2b Tèu èèna, ana Yakob èci, nèti dhèu èmu na Rahel, ngara na Yusuf. Yusuf ne'e, ropa umur na d'ai 17 (canguru pidhu) tèu, nèngu dènge a'a na si, tema le j'aga kahib'i-kalèbho rèngu. A'a na sèra, ana nèti ina leo hari, ngara na Bilha dènge Silpa. Te ngaa Yusuf ne'e tuka tenge lii mi dedha a'a na si, ho la'e pana'e ama na.

3 Lod'o dhu rara iisi Yusuf na, ama na dhu heka le. Nèti èèna ka, na sue Yusuf ne risi eele nèti ana-ana na leo sèra. Ca lod'o ka, Yakob j'au kodho madhera èci dhu saraga bia^a hia Yusuf. 4 Ropa a'a na si ladhe-ladhe la'a na ama na sue risi Yusuf, hèia ra mulai tèka d'ara dènge ne, ro'o boe padhai lii dènge ne.

5-7 Mèda ca lod'o ka Yusuf nii. Kèd'i nèti bhèj'i ka, na lolo dènge a'a na si lii nii deo na, aku nèngu na, “We! Mi nanene ku la! Ja'a nii, na èdhi aa'i-aa'i ti, èki are ètu d'ara oka. Kabèdhi laa, are dhu ja'a èki titu dhoo-dhoo. Te ngaa are miu, oke mere are ja'a deo na, ka pacud'u mi unu ja'a.” Ra nanene rare sèmi èèna, hèia a'a na se'e tabha nasa hari dènge ne.

8 Hèia ra jèke ne, aku rèngu na, “We! Èu ngee na, èu neo j'aj'i dhèu kapai kèna, ho neo paredha ji'i, do?” Taga na lolo lii nii ne'e, hèia asa ra nasa dènge ne.

9 Nèbhu boe, Yusuf nii hari ca tèka. Na lolo hari dènge a'a na si, aku nèngu na, “We! Ja'a nii hari, sèmi ne'e ka. Ja'a kèdhi madha lod'o, hèru, dènge hua-hètu canguru èci. Aa'i-aa'i sèra, pahaha iisi mi ja'a.” 10 Hèia Yusuf lolo hari lii nii deo na dènge ama na, aa dènge a'a na sèra.

Ka ama na jèke ne, aku nèngu na, “Lii nii ngaa, kèna! Èu ngee na, ja'a dènge ina mu, dènge a'ari èu sèra, mai uu kabaj'èla èu, do? Èu nia ae le èèna, nga!” 11 Nèti èèna ka, a'a na sèra tèka d'ara bia dènge ne. Te ngaa ama na pangee taruu lii nii èèna ètu d'ara na.

12 Ca tèka ka, a'a Yusuf sèra rèti kahib'i-kalèbho ama na, asa era j'u'u dètu dènge rae Sikem. 13 Nèbhu boe ka, ama na peka dènge Yusuf, aku nèngu na, “A'a mu si j'aga kahib'i-kalèbho dètu dènge Sikem. De èu pa'èra, ho lamu ladhe ku si la.”

Ka Yusuf dhaa, aku nèngu na, “Ja'a laku, ama.”

14 Hèia ama na peka hari, aku nèngu na, “Èu lamu ladhe a'a mu si, dènge kahib'i-kalèbho èdhi. Ladhe ra samia na, mai peka dènge ja'a.”

Ka Yusuf pakèd'i ka nèti d'ara pad'a Hebron, la'e taruu d'ai Sikem. 15 D'ai nèi, na tenge a'a na si, palème d'ara pad'a èèna. Na paraga dènge dhèu mone èci, ka dhèu èèna karèi ne, aku nèngu na, “Èu tenge ngaa?”

16 Yusuf dhaa, aku nèngu na, “Ja'a tenge a'a ja'a. Rèngu eo kahib'i-kalèbho dètu ètu era ne'e. De ama, èu paraga dènge si, do aad'o?”

17 Hèia, dhèu deo na peka, aku nèngu na, “Ra aad'o heka ètu ne'e. Te ja'a tadèngi, ra peka na lasi padètu dènge rae Dotan.”

Hèia Yusuf la'e taruu, ka paraga dènge si ètu rae Dotan. 18 Ropa ladhe rèdhi Yusuf nèti kaj'èu, ra padhue rare lii èci neo pamadhe ne. 19 Èci peka dènge èci, aku rèngu na, “Miu ladhe ku la! Mone eele tuka nii na, nuka mai nèi! 20 De mai ho ti pamadhe ne. Ho èèna na, ti core eele ne asa d'ara madha èi madhe èèna. Ladhe d'ai èmu na, ti peka dènge ama peka na, badha hui ra'e ne. Ho èèna na, ti ladhe sèku, lii nii na sèra sa mia!”

21 Ropa nanene èèna, hèia a'a na Ruben tenge j'ara ho patabuli eele Yusuf. Hèia na kai ari na si, aku nèngu na, “We! Èdhi baku pamadhe ne! 22 Be'a risi èdhi kèpe ne, ti tao asa d'ara madha èi madhe nèi. Ètu èèna, era dhu dhèu aad'o, de èci sa rèdhi boe ne. Sad'i baku pasuti raa na.” Na peka sèmi èèna, lula na tenge j'ara ho patalale Yusuf, ho hia na lèpa hari èmu.

23 Ropa Yusuf d'ai madha a'a na si, ra kèpe ne, ka ra rèbhi eele kodho dhu saraga aae ètu ua na. 24 Ka ra nuni pa'oro ne, hèia ra tule ne asa d'ara madha èi madhe èèna.

25 Èle èèna ka, ra lèpa, lasi ra'a-rinu. Ètu talora ra'a-rinu, kabèdhi la ra ladhe rèdhi dhèu canau mai re èèna. Dhèu sèra kako rèti dènge badha onta ra, hue dènge mèdha d'aga, sèmi raa aj'u hèu mèngi, bubhu-bubhu dènge èi na'i rupa-rupa. Dhèu sèra sa, dhèu Ismael, dhu mai nèti rae Gilead neo lasi kaj'èu d'ai Masir.

26 Èle èèna hèia, Yahuda peka dènge a'ari na sèra, aku nèngu na, “Ee! Be'a risi sèmi ne'e. Èdhi baku pamadhe ne. A'oto na ngaa? Tasa mera mia èèna ka, èdhi bisa boe pahuni raa na. 27 Be'a risi èdhi pahie ne dènge dhèu Ismael sèi. Èdhi tao ne samia èèna ka oo, nèngu ne'e ari d'èlu èdhi. Nèti èèna ka, baku èdhi pamadhe ne!” Aa'i-aa'i ra d'èi kahèi dènge lii Yahuda èèna.

28 Ropa dhèu d'aga sèra^b d'ai era èèna, hèia a'a Yusuf sèra lasi ère rare ne, nèti d'ara madha èi madhe deo na. Ka ra pahie ne mi dhèu Ismael sèra dènge kab'ua 20 (dua nguru) bua doi pudhi.^c Ka dhèu Ismael sèra rèti Yusuf asa rai Masir.

29 Lod'o ra pahie Yusuf ne, Ruben ne'a boe. Ropa na la'e patigi sa d'ara madha èi madhe na, capa na kabèdhi, ladhe la'a na Yusuf aad'o heka ètu d'ara. Nèti èèna ka, na ciu pamae kodho ètu ngi'u na, lula d'ara na pèd'a ae titu kèna. 30 Hèia na la'e sa ari na si, ka na peka, aku nèngu na, “Ira ii! Ari èdhi aad'o heka ètu era èèna! Ja'a tao samia hari?”

31 Hèia ra roro kahib'i ci'u, ka rare kodho Yusuf dhu saraga aae èèna, cèb'u sa d'ara raa kahib'i deo na. 32 Hèia ra lèpa ka rèti dènge kodho deo na, pad'elo dènge ama na, ka ra peka, aku rèngu na, “Ama! Ji'i pili ngare kodho ne'e. Ama ku ladhe sèku la. Tao-tao ne'e kodho ari ji'i Yusuf.”

33 Ropa nèdhi kodho deo na, Yakob tadhe dènge. Hèia na peka, aku nèngu na, “Ira ii! Ne'e kodho ana ja'a. Èle boe badha hui ra'e ana ja'a. Ira iiii! Ana ja'a madhe le!”

34 Nèti èèna ka, Yakob ciu pamae kodho ètu ngi'u na, ka na pake karo, taga nèti d'ara na susa titu kèna.^d Na tangi lii ooi-ooi sène nare lod'o nèbhu aae. 35 Ana na, ana mone dènge ana bhèni sèra aa'i-aa'i ra, mai padhai lii pakarej'e d'ara ama ra, te ngaa tao rare boe ne. Aku nèngu na, “Aad'o! Sasusa ja'a ne bisa d'ai madhe kèti. Te ja'a bisa boe bhèlu ana èci ne'e.” Mema d'ara Yakob j'èra taruu, lula na ngee nèdhi ana na Yusuf dhu madhe èèna.

36 Lod'o-lod'o dhu Yakob ètu d'ara susa era, dhèu d'aga sèra^e d'ai le Masir. D'ai nèi, ka lasi pahie eele Yusuf dènge dhèu kapai èci ètu nèi, ngara na Potifar. Dhèu ne'e komedhaa j'aga nèti dhèu aae Masir.