3 Hèia LAMATUA peka dènge Yakob, “D'ai le lod'o, ho èu lèpa asa ina dènge ama mu. Ja'a palere-lere dènge èu.”

4 Ka Yakob hia dhèu lasi paroa Rahel dènge Lea, sèna ka mai paraga dènge ne ètu era ani badha, ètu d'ara mamoo. 5 Hèia na peka dènge ra, aku nèngu na, “Limuri ne, ja'a ladhe-ladhe na, ama miu na rèhu na mare heka dènge ja'a. Aa babe'a na mi ja'a, sèmi heka uru èèna. Te ngaa Ama Lamatua dhu ama ku sogo-tagu èèna, palere-lere dènge ja'a. 6 Miu dua mi se me'a le, nèbhu nare sange ne'e, ja'a j'aj'i kuli ètu ama miu! 7 Te ngaa sèmi èèna, d'ara na la'e kahèi, ka na kapod'e-kabèli taruu ja'a. Ka na ub'a rui-j'aj'èra ja'a, canguru hari kèna. Masi ka sèmi èèna, Ama Lamatua j'aga pa'èra ja'a. 8 Lod'o ama miu peka na, ‘Badha dhu rèu ra katèd'a sèra j'aj'i mi unu èu,’ ho ladhe lod'o badha se matana, ana dhu katèd'a hua-hua. Lod'o leo hari, na peka, ‘Badha dhu karata sèra, j'aj'i mi unu èu,’ ka badha se matana ana karata aa'i-aa'i. 9 Ama Lamatua ad'u sèmi èèna na, sèna ka nare aa'i badha-manu ama miu èèna, ho hia mi ja'a.

10 Ca tèka, ropa badha se paleo, ja'a kèdhi ètu d'ara nii, dhu peka na, badha mone aa'i-aa'i dhu paleo, abhu dhu katèd'a aa dhu karata hèi. 11 Ka ana pajuu Lamatua nèti sorga paroa ja'a, peka na, ‘Yakob!’

Hèia ja'a dhaa, ‘Tasamia, Lamatua?’

12 Ka na lii, ‘Ladhe ku laa! Badha mone dhu paleo sèra, dhodhoka dhu karata dènge katèd'a di. Ja'a ka ad'u sèra sa, lula Ja'a dhu kèdhi le, ngaa dhu Laban tao mi dedha èu. 13 Ja'a ne, Ama Lamatua, dhu pad'elo iisi mi èu ètu Betel èèna. Ètu era nèi, èu patitu hadhu, ka mu bhori èi mènyi ètu dedha na, ka èu sogo-tagu Ja'a. Ka èu pa'èki lii pajaji dènge Ja'a ètu nèi. De kèd'i ka, tèke eele ka rai ne'e ne, lamu ka asa kabarai ina-ama èu.”’

14 Hèia Rahel dènge Lea b'ala lii na, aku rèngu na, “La'a ma! Ji'i dènge heka pusaka ngaa-ngaa nèti ama ji'i Laban. 15 Nèbhu nare sange ne'e, mone heka ne tao ji'i sèmi dhèu leo kara sa. Na pahie eele le ji'i se. Ka na'e aa'i le kab'ua-kadheli ji'i se. 16 De mèdha-panyau dhu Ama Lamatua nare sèra nèti ama ji'i Laban, aa'i-aa'i sèra j'aj'i le unu èdhi dènge ana-ana èdhi se. De ladhe aku Lamatua tasa mera mia, te'a dhoka madhutu di!”

17-18 Èle èèna ka, Yakob lalau mèdha-panyau na. Hèia na paca'e ana-dhèu èmu na asa dedha onta lasi, aa na eo nèti badha-manu na aa'i-aa'i, dènge mèdha-panyau dhu na abhu ètu Padan Aram, ho lasi asa rai Kana'an.

19 Lod'o èèna, Laban dhu la'e g'ute rèu kahib'i-kalèbho na. Ka Rahel mana'u nare patung mèdha sogo-tagu ama na. 20 Aa Yakob si lasi palangu boe lii dènge to'o na. 21 Na bau nèti aa'i mèdha-panyau na, ka ra kako pamèri-mèri, lasi re loko Efrat, asa ledhe Gilead.

22 Rarai Yakob si èèna d'ai tèlu lod'o ku, heka Laban ne'a kèna. 23 Hèia Laban oru nare ka dhèu-dhèu na, lasi bate Yakob si. D'ai pidhu lod'o ku, heka ra paraga dènge si ètu ledhe Gilead.

24 Ka d'ara mèda èèna, Lamatua pad'elo iisi Na mi Laban ètu d'ara nii. Na peka na, “Laban! Ladhe èu padhai lii dènge Yakob, j'aga paie hèb'a èu na.”

25 Mèda èèna, Yakob si dhu patitu paleo ètu ledhe Gilead. Aa Laban si patitu unu ra kaj'èu boe nèti era èèna kahèi.

26 Èle ka, Laban mai paraga dènge Yakob. Hèia na lii, aku nèngu na, “Nga tao ka, èu rai mèti ana bhèni ja'a se, dènge boe lii ugu-ge'e sa hèi? Mu tao si sèmi dhèu dhu èu segi ètu d'ara papara-pakèj'i. 27 Èu ne ad'a aad'o, palangu boe sa hèi dènge ja'a! Ladhe èu peka dènge ja'a be'a-be'a, ele boe ja'a tao sisi-kau, ho ta'a-tinu boko-boko, ho lere miu dènge lii sod'a,^a heka ji'i patabuli miu kèna. 28 Sasala èu èci hari ka, èu hia boe ja'a uu ana-èpu ja'a hèi. Tatao èu ne goa titu kèna! 29 Carui boe, ladhe ja'a ne neo paj'èra èu! Te ngaa malo-malo ka mèda-mèda na, Ama Lamatua dhu ama mu sogo-tagu èèna, kai ja'a peka na, ladhe ja'a padhai lii dènge èu, ja'a hud'i j'aga paie-iie ku hèb'a ja'a. 30 Mema, ja'a dhu ke'a le, èu pakèd'i lula èu dhu neo le lèpa. Te ngaa tasamia ka, èu mana'u mèti patung mèdha sogo-tagu ja'a?”

31 Hèia Yakob b'ala, aku nèngu na, “To'o baku nasa ku dènge ja'a! Ja'a pakèd'i mau-mau èèna, lula ja'a mage dhoka mo'o boe ja'a kèti ana-ana se!” 32 Te ngaa Yakob dhu ne'a nare boe, na dhèu èmu na Rahel ka dhu mana'u nèti. Ka na lii, aku nèngu na, “To'o! Mèdha sogo-tagu èèna, mu tenge ne! Ladhe mèdhi ètu cee, huku pamadhe ne. Parisa aa'i mèu-mèu. Ladhe abhu kahèi pusaka to'o dhu leo, more aa'i si. Hud'i laa, dhèu se'e se j'aj'i sakasii.”

33 Hèia Laban la'e parisa ka asa d'ara paleo se èci-èci. Na la'e uru asa d'ara paleo Yakob. Èle ka, la'e asa d'ara paleo Lea. Èle ka, la'e asa d'ara paleo ènu se dua ra. Te ngaa abhu boe ngaa-ngaa. Paleo Rahel limuri tèka. 34 Te ngaa Rahel dhu huni le mèdha sogo-tagu sèra ètu d'ara lalaka onta. Ka na madhèdi ètu dedha. D'ai d'ara paleo ne, Laban tenge paie-iie, te ngaa na rage boe.

35 Hèia Rahel peka dènge ama na, aku nèngu na, “Ama mage mu nasa kahèi. Te ja'a bisa boe titu, lula ja'a abhu hèru.” Masi ka sèmi èèna, Laban tenge taruu, te ngaa abhu boe mèdha sogo-tagu sèra.

36 Ka Yakob nasa, hèia na pajèka dènge Laban, aku nèngu na, “Ja'a ne tao bhelu ngaa mi to'o? Ka to'o mai bate ja'a, sèmi dhu ja'a ne, dhèu bhelu-katub'a sa! 37 Mèdha-panyau ja'a, to'o ceb'e eele si. De mu abhu ngaa? More ka mai tèke mi madha ne, sèna ka aa'i-aa'i ti tèdhi. Aa hud'i laa, dhèu se'e ka dhu pama'ète mèdha èèna unu cee. 38 Dua nguru tèu kèna, ja'a sab'a kuli mi to'o. Lod'o ja'a madhenga badha-manu to'o, ci'u sa legu boe. Aa ku'a kèdhi boe ci'u sa hèi! 39 Ladhe badha hui-hahi hui, kadhi pamadhe badha to'o ci'u, ja'a peka boe, te ngaa ja'a gati. Aa ladhe dhèu mana'u, to'o pua ja'a gati, masi ka ja'a sala boe. 40 Ladhe re mèu, madha lod'o ai pamango ja'a. Aa ladhe mèda, ja'a maringi rig'i-rig'i. Ja'a pasaruru boe ciki sa, toke mèu rai, lula madhenge badha-manu to'o. 41 Mema tare'a, dua nguru tèu èèna! Ja'a sab'a canguru èpa tèu, sèna ka abhu ana bhèni to'o, dhèu dua se. Ka ja'a sab'a hari èna tèu, sèna ka ja'a unu badha-manu se'e. J'aj'i kuli nèbhu nare sange èèna, te ngaa to'o pakura rui-j'aj'èra ja'a d'ai canguru hari. 42 Malo-malo ka, dènge Ama Lamatua, dhu baki ku Abraham, dènge ama ku Isak, dhu sogo-tagu Ne. Ladhe Na leru boe ja'a ne, ele boe to'o hia ja'a lèpa dènge ai hua da'u-da'u. Te ngaa Ama Lamatua dhu pa'abhe boe musi madha Na mi j'aj'èra ja'a, aa Na tao madha-dhilu mi sasab'a-la'a ja'a aa'i-aa'i. Nèti èèna ka, mèda deo na, Na mai kai to'o, sèna ka baku lii sakaa dènge ja'a.”

43 Ropa nanene nare lii padhai Yakob, ka Laban dhaa, aku nèngu na, “Sèmi ne'e! Bhèni dua se, ana ja'a. Ana dhu ra matana se, aa'i-aa'i ra èpu ja'a. Badha-manu aa'i-aa'i se, unu ja'a. Aa'i-aa'i dhu èu ladhe mèdhi ètu se'e se, unu ja'a. Te ngaa ja'a neo tao si, tasamia? Ja'a bisa boe magee si. 44 De be'a risi, èdhi dua ti pa'èki lii pajaji. Sèna ka lii pajaji èèna ka dhu èki èdhi dua ti.”

45 Hèia Yakob nare ka hadhu aae cue, na patitu ètu èèna, sèna ka j'aj'i mi tadha. 46 Hèia Yakob pua dhèu sab'a na, lasi udhu hadhu. Ka ra madhèdi ra'a-rinu ètu era èèna, padètu dènge hadhu sèra. 47 Hèia Laban pangare hadhu udhu sèra, Yegar Sahaduta. Te ngaa Yakob pangare na, Galeed.^b

48 Ka Laban padhai lii, aku nèngu na, “Hadhu udhu se, j'aj'i sakasii mi èdhi dua ti.” Nèti èèna ka, era èèna ngara na, Galeed. 49 Laban pangare kahèi era èèna, Mispa (dhu sasoa na ‘era j'aga dhu dedha’), lula na peka na, “Pe èèna na, LAMATUA ka dhu j'aga èdhi dua ti, ho masi ka dua ti pakaj'èu, baku kako eele lii pajaji ne. 50 Ladhe èu tao karehe ana ja'a se, do leo-èmu dènge bhèni leo hari, tatu ja'a ke'a boe. Te ngaa mu sanèd'e! Ama Lamatua ka dhu j'aj'i sakasii mi èdhi dua ti. 51-52 Èu ladhe ku hadhu dhu patitu ne, dènge hadhu dhu udhu se. Sanèd'e, hadhu se'e ka dhu j'aj'i mi too dènge lane. Èu bisa boe kako seli hadhu se, ho tao bhelu mi ja'a. Aa ja'a kahèi bisa boe kako seli hadhu se, ho tao bhelu mi èu. 53 Dua ti pa'èki lii pajaji ne, dènge kolongara Ama Lamatua nèti bèi-baki èdhi. Nuka Ama Lamatua nèti baki mu Abraham dènge baki ja'a Nahor. Nèngu èèna ka, dhu j'aj'i hakim, sèna ka pama'ète lii èdhi dua ti.”

Ropa nanene nare, hèia Yakob j'oka soo-subha dènge kolongara Ama Lamatua, dhu ama na Isak sogo-tagu.

54 Èle èèna ka, Yakob roro badha, ho j'aj'i mi korban hia mi Lamatua ètu ledhe èèna. Hèia na paroa dhèu aa'i-aa'i mai ra'a-rinu pa'èci, ka ra beke d'ai lod'o rea.

55 Asa bèli mad'ae èèna, Laban la'e liku dènge uu ana-èpu na aa'i-aa'i ra. Ka na hia si mèngi-nale, hèia na lèpa hari asa rai na.