Yusuf peka sasoa lii nii dhèu aae Masir
41
Pe d'ai dua tèu risi sa, hèia dhèu aae Masir nii. Na nii na, nèngu dhu titu ètu sebhe loko Nil. 2 Kabèdhi laa, nèngu nèdhi sapi pidhu ngi'u dhu kabèb'u bia. Ka'uri ra kale'e. Ra kalua nèti d'ara loko, ka ra'a j'u'u ètu sebhe loko èèna. 3 Nèbhu boe, sapi pidhu ngi'u dhu leo hari, kalua nèti d'ara loko deo na. Ngi'u sapi sèra malaka-god'a. Ra titu padètu dènge sapi kabèb'u sèra. 4 Hèia sapi malaka pidhu ngi'u sèra, dhèle aa'i pidhu sapi dhu kabèb'u sèra. Hèia dhèu aae kabèdhi, ka na marèi dènge.
5 Nèbhu boe ka, dhèu aae bhèj'i luu hari. Ka na nii hari ca tèka. Lii nii na sèmi ne'e ka: nèngu ladhe nèdhi are pidhu huri dhu isi pènu, bhodho nèti laa are dhu sub'u. 6 Èle èèna ka, nèdhi hari are pidhu huri dhu isi aad'o, aa dhu kamale dhae-dhae sène, lèke lai ngèlu dhu pana. 7 Ka pidhu huri are dhu isi aad'o sèra, dhèle aa'i pidhu huri are dhu isi pènu deo sa. Hèia dhèu aae kabèdhi ka nèti bhèj'i. Heka nèngu ne'a kèna, nèngu dhu nii hari di.
8 Mad'ae aae èèna, d'ara isi na be'a boe. Hèia, na paredha dhèu lasi paroa aa'i dhèu ai tadha dènge dhèu d'èlu-mèu, ètu rai Masir mai paraga dènge ne. Ka na lolo lii nii na sèra dènge si. Te ngaa dhèu èci sa bisa boe peka sasoa lii nii deo sa mi dhèu aae.
9 Ka mone dhu lalau dhua èi dhèu aae èèna, heka sanèd'e nèdhi Yusuf kèna. Hèia la'e peka dènge dhèu aae, aku nèngu na, “Ama! Ja'a mangaku sala. 10 Uru èèna, dhu ama ku nasa dènge ja'a, dènge angalai ku èci na, ka pamaso ji'i asa d'ara bèdho, 11 mèda ca lod'o ka, ji'i dua mi nii. Èci-èci ka dènge nii na. Aa sasoa nii se'e, sama boe kahèi. 12 Ètu d'ara bèdho na, abhu ana mone Ibrani èci. Uru èèna, nèngu j'aj'i ènu nèti komedhaa j'aga dhèu aae. Ji'i lolo lii nii ji'i dènge ne, ka na peka sasoa lii nii sèra dènge ji'i. 13 Nèti èèna ka, ama dhèu aae ded'e hari ja'a. Aa angalai ja'a na, abhu huku madhe. Se'e se j'aj'i sama sèmi ngaa dhu ana mone Ibrani na peka.”
14 Nanene nare lii ne'e hèia, dhèu aae pua dhèu lasi lai-lai rare Yusuf nèti d'ara bèdho mai. Ka Yusuf pamèu iisi na, aa na gati mèdha-papake na, ka na la'e paraga dènge dhèu aae. 15 Ropa na d'ai madha hèia, dhèu aae peka, “Ja'a nii, te ngaa dhèu èci sa re'a boe sasoa lii nii sèra. Te ngaa dhèu peka na èu me'a.”
16 Hèia Yusuf dhaa, aku nèngu na, “Ama dhèu aae. Ja'a èèna ka oo, ke'a boe ngaa-ngaa kahèi. Dhoka Ama Lamatua di dhu ne'a, ho Na peka sasoa lii nii sa, dènge lèke. Na neo peka lii dhu be'a mi ama dhèu aae.”
17 Hèia dhèu aae lolo ka, lii nii sèra dènge ne, aku nèngu na, “Ètu d'ara nii èèna, ja'a titu ètu sebhe loko Nil. 18 Ja'a ladhe la'a na sapi pidhu ngi'u dhu kabèb'u bia, dènge ka'uri dhu kale'e. Ra kalua nèti d'ara loko mai, ka ra'a j'u'u ètu sebhe loko èèna. 19 Hèia sapi pidhu ngi'u dhu leo mai hari. Rèngu se'e dhu malaka-god'a. Ètu rai Masir ne'e, ja'a kèdhi mèka sapi dhu malaka-god'a sèmi èèna! 20 Dhu pamalaa ja'a, pidhu sapi dhu malaka-god'a sèra, kabèdhi laa dhèle aa'i pidhu sapi dhu kabèb'u se. 21 Sapi dhu malaka sèra dhèle aa'i, te ngaa ngi'u ra malaka taruu sèmi èèna ka. Hèia ja'a kabèdhi dènge ka.
22 Èle èèna ka, ja'a bhèj'i luu hari, ka nii hari ca tèka. Ja'a kèdhi pidhu huri are dhu isi pènu, kalua nèti laa are ca kapua dhu sub'u. 23 Èle èèna ka, ja'a kèdhi hari, pidhu huri are dhu isi aad'o, aa dhu kamale dhae-dhae, lèke lai ngèlu pana. 24 Ka pidhu huri are dhu bèdhu sèra dhèle aa'i pidhu huri are dhu isi pènu sèra. Èle èèna ka, ja'a kèd'i nèti bhèj'i. Ka ja'a lolo lii nii se'e mi dhèu d'èlu-mèu se'e, te ngaa èci sa bisa boe peka sasoa lii nii sèra.”
25 Hèia Yusuf padhai lii, peka na, “Ama dhèu aae! Lii nii dua sèra, sasoa na dhoka èci di. Ama Lamatua peka le, mi ama dhèu aae, ngaa dhu Na neo tao. 26 Sasoa na sèmi ne'e ka: pidhu sapi dhu kabèb'u, dènge pidhu huri are dhu isi pènu sèra, sasoa na, tèu dhu bècu-manèsa pidhu tèu. Sasoa ra dhoka èci di. 27 Sèmi èèna kahèi, pidhu sapi dhu malaka-god'a, dènge pidhu huri are dhu isi aad'o, sasoa na, tèu manganga pidhu tèu.
28 De Lamatua dhu peka mema le, ngaa dhu Nèngu neo tao. Èèna sama kahèi, dènge ngaa dhu ja'a peka deo na. 29 Ladhe bèli-camèd'a, ètu rai Masir ne'e, d'ara pidhu tèu, èdhi abhu bècu-manèsa palème rae. 30-31 Èle èèna na, heka èdhi abhu manganga d'ara pidhu tèu. D'ara pidhu tèu na, manganga madèu aae. Toke èdhi abhu boe nganga'a calamusi sa, ètu dedha rai Masir ne'e. Dhèu aa'i-aa'i manganga ae titu kèna, ka ra bhèlu eele uru na dhu rèngu abhu le babècu pidhu tèu.
32 De ladhe ama dhèu aae abhu nii dua hari, sasoa na, Ama Lamatua ka dhu ator tèke. Nèbhu heka, ngaa dhu Na ator ne, j'aj'i kèna.
33 Nèti èèna ka, ja'a manèngi sèmi ne'e: be'a risi ama dhèu aae tenge dhèu d'èlu-mèu èci, dhu bisa tao ai-hèb'a la'a dènge be'a. Aa ded'e ne, ho ladhe-leru kabarai ne'e dènge be'a. 34 D'ara pidhu tèu dhu bècu èèna, be'a risi ama dhèu aae ded'e hari dhèu, ho ra oru-pakaboko nganga'a dhu risi eele. Nganga'a dhu risi sèra, bagi mi lèmi ho tèke ca pala. 35 Ana kabarai ne'e, hud'i madhutu dènge be'a paredha ama dhèu aae, ho pakaboko are-are dhu risi eele, nèti rae-rae ètu rai Masir ne'e. Aa ra soli sa d'ara soka ho j'aga paie. 36 Sèna ka pidhu tèu dhu manganga nèi mai te, èdhi dhu sadia le nganga'a. Dènge j'ara sèmi ne'e, èci sa madhe boe manganga.”
Dhèu aae ded'e Yusuf j'aj'i ai g'ana na ètu rai Masir
37 Ropa tadèngi lii padhai lii Yusuf ne, dhèu aae dènge dhèu kapai sèra, sèmi ngaa dhu na peka dènge dhèu aae èèna. 38 Ka dhèu aae padhai lii, peka na, “Roh Ama Lamatua hia le koasa mi Yusuf ne'e. Nèti èèna ka, èdhi abhu heka dhèu dhu risi nèti nèngu.”
39 Èle èèna ka, dhèu aae padhai lii dènge Yusuf, peka na, “Ama Lamatua peka dènge èu, ngaa-ngaa se'e aa'i-aa'i. Nèti sèmi ne'e ka, heka ji'i nge'a kèna èu ne'e tare'a-re'a dhèu mèu. Aa mamèu èu ne, risi eele dhèu ètu mia-mia. 40 Nèti èèna ka, deo ne'e kahèi ja'a ded'e èu j'aj'i ai g'ana ja'a. Sèna ka èu j'aj'i dhèu kapai ètu d'ara èmu ja'a. Aa ana kabarai ja'a nanene lii paredha èu. Dhoka ja'a di dhu risi nèti èu.”
41-42 Èle èèna ka, dhèu aae puru eele kadheli dhu dènge cap nèti ai na, ka na pasaluu mi ai Yusuf. Ka na padhai lii, aku nèngu na, “Dènge ne'e ne, ja'a ded'e èu, j'aj'i ai g'ana ja'a ètu rai Masir.” Hèia na papake kodho madhera dhu milu èci mi Yusuf, aa na pa'inu rate hualaa cakoko mi ladha-goro na.
43 Èle èèna ka, dhèu aae hia hari Yusuf kareta ka dua nèngu. Ka na hia dhèu lasi uuru, ho pa'oo peka na, “We! Patalele j'ara oo! Pahaha iisi mliu!a Dhèu kapai neo re ne'e!” Dènge j'ara ne'e, dhèu aae ded'e le Yusuf, j'aj'i ai g'ana na ètu rai Masir.
44 Hèia dhèu aae padhai lii dènge Yusuf, peka na, “Sèmi ne'e. Èu dhu me'a le ja'a ne dhèu aae. Te ngaa ja'a peka le dènge ana kabarai Masir aa'i-aa'i, peka na, ladhe èu hia boe ijin, rèngu bisa boe tao ngaa èci sa.”
45 Èle ka, dhèu aae pangare Yusuf madhutu ngara Masir, na Safnat Panea. Aa, na hia Yusuf madhèdi dènge ana bhèni èci, ngara na Asnat. Ama dhèu èmu na, ngara na Potifera. Nèngu ne'e ka dhu j'aj'i ama agama ètu d'ara kota On.b Dènge j'ara ne'e, Yusuf j'aj'i dhèu kapai ètu rai Masir.
46 Lod'o na j'aj'i dhèu kapai ètu rai Masir, umur nèngu 30 (tèlu nguru) tèu le. Hèia na kako palème rai Masir. 47 Ètu d'ara pidhu tèu dhu bècu-manèsa ne'e, oka-tedhe pènu dènge nganga'a. 48 Hèia Yusuf kaboko nganga'a dhu risi, ka na tèka paia si. Ètu era mia dhu na pakaboko nganga'a, ètu èèna kahèi na soli asa d'ara soka. 49 Are dhu pakaboko nare, ae titu kèna. Èci èèna ka, dènge salae ètu nebhe dhasi, ka dhèu uku rare heka.
50 D'ai mèka tèu manganga, dhèu èmu Yusuf, Asnat nara iisi le ana mone dhèu dua. 51 Ka Yusuf padhai lii, peka na, “Ama Lamatua tao j'ara ne'e, sèna ka pabhèlu ja'a nèti j'aj'èra dhu lod'o ja'a kalua nèti d'ara èmu ama ku.” Nèti èèna ka, ana uuru, na pangare ne Manase (dhu sasoa na ele boe ‘bhèlu’).
52 Lod'o na abhu ana ka dua, na padhai lii hari, peka na, “Ja'a abhu j'aj'èra ae d'ai seli ètu era ne'e. Te ngaa sasue dènge ladhe-leru Ama Lamatua ka, ja'a abhu ana ètu ne'e.” Ka na pangare ana ne'e Efraim.c
53 Nèbhu boe ka, èle pidhu tèu dhu bècu-manèsa na. 54 Aa pidhu tèu manganga madèu d'ai kèna, sama sèmi dhu uru èèna Yusuf peka le. Ètu era leo, dhèu manganga le. Te ngaa rae-rae ètu Masir nganga'a ae era, lula ra pakaboko rare asa d'ara soka. 55 Te ngaa nèbhu-nèbhu, kabarai Masir manganga kahèi. Ka lasi asa dhèu aae ho ra manèngi nganga'a. Aa dhèu aae pua si lasi asa Yusuf, sèna ka ra madhutu paredha Yusuf.