf sanèd'e lii nii na uru na. Ka na pamadha'u si, aku nèngu na, “Ja'a lèka boe! Miu se'e dhèu mata-mata. Miu mai tenge rahasia rai Masir, ho èèna na mai musu rai ji'i!”

10 Te ngaa ra dhaa peka na, “Aad'o, ama! Ji'i se'e dhoka ana pua-paleha nèti ama di. Tare'a-re'a ji'i mai sa ne'e ne, neo hèli nganga'a di. Leo nèti èèna, aad'o. 11 Ji'i aa'i-aa'i se'e, ana nèti ca ama di. Ji'i mai mata-mata boe rai ama ku si ne'e. Ji'i se'e dhèu be'a.”

12 Te ngaa Yusuf jèka si dènge lii mèdhu hari, peka na, “He! Omo koso! Baku kapod'e-kabèli ja'a. Miu se'e tare'a-re'a dhèu bhelu. Miu mai tenge rahasia rai ne'e!”

13 Ka ra peka, “Aad'o ama! Ji'i se'e ana pua-paleha ama ku di. Ji'i mai nèti rai Kana'an. Ji'i aa'i-aa'i mi nèti ca ama, canguru dua dhèu. Ari ji'i dhu limuri tèka, pea dènge ama ji'i. Aa ari ji'i èci aad'o heka!”

14 Hèia Yusuf dhaa, aku nèngu na, “Aad'o! Lèke sèmi lii ja'a deo na! Miu se'e dhèu mata-mata. 15 Na! Karèi sèmi èèna, na miu hia ku tadha èci, sèna ka ja'a ke'a lii padhai lii miu deo sa, tare'a, do aad'o. Ja'a subha ee! Ladhe ari miu dhu limuri na, d'ai boe ne'e, miu èci sa bisa boe kalua nèti rai ne'e! 16 De hua iia miu pua dhèu èci la'e, ho nèti ari miu dhu limuri èèna asa ne'e mai. Aa miu dhu leo se, ja'a taha. Ja'a neo ke'a miu se'e peka tare'a, do aad'o. Ladhe aad'o, miu se'e tare'a-re'a mata-mata.” 17 Ka Yusuf pua taha si d'ara bèdho tèlu lod'o.

18 D'ai lod'o ka tèlu, Yusuf la'e padhai lii dènge ra ètu d'ara bèdho, peka na, “Ja'a ne'e, ca dhèu dhu madha'u dènge Lamatua. Aa ja'a madhutu dad'èi Na taruu. Sèna ka miu mamuri, ja'a neo patabuli miu. Te ngaa hud'i dènge ku lii pajaji. 19 Ladhe miu se'e tare'a padhai lii dhu mola, miu pad'elo ku ngaa èci j'aj'i mi tadha. J'ara na sèmi ne'e: ja'a taha ca dhèu ètu d'ara bèdho ne'e. Dhèu leo lèpa ho mèti nganga'a hia a'ari miu, te ra tatae miu lami mèti nganga'a. 20 D'ai nèi, miu mèti ari miu dhu limuri èèna mai asa ne'e, ho j'aj'i bukti, tare'a miu se'e dhèu be'a. Sèna ka ja'a baku huku pamadhe miu.”

Ropa ra tadèngi rare ne'e, ra d'èi kahèi sèmi èèna. 21 Ka ra padhue-padhai ka èci dènge èci, peka na, “Waa! Ne'e ne, èdhi heka abhu b'ala kèna, lula sala dhu èdhi ad'u-ue mi dedha ari èdhi uru na. Èdhi ladhe tèdhi nèngu j'èra titu kèna, d'ai na manèngi sasue èdhi, te ngaa èdhi pusi boe ne. Nèti èèna ka, èdhi abhu j'aj'èra sèmi ne'e ne.”

22 Hèia Ruben pasanèd'e si, peka na, “We! Ari-ari ja'a, ee! Uru na ja'a kai le miu, ho baku paj'èra ana èèna, si? Te ngaa miu-miu se'e ka dhu mo'o boe nanene lii ja'a. Nèti èèna ka, lod'o ne'e èdhi dui tare raa ari èdhi Yusuf èèna.” 23 Rèngu padhai lii ae-ae sèmi èèna, re'a boe na Yusuf ne'a lii rèngu kahèi. Lod'o Yusuf padhai lii dènge rèngu, na pake lii Masir, ho èèna na dhèu leo lole hari pake lii Ibrani.

24 Tadèngi ra padhai lii sèmi èèna hèia, Yusuf kèd'i eele si, la'e tangi asa era leo. Tangi nare, la'e hari pa'èci dènge si. Ka na pua dhèu èki Simeon ètu madha a'ari na sèra.

25 Èle èèna ka, Yusuf paredha dhèu sab'a sèra, ho soli are asa d'ara karo a'a na si. Aa tao hari doi kab'ua are sèra, asa d'ara karo ra èci-èci. Ra tèke ètu hèb'a karo sèra. Na pua dhèu sab'a se'e, ho hia si dènge gee. Ka dhèu sab'a se'e lalau ka, madhutu ngaa dhu Yusuf paredha. 26 Èle ka, a'a na si hua karo nganga'a sèra asa dedha badha keled'ei. Ka ra pakèd'i dènge ka.

27 Ropa d'ai talora j'ara, ra ae. Dhèu èci bhoke karo na, ho neo ani keled'ei na. Na ladhe la'a na, doi na ètu dedha are, ètu d'ara karo èèna. 28 Capa na cag'ag'a! Hèia na paroa a'a na si, peka na, “Irii! Miu mai ladhe ku laa! Madhe èdhi kèna. Ra tao hari doi ja'a asa d'ara karo ne.”

Ladhe rèdhi èèna ka, ra ele ngangee, aa madha'u bia. Ka ra papeka ka, aku rèngu na, “Ama Lamatua tao èdhi samia ka ne?”

29 Hèia ra kako taruu ka, lasi d'ai Kana'an. D'ai nèi ka, ra lolo dènge ama ra, ngaa dhu rèngu paraga ètu rai Masir. 30 Ra lolo, peka na, “Ama, ee! Ai g'ana dhèu aae Masir èèna, bhelu titu kèna. Na jèka taruu ji'i. Na peka na ji'i la'a j'aj'i mata-mata ho neo pa'ele iie rai Masir. 31 Ka ji'i dhaa, peka na, ‘Aad'o! Ji'i se'e padhai lii mola-mola. Ji'i mata-mata boe. 32 Ji'i se'e, dhèu be'a-be'a. Ji'i aa'i-aa'i mi, j'aj'i nèti ca ama, dhèu canguru dua. Te ngaa èci madhe le. Aa ari dhu limuri èèna, dènge ama ji'i ètu Kana'an.’

33 Na peka hari, aku nèngu na, ‘Ja'a neo kèdhi, na, miu se'e dhèu be'a, do aad'o! Miu èci, pea mi ne'e. Aa leo lèpa mèti nganga'a hia a'ari miu, sèna ka ra baku madhe manganga. 34 Hud'i miu mèti ku ari miu èèna mai sa ne'e, heka ja'a ke'a kèna, tare'a-re'a miu se'e dhèu be'a, mata-mata boe. Èèna na, heka ja'a patabuli dhèu miu dhu ja'a taha ne. Aa dènge sèmi èèna, ja'a heka ko'o kèna, miu kako palème dedha rai ne'e.”’

35 Lolo èle hèia, heka ra bhoke karo-karo rèngu dhu pènu dènge are sèra. Te ngaa ra cag'ag'a ladhe la'a na doi rèngu sèra aa'i-aa'i ra, ètu hèb'a karo. Rèdhi sèmi èèna, Yakob dènge ana-ana na madha'u titu kèna.

36 Hèia Yakob padhai lii dènge si, peka na, “Miu se, pa'ele le ana-ana ja'a. Yusuf aad'o heka. Sèmi èèna kahèi, Simeon. Ne'e miu neo mèti hari Benyamin kèna? Miu se'e, tare'a-re'a neo paj'èra ja'a!”

37 Hèia Ruben peka dènge ama na, aku nèngu na, “Ama, ee! Pangèd'u laa Benyamin asa ja'a mai. Ja'a tago kore. Ja'a jaji kèna mi ama ku, èèna ja'a kèti hari na mai. Te ngaa ladhe aad'o, na ja'a hia ana ja'a, mone dhèu dua sèra ho ama pamadhe aa'i si.”

38 Te ngaa Yakob dhaa hari, peka na, “Bisa boe! Miu bisa boe mèti Benyamin. Te a'a na Yusuf, madhe le. Ne'e, di nèngu ka mesa na. Ladhe na abhu calaka ètu j'ara, miu tabha babia mi ja'a, toke madhe kèti.”^b