Yusuf dènge dhèu èmu Potifar
39
1-2 Dhèu Ismael sèra rèti Yusuf d'ai Masir, hèia ra pahie eele ne dènge dhèu kapai èci ètu nèi, ngara na Potifar. Dhèu ne'e komedhaa sordad'u dhu j'aga ètu dhèu aae Masir. Yusuf j'aj'i ènu ètu èmu Potifar. Ètu èèna, LAMATUA dènge Yusuf, ka sasab'a ngaa dhu na tao, nèti babe'a hua-hua. 3 Dhèu kapai ne'e ladhe-ladhe na, sasab'a Yusuf nèti babe'a hua, ka na ngee ètu d'ara na, LAMATUA tare'a-re'a dènge Yusuf. 4 Nèti èèna ka, komedhaa ne'e d'èi Yusuf, ka na lèka ne. Hèia na ded'e ne j'aj'i madho ètu èmu na. Aa, na hia ne paredha d'ara èmu nèngu, sèmi èèna kahèi, mèdha-panyau na aa'i-aa'i. 5 Lula Yusuf pea ètu èèna, ka Lamatua hia mamuri hua iia mi lamatua èmu, dhèu Masir èèna. Isi èmu na, mèdha-panyau na, oka-tedhe na, aa sasab'a-la'a na, j'aj'i dènge be'a. 6 Lula Potifar ladhe-ladhe la'a na Yusuf sab'a dènge be'a, ka na pangee heka ngaa-ngaa, dhoka na'a-ninu di.Yusuf ne, mone iia. 7 Na pea ètu èèna nèbhu mèka. Te ngaa dhèu èmu Potifar na, d'èi Yusuf. Ka na mai pamako ne ho dua ra j'unu pa'èci.
8 Te ngaa Yusuf no'o boe. Ka na peka sèmi ne'e ka, “Baku ina ee! Ja'a ne, ènu Potifar, dhu na pangèd'u le koasa ho ja'a tao ai-hèb'a mi sasab'a nèngu aa'i-aa'i. 9 Ètu d'ara èmu ne'e, abhu boe dhèu èci sa dhu koasa risi nèti ja'a. Aa'i-aa'i dhu ètu d'ara èmu ne'e, na saraka mi kacui-aai ja'a. Dhodhoka ina ku di, aad'o. Tasamia ka, ja'a bisa tao j'ara karehe ne'e. Èèna lèke boe dènge dad'èi Ama Lamatua!”
10 Masi ka sèmi èèna, dhèu èmu Potifar ne pakaseti taruu bèli-bèli. Te ngaa Yusuf ne tao boe madha-dhilu dènge ne.
11 Ca tèka, Yusuf kako la'e asa d'ara èmu, ho sab'a sasab'a nèngu. Lod'o èèna, dhèu leo aad'o èci sa ètu èmu. 12 Ka dhèu èmu Potifar na raga mai ka, na kèpe kodho Yusuf, ka na ère ne, hèia na peka, aku nèngu na, “Mai! Ata dhodhoka èdhi dua ti. De mai ho ti j'unu.”
Te ngaa Yusuf d'èi boe. Ka na parui, hèia kodho na bhoke eele nèti ua na, ka na rai asa li'u. Aa kodho deo na ètu kacui-aai bhèni èèna era.
13 Ropa dhèu èmu Potifar ladhe laa, na, Yusuf rai li'u le la'e, aa kodho na tèke eele, 14-15 hèia na paroa dhèu sab'a sèra, ka na peka, aku nèngu na, “We! Miu mai ladhe ku laa! Deo na, ana mone dhèu Ibrani na, maso sa d'ara kama ja'a. Na neo pamakae ja'a. Malo ka ja'a pa'oo, ka na rai, tèke eele kodho na ètu ja'a ne. Dhèu èmu ja'a ne, nèti dhèu bhelu asa d'ara èmu, ho hia èdhi ta'e makae!”
16 Bhèni na kèpe pa'ère kodho èèna, toke d'ai dhèu èmu na lèpa. 17 Ropa dhèu èmu na nare d'ara èmu, na lolo peka na, “A'a! Dhèu Ibrani dhu mèti mai sa èmu ne'e, deo na maso asa d'ara kama ja'a, neo pakarehe ja'a! 18 Malo ka ja'a pa'oo, paroa ana sab'a se'e. Hèia na rai tèke eele kodho na, ka ne'e.”
19 Tadèngi nare lii lolo dhèu èmu na, Potifar nasa bia. 20 Hèia na paredha ka dhèu lasi kèpe Yusuf. Ka ra pamaso asa d'ara bèdho dhèu aae.
21 Te ngaa LAMATUA bhèlu boe Yusuf. Nèti èèna ka, LAMATUA ladhe-leru ne taruu, ka kapala ètu d'ara bèdho èèna, sue Yusuf ae titu kèna. 22 Na lèka Yusuf, ka hia ne j'aj'i madho ho laladhe ana bèdho sèra aa'i-aa'i ra. Aa, hia na lalau sasab'a ètu èèna kahèi. 23 Lula lèka ne, ka kapala èmu bèdho na, tao heka ai-hèb'a mi ngaa-ngaa ètu d'ara bèdho èèna. LAMATUA ladhe-leru taruu Yusuf, nèti èèna ka, sasab'a ngaa ètu d'ara bèdho na kako dènge be'a.