28
Hèia Isak paroa nare Yakob, ka hia ne mèngi-nale aa holo ne, peka na, “Sanèd'e paie! Èu mage leo ka dènge ana bhèni Kana'an hèi. 2 De lamu ka asa Padan Aram, asa baki mu Betuel. Lamu madhèdi dènge ana bhèni to'o mu Laban ca dhèu.a 3 Hud'i laa Ama Lamatua dhu Koasa Risi Eele na, hia èu mamèngi, sèna ka ana-èpu èu bèba-kacanga, ho nèti rèngu ka j'aj'i suku ae-ae dhu kapai. 4 Hud'i laa, lii pajaji Ama Lamatua dènge Abraham èèna, noto mi dedha èu ne, dènge ana-èpu èu. Sèna ka èu unu rai dhu Ama Lamatua jaji tèke le mi Abraham.”b 5 Padhai lii nare, ka Isak hia Yakob la'e asa Padan Aram, asa èmu to'o na Laban, dènge baki na Betuel.Esau leo dènge ana bhèni Ismael
6 Esau dhu tadèngi le kahèi, dhu peka na Isak hia Yakob mamèngi, aa kai ne sèna ka baku leo dènge bhèni Kana'an. Aa na tadèngi hèi, dhu Isak hia Yakob leo dènge ana bhèni to'o na Laban ètu Padan Aram. 7 Ka Yakob madhutu lii paredha ina dènge ama na, ka pakèd'i la'e asa Padan Aram.
8 Aa Esau dhu ne'a le kahèi, ama na d'èi boe dhèu èmu na, bhèni Kana'an dua sèra. 9 Hèia na la'e asa ama aae na Ismael, ka leo hari èmu dènge ana bhèni Ismael ca dhèu, ngara na Mahalat. Mahalat ne, ana mone na ka Nebayot.
Yakob nii ètu Betel
10 Ka Yakob tèke eele Beer Syeba, la'e asa Haran. 11 Ropa lod'o cèna, Yakob d'ai era èci, ka na j'unu ètu era èèna. Na neo j'unu, nare hadhu cue, tao lalaka kètu na.
12 D'ara mèda èèna, na nii. Na ladhe nèdhi langa èci dhu patitu ètu rai, suu na d'ai dedha-liru. Ka ana pajuu Ama Lamatua nèti sorga, ca'e-puru ètu dedha langa èèna. 13 Ètu d'ara nii na, Yakob ladhe nèdhi LAMATUA dhu titu ètu karasa nèngu, hèia na lii, aku nèngu na, “Ja'a ne LAMATUA, Ama Lamatua nèti baki mu Abraham, dènge ama mu Isak. Èèna na, Ja'a hia rai ne mi èu dènge ana-èpu èu. 14 Bèli-camèd'a, ana-èpu èu ae-ae, sama sèmi ahu rai ne. Rèngu se, èèna na, pea palème era-era ètu rai-haha ne. Nèti ana-èpu èu ka, suku aa'i-aa'i ètu rai-haha ne, abhu mèngi-nale.c 15 Mage mu bhèlu! Èu ne ètu mia èèna ka, Ja'a bera-bera dènge èu. Ladhe èèna na, Ja'a lere kèti hari èu mai asa dedha-rai ne'e. Ja'a bhera boe èu. Aa èèna na, Ja'a tao aa'i madhutu sèmi lii pajaji Ja'a dènge èu.”
16 Ropa Yakob kèd'i nèti bhèj'i, na padhai lii, aku nèngu na, “Ja'a heka ke'a kèna, LAMATUA dhu ètu era ne'e kahèi.” 17 Na madha'u, ka na pangee, na, “Boo! Era ne'e ne pamadha'u ja'a, nga. Tatu Èmu Ama Lamatua ètu era ne'e ne! Aa era ne'e ne, j'aj'i hèb'a babèdho sorga.”d
18 D'ara mad'ae aae era, Yakob kèd'i le èèna. Ka nare hadhu dhu na tao lalaka deo na. Hèia na patitu j'aj'i mi tadha. Ka na bhori èi mènyi asa dedha hadhu èèna, hèia na mangaj'i mi Lamatua. 19 Ka na pangare era ne Betel, dhu sasoa na ‘Èmu Lamatua’. (Uru èèna, era ne ngara na Lus.)
20 Èle èèna ka, Yakob ded'e subha, aku nèngu na, “Ladhe Ama Lamatua dhu dènge ja'a, aa j'aga ja'a ètu d'ara kakako ja'a ne, aa panga'e dènge papake ja'a, 21 toke ja'a lèpa dènge sod'a, èèna na LAMATUA j'aj'i mi Ama Lamatua ja'a. 22 Hadhu dhu ja'a patitu ne, j'aj'i mi era sogo-tagu mi Ama Lamatua. Aa aa'i-aa'i dhu Lamatua pala-bagi mi ja'a, ja'a hia Na ca pala nèti canguru pala.”