Ana-èpu nèti Esau
36
Ne'e ne, ana-èpu Esau. Ngara Esau dhu leo, Edom. 2 Esau leo dènge ana bhèni Kana'an dhèu dua. Èci dhèu Het, ana bhèni nèti Elon, ngara na Ada. Dhèu èmu na èci hari, dhèu Hewi, ngara na Oholibama. Ama na, ngara na Anah, aa baki na Sibeon. 3 Esau leo kahèi dènge ana Ismael, ngara na Basmat. Ana mone Basmat, ngara na Nebayot.4 Ada, dhèu èmu uuru Esau, nara iisi Elifas. Basmat matana Rahuel. 5 Aa Oholibama matana Yeus, Yalam dènge Kora. Ana Esau aa'i-aa'i ra sèra rara iisi si ètu rai Kana'an.
6 Ca tèka, Esau pidha asa rai leo cue dhu kaj'èu nèti Yakob. La'e nèti aa'i bhèni-ana niki, dhèu-dhèu sab'a, badha-manu, dènge mèdha-panyau na. 7 Esau pacèri dènge Yakob, lula badha-manu ra dènge mèdha-panyau ra ae d'ai seli. Nèti èèna ka, era pea rèngu katata ètu rai èèna. 8 Hèia Esau (nuka Edom) la'e pea ètu ledhe ètu Seir.
9 Se'e se, ana-èpu Esau dhu ra peka na ‘dhèu Edom’. Rèngu pea ètu era ledhe Seir.
10-13 Ada, dhèu èmu Esau, nara iisi ana mone ca dhèu, ngara na Elifas. Elifas ne, ana mone na, dhèu lèmi, nuka: Teman, Omar, Sefo, Gatam dènge Kenas. Dhèu èmu piara Elifas, ngara na Timna. Nara iisi ana mone ca dhèu, ngara na Amalek.
Dhèu èmu Esau, Basmat, nara iisi ana mone ca dhèu, ngara na Rehuel. Rehuel abhu ana mone dhèu èpa, nuka: Nahat, Sera, Syama, dènge Misa.
14 Dhèu èmu Esau, Oholibama, ana nèti Anah, aa èpu nèti Sibeon, nara iisi ana mone dhèu tèlu, nuka: Yeus, Yalam, dènge Kora.
15-16 Ana-èpu Esau se pahag'a lème, ka j'aj'i mi suku ae-ae. Èci-èci ka dènge kapala suku ra. Ana-ana Elifas, dhu ana uuru nèti Esau, j'aj'i kapala suku nèti suku Teman, suku Omar, suku Sefo, suku Kenas, suku Kora, suku Gatam dènge suku Amalek. Rèngu aa'i-aa'i se'e, ana-èpu nèti Esau dènge dhèu èmu na Ada.
17 Ana-ana Rehuel, dhu ana nèti Esau, j'aj'i kapala suku nèti suku Nahat, suku Sera, suku Syama, dènge suku Misa. Aa'i-aa'i se, ana-èpu Esau dènge dhèu èmu na, Basmat.
18 Ana-ana nèti Esau dènge dhèu èmu na, Oholibama, j'aj'i kapala suku nèti suku Yeus, suku Yalam, dènge suku Kora.
19 Suku se'e aa'i-aa'i ra nèti ana-èpu Esau.
Ana-èpu Seir
20-21 Ètu era èèna, abhu dhèu Hori èci, ngara na Seir. Ana-ana na pahag'a palème rai, ka j'aj'i suku ae-ae. Èci-èci ka dènge kapala suku na. Èle èèna ka, ana-ana na se j'aj'i kapala suku nèti suku Lotan, suku Sobal, suku Sibeon, suku Anah, suku Dison, suku Eser, dènge suku Disan.
22 Ana Lotan nuka: Hori dènge Heman. (Ana hèni Lotan, nuka Timna.)
23 Ana-ana Sobal, nuka: Alwan, Manahat, Ebal, Sefo, dènge Onam.
24 Ana-ana nèti Sibeon, nuka: Aya, dènge Anah. Anah ne'e ka dhu rage madha èi pana ètu d'ara mamoo, lod'o na madhenga keled'ei ama na.
25-26 Ana bhèni nèti Anah, nuka Oholibama. Aa ana mone na, nuka, Dison. Ana-ana Dison, nuka: Hemdan, Esban, Yitran, dènge Keran.
27 Ana-ana Eser, nuka: Bilhan, Saawan, dènge Akan.
28 Ana-ana Disan, nuka: Us, dènge Aran.
29-30 De kapala-kapala suku nèti dhèu Hori sèra, nuka: Lotan, Sobal, Sibeon, Anah, Dison, Eser, dènge Disan. Rèngu aa'i-aa'i se pea ètu rai Seir.
Dhèu aae-dhèu aae Edom
31 Lod'o dhu kabarai Isra'el dènge mèka dhèu aae, te ngaa ètu rai Edom dènge le dhèu aae. Ngara dhèu aae se, dhutu-dhutu, nuka:
32 Ra ded'e Bela, ana nèti Beor, j'aj'i dhèu aae ètu kota Dinhaba.
33 Ropa Bela madhe, ra ded'e Yobab ho gati ne, j'aj'i dhèu aae. Ama na, ngara na Sera, nèti rae Bosra.
34 Ropa Yobab madhe, ra ded'e Husam ho gati na, j'aj'i dhèu aae. Husam ne, nèti rai dhèu Teman.
35 Ropa Husam madhe, ra ded'e Hadad ho gati na, j'aj'i dhèu aae. Ama na, ngara na Bedad, nèti rae Awit. (Nèngu ka dhu segi dhèu Midian, lod'o ra pamusu ètu Moab.)
36 Ropa Hadad madhe, ra ded'e Samla ho gati na, j'aj'i dhèu aae. Nèngu ne, nèti rae Masreka.
37 Ropa Samla madhe, ra ded'e Saul ho gati na, j'aj'i dhèu aae. Saul èèna, nèti rae Rehobot, dhu ètu sebhe loko.
38 Ropa Saul madhe, ra ded'e Baal-Hanan ho gati na, j'aj'i dhèu aae. Ama na, ngara na Akbor.
39 Ropa Baal-Hanan madhe, ra ded'e Hadar ho gati na, j'aj'i dhèu aae. Hadar ne, nèti rae Pau. Aa dhèu èmu na, ngara Mehetabel. Ama Mehetabel, ngara na Matret. Aa baki na, Mesahab.
40-43 De kapala-kapala suku dhu j'aj'i nèti ana-èpu Esau, nuka: Timna, Alwa, Yetet, Oholibama, Ela, Pinon, Kenas, Teman, Mibsar, Magdiel, dènge Iram. Rèngu se èci-èci pangare rai ra madhutu ngara rèngu unu ra.
De aa'i-aa'i se'e, lii lolo nèti ana-èpu Esau, dhèu Edom èèna.