5 Tatao Sikem ne, Yakob dhu tadèngi le, te ngaa na mau-mau, aa tao boe ngaa-ngaa. Te lod'o èèna, ana mone na sèra, ètu d'ara pad'a madhenge badha rèngu. Ka na mate si mai ku.

6 Lod'o èèna, Hemor, ama Sikem, mai padhai lii dènge Yakob, ho neo karèi Dina hia Sikem. 7 Ètu talora dua ra padhue-padhai era, ana-ana Yakob lèpa nèti d'ara pad'a. Ropa ra tadèngi Sikem dhu tao pakarehe le ana hèni ra, ka d'ara ra pèd'a, ka ra nasa bia. Ka ra peka, “Madha j'ara dhu sèmi ne'e ne, lèke boe ètu Isra'el. De ji'i se sèmi boe dhèu tao bhelu-katub'a sèmi èèna.”

8 Ka Hemor pamako Yakob, aku nèngu na, “Ana ja'a Sikem d'èi tare'a-re'a ana èu Dina. De ja'a manèngi d'ara èu, sèna ka mo'o la, paleo ana bhèni èu dènge ne. 9 Ladhe mo'o ana-ana èdhi se paleo iisi-aanga ra. Ana-ana mone nèti miu, madhèdi dènge ana-ana bhèni nèti ji'i. Sèmi èèna kahèi, ana-ana mone ji'i madhèdi dènge ana-ana bhèni miu. 10 Sèna ka èdhi pea pa'oru pa'èci ètu d'ara rai ne'e. Sad'i miu d'èi era mia èèna ka, mi pea la dènge boe ngaa-ngaa. Mi d'aga, sèna ka abhu kakaja ètu ne'e.”

11-12 Hèia Sikem peka dènge ama Dina dènge a'a na sèra, peka na, “Miu se, sad'i manèngi ngaa, ja'a dhoka madhutu di. Masi ka miu manèngi doi pamèu madha, dènge kab'ua pèri-pèri èèna ka, ja'a hia. Sad'i mo'o ja'a leo dènge ana hèni miu.”

13 Te ngaa ana-ana Yakob se re'a le, Sikem dhu tao pakarehe ana hèni ra Dina. Hèia ra karihu-kahadhu, ka ra bèle, peka mi Sikem dènge ama na Hemor, 14 aku rèngu na, “Ji'i bisa boe hia ana hèni ji'i leo dènge dhèu dhu suna boe. Te èèna na, era makae ji'i èèna! 15 Te ngaa j'ara na sèmi ne'e: Miu se, hud'i sama ku sèmi ji'i, mone aa'i-aa'i ra, ana iiki, dhèu kapai, hud'i suna ku. 16 Ladhe miu madhutu j'ara ne'e, èdhi heka paleo kèna. Aa ji'i pea ètu rai ne'e hèi, sèna ka èdhi j'aj'i mi èci. 17 Te ngaa ladhe miu madhutu boe dad'èi ji'i, aa mo'o boe suna, ji'i ngare hari ana hèni ji'i, ho kèd'i eele rai ne'e.”

18 Hèia Hemor dènge ana na Sikem ro'o kahèi. 19 Te ngaa Sikem no'o heka mate, lula d'ara na d'èi ae Dina. Dhèu isi rai ètu èèna pakab'ua Sikem ne titu kèna. 20 Ka Hemor dènge Sikem lasi asa era pama'ète lii, ètu hèb'a tedhe rae èèna, hèia ra padhue lii ne dènge kabarai sèra. Ra peka, aku rèngu na, 21 “A'ari aa'i-aa'i! Dhèu Isra'el se, d'èi mamuri mera-milu dènge èdhi. De hud'i laa ta pea pa'èci dènge rèngu ètu dedha-rai ne'e. Rai ne taleo, de èdhi bisa pea pa'èci aa'i-aa'i ti. Èdhi se bisa leo dènge ana bhèni rèngu. Aa rèngu bisa madhèdi dènge ana bhèni èdhi kahèi. 22 Lii manèngi rèngu dhoka èci di, nèti èdhi se. Ra manèngi, èdhi mone se aa'i-aa'i hud'i suna ku, madhutu ad'a rèngu. 23 Ladhe èdhi se pab'ali le dènge rèngu, èèna na badha-manu dènge mèdha-panyau ra j'aj'i unu èdhi. De be'a risi èdhi to'o la madhutu dad'èi ra. Mai sèna ka aa'i-aa'i ti suna! Mo'o, sina ma?”

24 Ka dhèu aa'i-aa'i ètu sèra sa, sèmi lii padhai lii Hemor dènge ana na Sikem. Hèia dhèu mone aa'i-aa'i ètu rai èèna suna palere-lere.

25 D'ara lod'o ka tèlu, ropa rèngu dhu suna se, nu'a ra dhu pèd'a era, ka ana mone Dina, Simeon dènge Lewi, rare samala ra, kako mau-mau, lasi asa d'ara kota. Ka dua ra pare pamadhe aa'i-aa'i dhèu mone sèra. 26 Hemor dènge Sikem, ra pare pamadhe kahèi. Hèia ra rèti dènge ka Dina nèti d'ara èmu Sikem, lèpa èmu rèngu.

27 Aa ana Yakob dhu cahag'e sèra, maso asa d'ara kota èèna, ra parama rèti aa'i mèu-mèu isi kabarai èèna. Ra nasa, lula dhèu tao pakarehe ana hèni ra ètu èèna. 28 Ra parama rèti mèdha-panyau dhèu nèti d'ara èmu ra, dènge eo rèti badha-manu aa'i-aa'i ètu d'ara pad'a. 29 Rèti aa'i bhèni dènge ana-ana, aa parame rare aa'i mèdha dhu kab'ua nèti kabarai ne.

30 Ropa Yakob ne'a j'ara dhu j'aj'i èèna, na peka dènge Simeon dènge Lewi, “Miu dua mi se, goa ngaa ka ne'e? Miu paj'èra ja'a! Èèna na, dhèu Kana'an dènge dhèu Peris dènge dhèu aa'i-aa'i ra ètu dedha rai ne'e, tèka d'ara dènge èdhi se. Rèngu se, dhèu ae-ae. Te ngaa èdhi se, dhèu ciki di. Ladhe rèngu se mai age èdhi, na, ra palaho aa'i èdhi.”

31 Te ngaa ana se dhaa dènge lii nasa, peka na, “Ama! Ama pangee na hud'i laa ji'i soro tèke si, sèna ka ra tao ana hèni ji'i ne, bhèni kajeo!”