2 Te ngaa Yakob jèke ne, aku nèngu na, “Èu ngee na, ja'a ne, Lamatua, ho bisa hia èu ana!?”

3 Ka Rahel b'ala na, “Sèmi ne'e: hua iia èu more Bilha, ènu ja'a na. J'unu dènge ne, sèna ka na matana hia ja'a ana.”

4 Hèia na pangèd'u Bilha mi dhèu èmu na. Ka Yakob j'unu dènge ne. 5 Ka Bilha dènge babia, hèia nara iisi ana mone ca dhèu. 6 Hèia Rahel padhai lii, aku nèngu na, “Ama Lamatua nanene le lii manèngi-mangaj'i ja'a. Nèti èèna ka, Na hia ja'a ana mone ca dhèu. Ama Lamatua pama'ète le, lii langu ja'a dènge mola-mola.” Ka na pangare ana ne, Dan (dhu sasoa na ‘pama'ète lii’).

7 Èle èèna ka, Bilha dènge hari babia, ka nara iisi ana mone èci. 8 Ka Rahel peka, aku nèngu na, “Ja'a limuri ne pa'uji dènge a'a ku, ka ja'a segi.” Nèti èèna ka, na pangare ana na, Naftali (dhu sasoa na ‘pa'uji’, do ‘pa'ère’).

9 Ropa Lea ne'a na nèngu ne dènge heka ana, ka na paleo ènu na Silpa dènge Yakob. 10 Ka Silpa nara iisi ana mone ca dhèu. 11 Hèia Lea peka na, “Kalua ja'a, mèngi le.” Ka na pangare na, Gad (dhu sasoa na ‘kalua mèngi’).

12 Ka Silpa nara iisi hari ana mone èci. 13 Hèia Lea padhai lii, peka na, “Waa! Limuri ne, ja'a heka karej'e kèna! Mi laladhe ee, te bèli-camèd'a, dhèu bhèni aa'i-aa'i ra, peka na ja'a ne oto bia.” Nèti èèna ka, na pangare ana ne, Aser (dhu sasoa na ‘karej'e’).

14 Ca lod'o, lèke dènge hèru puu-g'ètu are, Ruben la'e asa d'ara j'ami. Na rage ana aaj'u ca kapua dhu j'aj'i sèmi èi na'i ho hia dhèu bhèni abhu kolo. Ka Ruben nèti hia ina na Lea. Ropa Rahel nèdhi, ka na peka dènge Lea, aku nèngu na, “A'a! Bagi ku ja'a ciki, èi na'i dhu Ruben nèti èèna.”

15 Te ngaa Lea b'ala, aku nèngu na, “Wee! Èu ne seli-kolane! Parame more le dhèu èmu ja'a. Te ngaa roca mèka na. Mu neo hari unu aj'u èi na'i èèna nèti ana ja'a? Me'a heka makae d'ara!”

Te ngaa Rahel dhaa, “Sèmi ne'e, a'a! Ladhe ja'a abhu èi na'i na, mèda ne'e èu pa'èci dènge Yakob.” Ka Lea d'èi kahèi.

16 Ka pe d'ai loo nihia sa, Yakob lèpa nèti d'ara oka. Lea la'e soru nare ne, ka na peka, “A'a! Mèda ne, èu j'unu dènge ja'a! Lula ja'a dhu hèli kore le èu, dènge kab'ua èi na'i ana ja'a!” Ka mèda na, Yakob j'unu dènge Lea.

17 Ka Ama Lamatua tadèngi lii manèngi-mangaj'i Lea. Nèti èèna ka, na dènge babia, hèia nara iisi ana mone ka lèmi. 18 Hèia Lea pangare ana na, Isaskar, (dhu sasoa na, ‘b'ae j'aj'èra’), lula na peka na, “Ama Lamatua b'ae-baj'a le j'aj'èra ja'a, lula ja'a hia le Silpa madhèdi dènge dhèu èmu ja'a.”

19 Èle èèna ka, Lea dènge babia hari, hèia nara iisi ana mone ka èna. 20 Ka na peka, aku nèngu na, “Ama Lamatua parasee ja'a mèdha dhu be'a. Ka limuri ne, dhèu èmu ja'a hud'i pakab'ua ku ja'a, lula ja'a matana hia ne ana mone dhèu èna.” Nèti èèna ka, na pangare ana ne, Sebulon (dhu sasoa na ‘pakab'ua’).

21 Ka Lea nara iisi hari, te ngaa ana bhèni, ka na pangare na, Dina.

22 Te ngaa Ama Lamatua dhu bhèlu boe Rahel, ka sèmi lii manèngi-mangaj'i na. Nèti èèna ka, Na bhoke era ana na. 23 Hèia Rahel dènge babia, ka nara iisi ana mone ca dhèu. Ka na peka, “Ama Lamatua saku eele le d'ara makae ja'a.” 24 Hèia na pangare ana na Yusuf (dhu sasoa na ele boe ‘hud'i laa na hia tabha hari’), lula aku nèngu na, “Ja'a manèngi, sèna ka Ama Lamatua hia ja'a ana mone ca dhèu hari.”

25 Lod'o Rahel nara iisi Yusuf, Yakob peka dènge Laban, aku nèngu na, “To'o! Ladhe mo'o, ja'a neo lèpa asa rai ètu-èsu ja'a. 26 Ja'a neo laku dènge ana-dhèu èmu ja'a. To'o, èu dhu me'a le, ja'a ne sab'a tèu-tèu nèti mad'ae d'ai loo nihia. De ja'a b'ae pama'ète le rèngu se. Nèti èèna ka, rèngu se, j'aj'i le unu ja'a ka teme aae.”

27 Hèia, aku to'o na, “Ana, ee! Èu nanene ku lii ja'a laa! Madhutu lii malare dhu ja'a abhu, Lamatua hia ja'a mamèngi lula èu. 28 De èu neo manèngi ca ngaa, peka, sèna ka ja'a b'ae! Sad'i èu baku tèke eele ja'a, te ngaa sab'a taruu hia ja'a.”

29 Ka Yakob peka, “To'o! Èu mèdhi unu mu le, sasab'a-la'a ja'a. Nèti èèna ka, badha-manu to'o se, bèba-kacanga. 30 Lod'o dhu ja'a dhae mai mèka, mèdha-panyau to'o ku ae èèna mèka. Te ngaa limuri ne, to'o kaja le. Lamatua pala-bagi le to'o ku mamèngi, lula sasab'a-la'a ja'a ka. Te d'ai le lod'o na, sèna ka ja'a sab'a hia ana-dhèu èmu ja'a.”

31 Hèia Laban karèi ne, aku nèngu na, “De sèmi èèna na, ja'a b'ae èu tasamia?”

Ka Yakob dhaa, peka na, “To'o ku, hia ia ka ja'a ngaa-ngaa. Te ngaa badha-manu to'o ku, ja'a ladhe-leru taruu, sad'i mu tao ku j'ara èci. 32 Ladhe mo'o, deo ne'e kahèi, ja'a laku asa badha-manu to'o sèi, ho hag'e si. Mia dhu dènge boe katèd'a aa dènge boe karata, sèra sa unu to'o ku taruu. Te ngaa mia dhu dènge katèd'a aa dhu karata, hia mi ja'a. Dènge kahib'i-kalèbho dhu mèdhi, ja'a kora aa'i si. Se'e se, hud'i laa j'aj'i mi bab'ae rui-j'aj'èra ja'a.^a 33 D'ai lod'o limuri, pe to'o me'a ja'a ne sab'a dènge mola, do aad'o. Sad'i lake more, mai ho mu parisa badha-manu ja'a. Ladhe mu abhu kahib'i-ka'ia dhu dènge boe katèd'a, aa dhu karata boe, do, kahib'i-kalèbho dhu pudhi, èèna na, dhu me'a le èèna, ja'a mana'u badha-manu to'o.”

34 Ka Laban d'èi kahèi, aku nèngu na, “Oo! J'ara na sèmi èèna ka.” 35 Te ngaa ètu d'ara lod'o èèna kahèi, Laban hag'e dènge badha dhu katèd'a, dhu karata, dènge kahib'i-kalèbho dhu mèdhi. Ka na pangèd'u mi ana na si, ho ladhe-leru. 36 Hèia eo rèti ka badha se asa era èci dhu kaj'èu na tèlu lod'o kako haga nèti era Yakob si. Ka Yakob madhenge ka badha dhu ata se.

37 Èla èèna ka, Yakob poro nare dadana aaj'u nèti aj'u tèlu rupa. Ka na caci pakarata ka'uri aj'u sèra, tao strep-strep. 38 Hèia aj'u dhu strep-strep se, na tèke asa d'ara karab'a kahib'i. Badha se dhu tema le pa'ango aa paleo ètu era èèna. 39 De ladhe badha se paleo ètu madha aj'u strep-strep se, ra matana ana dhu rèu ra katèd'a dènge karata.

40 Ka ladhe badha Laban se neo paleo, Yakob patangare si asa kahib'i dhu katèd'a dènge karata sèra. Hèia ana dhu ra matana sa rèu ra katèd'a dènge karata kahèi. Dènge j'ara sèmi èèna ka, badha na asa ae. Ka na pacèri eele si nèti badha Laban sèra. 41 Ropa badha dhu èra neo paleo, Yakob nare kadhèli aj'u dhu strep-strep sèra, tao mi d'ara karab'a ètu madha si. 42 Te ngaa ladhe kahib'i dhu roe dènge malaka-god'a neo paleo, Yakob soro tèke si. Ka badha dhu roe, sèra unu to'o na Laban. Aa mia dhu èra, sèra unu nèngu. 43 Dènge j'ara ne'e ne, Yakob j'aj'i dhèu kaja-su'i. Ka kahib'i-ka'ia na, kahib'i-kalèbho na, onta na, keled'ei na, dènge ènu na bhèni-mone, udhu sobhu-sobhu.