6 Ropa ana mone uuru, dhu ngara na Er èèna kapai, ka ama na la'e tenge dhèu hia ne. Ngara ana bhèni na Tamar. Ka dua ra j'aj'i paleo èmu. 7 Lula Er ne, bhelu-katub'a, ka Ama Lamatua huku pamadhe ne. Nèti èèna ka, nèngu dènge boe kolo.

8 Hèia Yahuda paroe nare ana mone ka dua na, ka na peka, aku nèngu na, “Onan! A'a mu Er madhe, dènge boe ana. Madhutu ad'a èdhi na, èu hud'i leo hari ku dènge dhèu èmu a'a mu ne. Sèna ka èu bisa hia kolo hia a'a mu.”

9 Mema Onan ne'a le ad'a sèmi ne'e. Te ngaa na no'o boe hia kolo mi a'a na Er. Nèti èèna ka, ladhe rèngu j'unu pa'èci, na pasuti eele hua hini nèngu asa li'u, sèna ka Tamar baku dènge babia. 10 Taga tatao Onan sèmi ne'e ka, Lamatua nasa bia dènge ne. Nèti èèna ka, Lamatua huku pamadhe ne kahèi.

11 Ropa Yahuda nèdhi ana mone na dua sèra dhu leo dènge Tamar madhe sèmi èèna, hèia Yahuda madha'u. Ka na pangee mage dhoka ana mone ka tèlu èèna, leo hari dènge Tamar na madhe kahèi. Nèti èèna ka, la'e peka dènge Tamar, aku nèngu na, “Be'a risi èu lèpa hari asa d'ara adhe-aai ina dènge ama mu. Ladhe ana ja'a Sela kapai, na èu lèpa hari mai ho leo dènge ne.” Hèia Tamar lèpa dènge ka.

12 Nèbhu-nèbhu hèia, dhèu èmu Yahuda madhe. Na j'èra toke d'ai pa'èle lod'o sasusa na.^a Ka na la'e gale nare angalai na Hira, ka lasi asa rae Timna. Ètu èèna, dhèu rame-rame g'ute rèu kahib'i-kalèbho ho pahia.

13 Dhèu lolo dènge Tamar, peka na, “To'o mu la'e leru dhèu g'ute rèu kahib'i-kalèbho ètu rae Timna.”

14 Lod'o èèna, ana limuri Yahuda, ngara na Sela, kapai le. Te ngaa Tamar ne'a le, na, to'o na no'o boe paleo Sela dènge ne. Nèti èèna ka, Tamar tenge j'ara neo katèju hak nèngu. Na bhoke eele mèdha-papake bhèni balu ètu ngi'u na, ka na silu mèdha-papake dhu be'a. Na pake salalu pahutu kètu dènge rèhu na. Ka la'e madhèdi ètu hèb'a tedhe sebhe j'ara rae Enaim, dhu biasa dhèu kako re èèna lasi rae Timna. 15 Ropa Yahuda kako re èèna, na ladhe nèdhi dhèu bhèni èci madhèdi ètu èèna. Na neo laa na dhèu bhèni kajeo, te Tamar dhu lalau iisi dènge mèdha-papake saraga, aa pahutu rèhu na kahèi. 16 Yahuda ne'a nare boe na dhèu bhèni na, dhèu èmu ana na dhu madhe sèra. Hèia na kako la'e padètu dènge bhèni deo na ka, na peka dènge ne, aku nèngu na, “Ee! Sèmi ja'a dènge èu na, èu manèngi ca ngaa?”

Hèia Tamar dhaa, aku nèngu na, “Èèna nèti d'ara d'èi ama.”

17 Aku Yahuda na, “Sa mia! Sèmi ja'a hia èu kahib'i ci'u?”

Hèia Tamar dhaa hari, aku nèngu na, “Bisa ama. Sad'i ama hia ku ja'a mèdha èci ho ja'a kèd'u. Pe pèri lod'o ho ama pa'adhu kahib'i èèna mai oo, ngaa-ngaa tao boe.”

18-19 Hèia Yahuda karèi hari, aku nèngu na, “De ja'a tèka mèdha ngaa mi èu?”

Tamar dhaa, aku nèngu na, “Ama tèke eele cap, dènge dhari dhu ama inu, dènge tatea dhu ama kèpe èèna hèi.” Nanene nare ka, Yahuda hia mèdha sèra la'e.

Hèia dua ra lasi bhèj'i ka. Èle èèna ka, Tamar lèpa la'e èmu. D'ai èmu ka, na bhoke mèdha-papake saraga dènge salalu, ka gati dènge mèdha-papake bhèni balu. Nèti èèna ka, Tamar dènge babia.

20 Nèbhu boe hèia, Yahuda manèngi tolong angalai na Hira, aku nèngu na, “Èu mèti kahib'i ne'e hia dhèu bhèni kajeo dhu ètu Enaim èèna, ho mèti hari mèdha ja'a dhu ètu nèngu sèra.” Lod'o Hira la'e d'ai nèi, na karèi palème, te ngaa paraga boe dènge bhèni èèna. 21 Ka na karèi dhèu-dhèu ètu sèra, aku nèngu na, “Eee! Miu mèdhi dhèu bhèni kajeo dhu biasa madhèdi ètu hèb'a tedhe èèna, do? Na ètu mia, ee?”

Dhèu sèra dhaa, aku rèngu na, “Ama, ètu ne'e bhèni kajeo aad'o!”

22 Hèia Hira lèpa hari peka dènge Yahuda, aku nèngu na, “Ja'a paraga boe dènge bhèni èèna. Ja'a tenge palème, te ngaa dhèu ètu sèra peka aku rèngu na, ètu rae èèna bhèni kajeo aad'o.”

23 Yahuda dhaa, aku nèngu na, “Hud'i ka la, nèngu abhu mèdha sèra! Sad'i dhèu baku pamakae èdhi! Ja'a neo b'ae, te ngaa èdhi paraga boe dènge bhèni èèna na.”

24 Ropa d'ai tèlu hèru hèia, dhèu lasi lolo dènge Yahuda, peka na, “Dhèu èmu ana èu na tao ngi'u na sèmi dhèu bhèni kajeo. Ka na dènge babia le.”

Nanene nare èèna hèia, Yahuda nasa bia. Hèia na pua dhèu, aku nèngu na, “Lami nuni pa'oro ne mai, ho labhu asa d'ara ai la'e!”

25 Ka dhèu lasi ka nuni rèti Tamar mai. Te ngaa na pad'elo cap dènge tatea èèna. Ka na pua dhèu lasi peka dènge to'o na, aku nèngu na, “Parisa ku mèdha se'e. Dhèu dhu unu cap dènge tatea ne'e ka dhu ad'u-ue tatao ne'e, ka ja'a dènge babia ne.”

26 Ropa nèdhi mèdha se'e, Yahuda tadhe dènge, na mèdha sèra unu nèngu. Hèia na padhai lii dènge ka, aku nèngu na, “Mema dhèu bhèni ne'e sala boe. Ja'a ka dhu sala. Madhutu iia na, ja'a ka dhu paleo bhèni ne'e dènge ana ja'a Sela. Te ngaa ja'a ka ko'o boe.” Karèi nèti èèna ka, Yahuda pa'èci heka dènge Tamar.

27 D'ai hèru ka Tamar nara iisi ana dhèu dua. 28 Lod'o Tamar nara iisi na, kabèdhi laa ana èci pacèu uuru kacui-aai èci sa li'u mai. Ka dhèu ai tadha dhu panara iisi na nare loa hèngu mea, ka èki mi kanau riti na. Bhèni na peka, aku nèngu na, “Ana uuru ka ne'e.” 29 Te ngaa ana èèna ère hari kacui-aai na sa d'ara. Hèia, ana èci na kalua uuru hari. Nèdhi sèmi èèna hèia, bhèni ai tadha èèna peka, aku nèngu na, “Waa! Èu èra titu kèna! Nèti èèna ka, èu paseti ho kalua uuru sa li'u.” Bhèni na pangare ne, Peres, (dhu sasoa na, ‘paseti sa li'u’). 30 Èle èèna ka, dhu èki dènge loa hèngu mea deo na kalua. Ra pangare ne Sera (sasoa na ‘mea gèu-gèu’).