4 Te ngaa lod'o Esau ladhe nèdhi ari na, rai dènge ka, la'e liku nare Yakob. Dua ra paliku dènge pa'uu. Hèia dua ra tangi d'ara pèd'a. 5 Ropa Esau nèdhi bhèni dènge ana-ana si, ka na karèi, aku nèngu na, “Se'e se, cee ka se'e?”

Ka Yakob peka, “Rèngu se'e se, dhu Ama Lamatua pala-bagi hia ja'a, ènu a'a ku ne.”

6 Hèia dhèu èmu piara na, dènge ana niki ra lasi pahaha iisi ètu madha Esau. 7 Èle ka, Lea dènge ana-ana na, lasi pahaha iisi mi Esau kahèi. Dhu lasi limuri, Yusuf dènge ina na Rahel lasi pahaha iisi mi Esau kahèi.

8 Èle èèna ka, Esau karèi, aku nèngu na, “Èu pa'adhu badha pèri nau sèi, èu neo tao ngaa?”

Hèia Yakob dhaa, aku nèngu na, “Sèmi ne'e, a'a! Ja'a hia mi a'a ku, sèna ka a'a ku sèmi ja'a dènge d'ara taleo.”

9 Te ngaa Esau peka, “Ja'a dènge mèdha-panyau ae kahèi. De hia ia ka ja'a ngaa-ngaa.”

10 Te ngaa Yakob b'ala, peka na, “Baku, a'a. A'a ku hud'i sèmi la mèdha se, sèna ka j'aj'i mi tadha, peka na, a'a ku sèmi ja'a dènge d'ara taleo. Te ropa a'a ku b'ui mari, ka ja'a sèmi dhu kèdhi b'ui mari nèti Ama Lamatua. 11 De ja'a manèngi, a'a ku sèmi la mèdha-panyau dhu kab'ua aad'o se. Lula Ama Lamatua be'a titu kèna dènge ja'a ne. Nèti èèna ka, Na hia ja'a unu ngaa-ngaa se aa'i-aa'i.” Lula Yakob pamako taruu, no'o do no'o boe èèna ka, Esau sèmi nare kahèi.

12 Hèia Esau peka dènge Yakob, aku nèngu na, “Ladhe sèmi èèna, miu pa'èra ho lati palere. Ja'a lere miu.”

13 Te ngaa aku Yakob na, “Hud'i laa, a'a! A'a ku ladhe mèdhi unu mu. Ana mu se, ana iiki ae era. Rèngu se dhae èra èèna mèka. Aa badha ae ka dhu heka matana. Ladhe ta pakaseti si kako pamèri, ètu d'ara ca lod'o, èèna na madhe aa'i si. 14 De be'a risi, a'a ku si kako uuru. Pe ji'i kako mau-mau dhiu. Ladhe èèna na, ja'a dhiu ngad'o a'a ku ètu Seir.”

15 Hèia Esau lii hari, na peka, “Ladhe sèmi èèna, ja'a tèke eele dhèu ja'a se cahag'e, sèna ka pad'elo j'ara hia miu.”

Te ngaa, aku Yakob na, “Hud'i laa, a'a, ee! Sad'i ja'a ke'a le, a'a ku sèmi ja'a dènge be'a.”

16 Tadèngi nare, Esau pakèd'i ka, tèke eele si, lèpa asa Seir. 17 Te ngaa nèti era èèna, Yakob la'e asa Sukot. D'ai nèi, na tao èmu dènge oka hia badha aa'i-aa'i ra. Nèti èèna ka, era èèna ra pangare na Sukot (dhu sasoa na ‘èmu pea taha’).

18 Te ngaa nèbhu boe ka, Yakob si kako nèti Padan Aram, lasi d'ai rae Sikem ètu rai Kana'an dènge sod'a-mole. Hèia ra patitu paleo, sèna ka ra pea padètu dènge rae èèna. 19 Rai dhu Yakob patitu paleo ne, hèli nare nèti Hemor, ana Sikem. Kab'ua rai ne, ca ngasu doi iia. 20 Ètu era ne, na pudhi hadhu, tao mei korban. Ka na pangare era ne'e, El-Elohe-Isra'el, dhu sasoa na ‘Ama Lamatua nèti Isra'el’.