Yusuf peka sasoa lii nii, nèti ana bèdho dhèu dua
40
1-3 Ètu d'ara bèdho èèna, abhu kahèi dhèu dua, dhu uru na j'aj'i kapala urusan ètu d'ara èmu dhèu aae Masir. Èci lalau dhua èi dhèu aae. Aa èci hari lalau roti dhèu aae. Dua ra tao pasala dhèu aae. Nèti èèna ka, dhèu aae nasa, ka na pamaso si asa d'ara bèdho. Dua ra pea ètu era èci dènge Yusuf. 4 Kapala èmu bèdho na, paredha Yusuf lalau dhèu dua se'e. Ra ètu d'ara bèdho na, ele boe ca tèu do dua tèu le.5 Mèda ca lod'o ka, dua ra nii. Ca dhèu ka dènge nii na. Aa, lii nii dua sèra, èci-èci ka dènge sasoa na. 6 Bèli mad'ae èèna, Yusuf ladhe na dua ra rèhu susa. 7 Ka na karèi si, aku nèngu na, “Nga tao ka mad'ae ne'e, miu dua mi roe-roe?”
8 Hèia ra dhaa, peka na, “Mèda deo na, ji'i nii. Te ngaa ji'i nge'a boe sasoa na samia!”
Hèia Yusuf peka dènge dua ra, aku nèngu na, “Dhèu aa'i-aa'i ètu rai-haha ne'e, èci sa re'a boe sasoa nii, dhodhoka Ama Lamatua di. De miu lolo ku laa. Pe èèna ho ja'a karèi sasoa nèti Lamatua.”
9 Hèia dhèu dhu lalau dhua èi hia dhèu aae èèna, lolo uuru peka na, “Ètu d'ara nii, ja'a ladhe kèdhi aj'u anggor ca kapua. 10 Aj'u anggor ne dadana nèngu tèlu di. Aj'u na muri mai ka dènge rèu, hela, dènge hua giru-gari dhu madhasa. 11 Aa ja'a kèd'u galaa dhu dhèu aae biasa pake ninu. Ja'a puu hua anggor, ka pacèli èi sa d'ara galaa deo na. Hèia kèti asa dhèu aae, hia na ninu.”
12 Tadèngi nare hèia, Yusuf peka dènge ne sèmi ne'e ka, “Ama, ee. Sasoa nii na sèmi ne'e ka: dadana tèlu, sasoa na di tèlu lod'o ka. 13 Ètu d'ara tèlu lod'o ne, dhèu aae kalua eele ama nèti d'ara bèdho ne'e. Ho na hia hari, ama lalau dhua èi hia dhèu aae sèmi uru na. 14 Ladhe ama abhu babe'a sèmi èèna, baku bhèlu ja'a, ee? Ladhe ama sue ja'a, peka dènge dhèu aae kalua eele ja'a nèti era ne'e. 15 Te ja'a ne, madhutu madha j'ara na dhu mola, rèngu se rare ja'a dènge laka-seti, nèti rae dhèu Ibrani. D'ai era ne'e, ja'a tao boe sasala ngaa èci sa. Te ngaa rèngu pamaso ja'a asa d'ara bèdho ne'e. Rèngu tao ja'a sèmi dhèu bhelu-katub'a sa.”
16 Ropa tadèngi nare sasoa nii ne'e be'a mi dedha angalai na, hèia dhèu èci dhu lalau roti na, lolo hari nii nèngu, peka na, “Ari Yusuf. Nii ja'a sèmi ne'e ka: ja'a tèd'u soe pagod'o-god'o tèlu. 17 Ètu d'ara soe re dedha tèka na, pènu dènge koki dhèu aae, dhu rupa ae titu kèna. Te ngaa manu-bhui lela mai ka ra'e aa'i koki d'ara soe dhu ètu kètu ja'a na.”
18 Ropa Yusuf tadèngi nare, ka na dhaa, peka na, “Sasoa lii nii ama, sèmi ne'e ka: soe tèlu sèra, sama kahèi dènge tèlu lod'o. 19 D'ara tèlu lod'o ne, mu ladhe, te dhèu aae pua dhèu mai poro rare kètu èu. Ho èèna na, ra kadhoe ngi'u aae èu ètu agarii. Hèia manu-bhui tutu ra'e aa'i sisi èu.”
20 Ropa d'ai tèlu lod'o, dhu lèke dènge lod'o hari jadi dhèu aae, na tao tatao dhu kapai hia dhèu kapai na aa'i-aa'i sèra. Na paredha ho dhèu lasi kalua eele dhèu dua sèra nèti d'ara bèdho. 21 Ka na hia hari mone dhu lalau dhua èi na, sab'e sasab'a nèngu uru na.
22 Te ngaa dhèu dhu lalau roti dhèu aae èèna, ra poro eele kètu na, ka ra kadhoe ngi'u na, sama sèmi ngaa dhu Yusuf peka dènge rèngu dua ra.
23 Te ngaa mone dhu lalau dhua èi dhèu aae ne, sanèd'e heka Yusuf. Na bhèlu eele lii moa Yusuf.