Yakob d'ai èmu to'o na Laban
29
Hèia Yakob kako hari ka asa bèka dhimu. 2 Ca lod'o, ladhe nèdhi èi ca madha, dètu dènge rae cue. Padètu-dètu dènge madha èi èèna, abhu tèlu kaboko kahib'i-kalèbho, dhu mate rinu èi. Te ngaa hadhu aae cue dhu ra pasaguru mi hèb'a èi na. 3 Dhu tema le, ladhe kahib'i tesa aa'i-aa'i ra, ana-ana madhenga kahib'i se, lasi bhoke hadhu na, heka ra dhui kèna, panginu kahib'i si. Panginu rare na, ra katange hari hadhu na la'e.4 Ka Yakob kako la'e asa madha dhèu madhenge kahib'i se, hèia na karèi, aku nèngu na, “Miu se, dhèu mia?”
Hèia ra dhaa, “Ji'i se, nèti rae Haran ne'e.”
5 Ka Yakob karèi hari, aku nèngu na, “Miu tadhe to'o ja'a, Laban, do? Nèngu na, ana Nahor.”
Ka ra dhaa, “Ji'i tadhe ne.”
6 Hèia Yakob karèi hari, aku nèngu na, “Na be'a-be'a, sina ma?”
Ka ra peka, “Oo, na be'a-be'a. Ladhe, ana bhèni na ka nèi. Ngara na, Rahel. Nuka eo nèti kahib'i ama na mai sa ne'e, ho hia rinu ètu ne'e. Mate ne.”
7 Hèia Yakob peka hari, “Loo nètu era. De be'a risi, badha mia ètu se'e le, panginu ka si. Sèna ka lere mèti hari asa d'ara pad'a, ho ra'a hari j'u'u.”
8 Te ngaa ra peka, “We, j'ara na aad'o sèmi èèna! Ji'i mate toke tesa aa'i ku, heka ji'i pakeso hadhu ne, heka panginu badha se kèna.” 9 Yakob padhai lii era, Rahel d'ai le era èèna dènge kahib'i ama na. Nèngu ka dhu biasa ladhe-leru si.
10 Ropa Yakob nèdhi Rahel dènge kahib'i sèra, la'e dènge ka pa'eso eele hadhu dhu saguru hèb'a èi na. Ka na panginu badha to'o na sèra. 11 Èle ka, la'e uu Rahel, dènge tangi. 12 Ka na lolo dènge Rahel, aku nèngu na, “Ari! Ja'a ne, ana nèti Ribka, ana hèni ama mu.” Hèia Rahel rai sa èmu la'e, peka dènge ama na.
13 Ropa Laban tadèngi lii lolo Rahel, dhu peka na Yakob ana nèti ana hèni na Ribka, ka la'e dènge ka, soru nare Yakob. Ropa na d'ai, liku nare Yakob, ka na uu, hèia gale nèti dènge ka, lasi asa èmu na. Ka Yakob lolo aa'i-aa'i dènge to'o na. 14a Hèia Laban lii, aku nèngu na, “Mema tare'a! Èdhi dua ti dhu pa'a'ari.”
Yakob nare Lea dènge Rahel, j'aj'i dhèu èmu na
14b Ropa Yakob pea dènge rèngu d'ai ca hèru, 15 Laban padhai lii dènge ne, aku nèngu na, “Yakob! Ja'a ko'o boe, sèna ka èu sab'a hia ja'a dènge iia-iia d'ara, lula èdhi se dhu pa'a'ari. De èu neo sèna ka rui-j'aj'èra èu ja'a b'ae ca ngaa?”
16 Laban ne, dhu dènge ana bhèni dhèu dua. Dhu uru, ngara na Lea. Aa ari na, ngara na Rahel. 17 Lea ne, musi madha na ako ahu.a Te ngaa Rahel, rèhu na bhèni iia, aa ngi'u na saraga bia. 18 Yakob d'èi risi Rahel. Ka na peka dènge Laban, “Ladhe to'o ku mo'o, ja'a sab'a hia to'o ku pidhu tèu, sad'i to'o ku hia ja'a madhèdi dènge Rahel.”
19 Hèia Laban dhaa, aku nèngu na, “Ja'a ko'o! Be'a risi, ja'a paleo èu dènge Rahel, lula èdhi dua ti dhu a'ari. Mage dhoka na madhèdi dènge dhèu leo. De mu pea mi ne'e, sèna ka sab'a hia ja'a.” 20 Ka Yakob sab'a hia Laban pidhu tèu, sèna ka na bisa madhèdi dènge Rahel. Lula na d'èi madhe-madhe Rahel, nèti èèna ka, pidhu tèu èèna, na pangee nuka sèmi pèri-pèri lod'o di.
21 Ropa risi nèti pidhu tèu, ka na pasanèd'e Laban, aku nèngu na, “To'o! Ja'a sab'a le hia to'o ku pidhu tèu, de paleo ka ja'a dènge Rahel.”
22 Hèia Laban tao tatao, ka na nèru aa'i rae lesa ètu rae èèna. 23-27 Ropa d'ai mèda èèna, Laban hia boe Rahel, te ngaa na pua Lea maso asa d'ara paleo Yakob. Ka Yakob j'unu dènge ne. Asa bèli èèna, Yakob heka ne'a kèna, nèngu dhu leo dènge Lea di. Hèia Yakob la'e patao dènge Laban, aku nèngu na, “Nga tao ka, to'o pasèru ja'a sèmi ne'e? Ja'a sab'a sèmi ènu pidhu tèu kateme hia mi èu, sèna ka bisa abhu Rahel! Nga tao ka to'o pasilu dènge Lea?”
Ka Laban dhaa, “Baku nasa ku! Madhutu ad'a ji'i ètu rai ne'e, ari bisa boe leo uuru èmu nèti a'a. De be'a risi sèmi ne'e! Èu mate hari ku pidhu lod'o, d'ai èle tatao ne, heka èu abhu Rahel kèna. Sad'i èu sab'a hari hia ja'a pidhu tèu.” Hèia Laban pangèd'u dènge ènu bhèni èci, hia mi Lea. Ngara na Silpa.
28 Lii padhai Laban deo na, Yakob d'èi kahèi. Nèti èèna ka, èle tatao ne pidhu lod'o, ka Laban pamadhèdi hari Yakob dènge Rahel. 29 Ka Laban hia ènu na dhèu bhèni èci, ngara na Bilha, sèna ka j'aj'i mi ènu Rahel. 30 Hèia Yakob pa'èci ka dènge Rahel. Na d'èi risi Rahel nèti Lea. Ka Yakob sab'a hari hia to'o na pidhu tèu.
Ana-ana Yakob
31 Te ngaa LAMATUA ne'a le, Yakob sue risi Rahel nèti Lea. Nèti èèna ka, Na hia Lea nara iisi ana. Te ngaa Rahel abhu boe ana. 32 Hèia Lea dènge babia, ka nara iisi ana mone ca dhèu. Na pangare ne, Ruben (dhu sasoa na ‘mèdhi si, abhu ana’),b lula na peka na, “LAMATUA ladhe nèdhi le sasusa ja'a. Nèti èèna ka, limuri ne, dhèu èmu ja'a tao madha-dhilu mi ja'a.”
33 Ka Lea dènge hari babia, hèia nara iisi hari ana mone èci. Na pangare ne, Simeon (dhu sasoa na, ele boe ‘dhèu tadèngi le’), lula na peka na, “LAMATUA dhu ne'a na, dhèu èmu ja'a sue boe ja'a. Tu d'ai èèna ka, Na hia ja'a ana dhèu èci hari.”
34 Èle èèna ka, Lea kad'o hari ana èci, ka nara iisi ana mone ca dhèu. Na pangare na Lewi,c lula na peka na, “Dènge ana ne'e ne, èle dènge lii langu ja'a. D'ara dhèu èmu ja'a, pa'èki dènge ja'a, lula ja'a matana hia ne ana mone, dhèu tèlu kèna.”
35 Ka Lea dènge hari babia ca tèka, hèia nara iisi ana mone èci. Na pangare na, Yahuda (dhu sasoa na ele boe ‘koa-kio’), lula na peka na, “Dènge j'ara ne'e ne, ja'a neo koa-kio LAMATUA!” Èle ka, Lea dènge heka ana.