Yakob si rai asa Betel
35
Èle èèna ka, Ama Lamatua padhai lii dènge Yakob, peka na, “Ja'a ne, Ama Lamatua dhu pad'elo iisi mi èu, lod'o èu rai nèti madha a'a mu Esau. Kèd'i, lamu dènge ka asa Betel. Ladhe d'ai nèi, mu patitu mei korban hia Ja'a. Aa pea dènge ka ètu èèna.”2-3 Ka Yakob peka dènge isi èmu na aa'i-aa'i, aku nèngu na, “Aa'i-aa'i ti lati dènge ka asa Betel. Uru èèna, lod'o ja'a ètu d'ara j'aj'èra, Ama Lamatua ka dhu ladhe-leru ja'a ètu èèna. Ja'a neo tao mei korban ètu nèi. De mi core eele mèdha sogo-tagu miu. Aa mi pamèu iisi mi, ho mi gati mèdha-papake leo, te èdhi neo pahaha iisi mi Ama Lamatua.” 4 Ka ra oru mèdha sogo-tagu, dènge ate-atea ra aa'i-aa'i ra. Hèia Yakob dhènu mèdha se aa'i-aa'i ra ètu kapua aj'u aae ca kapua dhu padètu dènge rae Sikem. 5 Ropa Yakob dènge dhèu na aa'i-aa'i pakèd'i nèti Sikem, Ama Lamatua hia d'ara madha'u mi dhèu-dhèu dhu pea ètu d'ara rae-rae dhu padètu dènge rae Sikem, ka ra bani boe tao karehe mi Yakob si.
6 Ka Yakob si d'ai dènge sod'a ètu Betel (dhu uru èèna, ngara na Lus), ètu rai Kana'an. 7 Ètu ne'e, Yakob pudhi hadhu, tao mei korban. Ka na pangare era ne, El Betel, (sasoa na ‘Betel unu Ama Lamatua’), lula uru èèna Ama Lamatua pad'elo iisi mi Yakob ètu era èèna, lod'o nèngu rai nèti madha a'a na.
8 Padètu dènge rae Betel, abhu aj'u aae ca kapua, ngara na Alon Bakut. Sasoa na ‘aj'u tangi dhèu madhe’. Pake ngara ne, lod'o Debora, ina dhu lalau-lalo'o Ribka, madhe, ka padhane ètu karasa aj'u èèna.
9 Lod'o Yakob lèpa nèti Padan Aram, Ama Lamatua pad'elo hari iisi Na, ka hia na berkat. 10 Hèia Lamatua peka dènge ne, “Nèti deo ne'e ne, èu ngara heka Yakob, te ngaa Isra'el.b 11 Ja'a ne, Ama Lamatua dhu Koasa Risi Eele. De èu matana pa'ae-ae, aa ana-èpu èu sèmi èèna kahèi. Bèli-camèd'a, suku-suku mai nèti ana-èpu èu. Aa nèti ana-èpu èu sèra, cèu dhèu aae-dhèu aae. 12 Rai dhu pangèd'u mi baki mu Abraham, dènge ama mu Isak, Ja'a hia mi èu dènge ana-èpu èu.”
13-14 Lod'o Ama Lamatua peka nare, Yakob patitu dènge hadhu ètu era èèna, sèna ka j'aj'i mi tadha ho na baku bhèlu eele lii Lamatua. Ka na bhori èi anggor dènge èi mènyi mi dedha hadhu na, hèia na mangaj'i mi Lamatua. 15 Era èèna, na pangare ‘Betel’.
Rahel madhe nara iisi
16 Èle èèna ka, Yakob si pakèd'i nèti Betel. Ropa rèngu kaj'èu èèna mèka nèti rae Efrata (nuka Betlehem èèna), Rahel dhu d'ai le lod'o nara iisi na. Te ngaa nara iisi carui, hèia na roe titu kèna. 17 Ka ropa na pèngu stenga madhe, dhèu ai tadha peka dènge ne, “Pa'èra d'ara èu, te mora iisi hari ana mone ca dhèu! De baku paroe iisi.” 18 Lod'o Rahel oe ma'ète a'ae, na pangare ana ne, Ben-Oni, (dhu sasoa na ‘ana nèti j'aj'èra ja'a’). Ka heka na madhe kèna. Te ngaa Yakob hia ana ne ngara Benyamin, (dhu sasoa na ‘ana ai g'ana’).
19 Ka ra padhane Rahel ètu sebhe j'ara dhu la'e asa Efrata, (dhu limuri ne, ngara na Betlehem). 20 Hèia Yakob pudhi lutu bhatu ètu ro'a dhèu èmu na èèna. D'ai sange ne'e, ro'a Rahel ne era.
Ana-ana Yakob
21 Èle èèna ka, Yakobc pea boe mi ca era sa. Ca tèka, na patitu paleo ètu sebhe manara Eder. 22 Lod'o rèngu ètu era èèna, Ruben j'unu dènge Bilha, dhèu èmu piara ama na. Èèna ka, Yakob ne'a j'ara ne'e kahèi.
Ana mone Yakob, canguru dua dhèu.
23 Ana-ana nèti Lea, nuka: Ruben (ana uuru Yakob), Simeon, Lewi, Yahuda, Isaskar, dènge Sebulon.
24 Ana-ana Rahel, nuka: Yusuf dènge Benyamin.
25 Ana-ana nèti Bilha, ènu Rahel: Dan dènge Naftali.
26 Aa ana-ana nèti Silpa, ènu Lea, nuka: Gad dènge Aser.
Rara iisi ana se ètu Padan Aram.
Isak, ama Yakob madhe