Yakob madha'u paraga dènge a'a na Esau
32
Èle èèna ka, Yakob si kako taruu. Hèia ana pajuu Lamatua nèti sorga sèra mai paraga dènge ne. 2 Ropa ladhe nèdhi si, na lii, aku nèngu na, “Era ne'e ne, sèmi era ae sordad'u Lamatua!” Nèti èèna ka, era èèna na pangare na, Mahanaim (dhu sasoa na ‘dua era ae iisi’).3 Ka Yakob pua dhèu na pèri-pèri lasi uuru asa rai Edom (nuka Seir), sèna ka lasi peka dènge a'a na Esau, ho ne'a mamai na. 4 Hèia Yakob peka dènge si, aku nèngu na, “Lami peka dènge a'a ku Esau, sèmi ne'e: ‘Lamatua Esau! Ènu mu Yakob, hia ji'i ngèti lii karej'e-karae mi a'a na. Peka na, “Karèi nèti ja'a pakèd'i, toke sange ne'e ne, ja'a pea ètu d'ara èmu to'o Laban. 5 Limuri ne, ènu lamatua na dènge le unu sapi, keled'ei, rupa-rupa kahib'i, dènge ènu bhèni-mone. Ja'a hia uru dhèu se'e dhiu, ho peka dènge a'a ku, mamai ja'a ne. Ja'a sanao sèna ka a'a ku sèmi ja'a dènge d'ara kateme.””’ Èle ka dhèu se lasi.
6 Ropa dhèu se lèpa hari mai, ra lolo dènge Yakob, aku rèngu na, “Ji'i paraga le dènge a'a mu Esau. Nuka na mai re limuri nèi, dènge dhèu na èpa ngasu dhèu mone, neo mai paraga dènge èu.”
7 Ropa na tadèngi nare, sangasa Yakob rèbha-rèbha, aa na madha'u ae. Ka na hag'e eele dhèu na dènge badha-manu j'aj'i mi dua kaboko. 8 Na pangee, “Ladhe Esau mai, ho na age kaboko dhu uru, na kaboko dhu limuri bisa rai, tenge sod'a.”
9 Hèia Yakob manèngi-mangaj'i, aku nèngu na, “Ama Lamatua! Èu j'aj'i Lamatua nèti baki ja'a Abraham, aa nèti ama ku Isak. Nanene ku lii manèngi ja'a la! Uru èèna, Lamatua ka dhu hia ja'a lèpa asa a'ari ja'a, ètu kabarai ne'e. Lamatua ka dhu moa tèke, peka na pe Lamatua uri pamola j'ara. 10 Ja'a ne madhutu mola-mola na, bisa boe abhu sasue dènge mamako Lamatua. Uru èèna, lod'o ja'a pège loko Yarden, ja'a kèti dhoka tatea di. Te ngaa limuri ne, ja'a lèpa kèti dènge dhèu dua nau, aa dènge badha-manu ae. 11 Ja'a mangingi, mage dhoka a'a ja'a Esau, mai pare pamadhe ji'i aa'i-aa'i mi. De ja'a manèngi sèna ka Ama Lamatua hia mamuri mi ja'a, dènge ana-dhèu èmu-kamali aa'i-aa'i mi. 12 Lamatua dhu jaji tèke, èèna na pala-bagi mi dedha ja'a mamèngi ae-ae, aa hia ana-èpu ja'a bèba-kacanga, sama sèmi salae ètu nebhe dhasi, dhu dhèu ige rare boe.”
13 Èle ka, Yakob si j'unu ètu era èèna. Asa bèli èèna, na hag'e badha pèri-pèri ngi'u ho rèti hia a'a na. 14 Na pili nare kahib'i rena dua ngasu ngi'u, kahib'i mone dua nguru ngi'u, kahib'i-kalèbho rena dua ngasu ngi'u, kahib'i-kalèbho mone dua nguru ngi'u, 15 onta rena tèlu nguru ngi'u dènge ana susu, sapi rena èpa nguru ngi'u, canguru ngi'u sapi mone, keled'ei rena dua nguru ngi'u, dènge canguru ngi'u keled'ei mone. 16 Ka na hag'e ka badha se, èci-èci ka dènge anga na. Hèia na papala ka, èci-èci dènge ana madhenge na. Ka na peka dènge dhèu se'e, aku nèngu na, “Miu kako uuru. Pe ja'a dhiu. Te ngaa mi palaladha ho kaboko èci pakaj'èu nèti kaboko dhu leo sèra.”
17 Ka na peka dènge kaboko dhu uuru tèka, aku nèngu na, “Ladhe a'a ku Esau paraga dènge èu, aa na karèi, peka na, ‘Èu lamu mia? Èu ne, ènu nèti cee? Badha-manu se, unu cee?’ 18 Na mi dhaa, peka na, ‘Badha-manu se, unu ènu mu, Yakob. Na pa'adhu hia a'a na, Esau. Te ngaa nèngu nuka nèti limuri nèi.”’ 19-20 Lii sèmi èèna, na peka kahèi dènge dhèu madhenga badha cahag'e sèra hèi, aku nèngu na, “Ladhe mi paraga dènge a'a ku Esau, mi hia ne badha-manu se. Aa mi peka dènge ne, ja'a re limuri.” Lula madhutu a'abhu Yakob, na hia badha se aa'i-aa'i mi Esau, èèna na Esau sèmi nèngu dènge be'a. 21 Nèti èèna ka, na hia uuru rèti badha se. Te ngaa mèda èèna, nèngu pea ètu èèna era.
Yakob palèka dènge Lamatua
22 Mèda na, Yakob kèd'i, ka na pua dhèu èmu na dhèu dua, dènge dhèu èmu piara dhèu dua, dènge ana na dhèu canguru èci sèra, lasi uuru pège asa cabèka loko Yabok. 23 Ropa ra d'ai ca bèka loko, ka na hia aa'i mèdha-panyau na asa nèi.
24 Te ngaa Yakob pea ka mesa-mesa ètu èèna. Hèia dhèu mone èci mai, ka dua ra palèka d'ai oe mèu. 25 Ropa mone ne ne'a na nèngu segi boe Yakob, ka na kalabhe mi kolo keja Yakob, ka gage na tabod'a eele nèti era na. 26 Hèia mone ne lii, aku nèngu na, “Patabuli ja'a, te ciki hari, lod'o rea kèna.”
Te ngaa, aku Yakob na, “Èu hia ja'a mèngi-nale, heka ja'a patabuli èu kèna!”
27 Ka mone ne karèi ne, “Ngara èu ne, cee?”
Na dhaa, peka na, “Yakob.”
28 Hèia mone ne lii hari, aku nèngu na, “Èu ngara heka Yakob. Te ngaa mulai nèti deo ne'e ne, dhèu paroa èu, Isra'el, lula èu lab'a le dhèu rai-haha dènge Ama Lamatua, ka èu segi.” (Ngara Isra'el sasoa na ‘dhu palèka dènge Ama Lamatua’.)
29 Ka Yakob karèi ne, “Èu peka ku ngara èu la.”
Te ngaa mone ne peka na, “Èu neo me'a ngara ja'a, tao ngaa?” Hèia na hia mèngi-nale mi Yakob ètu era èèna.
30 Ka Yakob padhai lii, aku nèngu na, “Ja'a kèdhi le Ama Lamatua madha dènge madha, te ngaa ja'a mamuri era.” Nèti èèna ka, Yakob pangare era èèna, Peniel, dhu sasoa na, ‘Rèhu Lamatua’.