Hèia Esau dhaa, aku nèngu na, “Tasamia, ama?”

2 Ka Isak peka hari, “Sèmi ne'e! Ja'a ne, ètu d'ara heka le. Ke'a boe, pèri lod'o ja'a ne madhe. 3 De more rèka èu, lamu kataki mèti badha hui ci'u hia ja'a. 4 Mu pananasu pabe'a-be'a, madhutu dad'èi ja'a, ho mèti mai hia ja'a. Ladhe ku'a-kinu kora, ja'a hia mema èu mèngi-nale. Sad'i èu unu le mèngi-nale èèna, ja'a madhe èèna ka, ngaa-ngaa tao heka.”

5 Hèia Esau la'e dènge ka, kataki badha hui. Te ngaa Ribka dhu tadèngi kahèi lii padhai Isak deo na. 6 Ka Ribka la'e peka dènge Yakob, aku nèngu na, “Yakob! Èu nanene ku! Deo na, ja'a tadèngi ama mu pua Esau sèmi ne'e: 7 ‘Lamu kataki more ku badha hui ci'u, mai mu pananasu pabe'a-be'a hia ja'a. Ladhe ku'a-kinu kora, ja'a hia èu mèngi-nale ètu katanga madha LAMATUA.’ 8 De mu nanene paie-iie! Mu madhutu mola-mola lii paredha ja'a ne. 9 De lamu ka asa era badha èdhi sèi, ho kèpe more kalèbho èni dhu kabèb'u dua ngi'u. Roro ho mèti sisi mai asa ja'a. Pe ja'a pananasu madhutu dad'èi ama mu. 10 Ladhe panasu kore, mèti hia ama mu na'a. Ho èle na, na hia èu mèngi-nale, heka na madhe kèna. Dènge sèmi ne'e ka, èu ka dhu abhu mèngi-nale èèna. A'a mu abhu boe.”

11 Te ngaa Yakob peka dènge ina na, “Ina! A'a ku Esau, ngi'u na dhu pènu dènge rèu, te ngaa ja'a ne, isi dhu milu aadha-aadha! 12 Mage dhoka ama ku g'ag'e isi ja'a, ladhe na ne'a na ja'a dhu leko-monya na. Hèia na dhoo ja'a!”

13 Ka ina na dhaa, aku nèngu na, “Èu baku cag'ag'a! Hud'i laa ina ka dhu ator! Ladhe ama mu dhoo èu, pe ina ka pasae! Mu mate ia ka, la more ka kahib'i sèra.”

14 Ka Yakob la'e nare kahib'i dua ngi'u sèra, hèia na roro, ka nèti hia ina na. Hèia Ribka pananasu madhutu dad'èi Isak. 15 Ka Ribka la'e nare mèdha-papake Esau dhu be'a, ho na papake mi Yakob. 16 Hèia na pahutu kahèi kacui-aai dènge ladhe goro Yakob, pake ka'uri kahib'i deo sa. 17 Ka na pangèd'u Yakob nganga'a dhu pananasu nare deo na, dènge roti dhu tunu nare.

18 Hèia Yakob ded'e nèti nganga'a se'e, hia ama na na'a. Ka na lii, aku nèngu na, “Ama. Ja'a mai hari le.”

Hèia Isak dhaa, peka na, “Hee! Èu ne, cee?”

19 Ka Yakob dhaa, peka na, “Ja'a, Esau ana mone uuru ama ku! Ja'a sab'e le, madhutu sèmi dhu ama pua deo na. Kèd'i, ho mu'a-minu ka. Lula ja'a pananasu kore le sisi badha hui dhu ja'a kèti nèti d'ara j'ami. Mu'a, ho èle na, ama pala-bagi ja'a mèngi-nale.”

20 Hèia Isak peka, aku nèngu na, “Èu ne, bia tai nga! Abhu malai titu kèna, badha hui èèna!”

Hèia Yakob dhaa, “Ja'a abhu le, lula LAMATUA dhu èu mangaj'i èèna, ka dhu tulu ja'a.”

21 Ka Isak paroa Yakob, aku nèngu na, “Padètu ku asa ne'e mai, sèna ka ja'a g'ag'e sèku èu. Èu ne, tare'a ana ja'a Esau, do aad'o?”

22 Hèia Yakob la'e padètu-dètu dènge ama na, ka ama na g'ag'e ne. Ka Isak peka, “Lii ne, sèmi lii Yakob! Te ngaa kacui-aai na, kacui-aai Esau.” 23 Te ngaa Isak dhu tadhe iia boe Yakob, lula kacui-aai na rèu sèmi Esau. Ka ropa na neo hia mèngi-nale mi Yakob, 24 na karèi hari era, aku nèngu na, “Èu ne, tare'a-re'a Esau, do?”

Hèia Yakob dhaa, peka na, “Tare'a-re'a ama. Ja'a ne, Esau!”

25 Ka Isak peka na, “Na, j'ole ka sisina mai, sèna ka ja'a ku'a. Èle ku, pe ja'a hia èu mèngi-nale.” Hèia Yakob hia sisi dènge èi anggor hia ama na na'a-ninu. 26 Na'a nare ka, Isak lii, aku nèngu na, “Ana, ee! Mai padètu asa ne'e, ho mu uu ku ja'a laa.”

27 Ka ropa Yakob padètu dènge ne, ho uu ne, Isak sangèd'u nare hèu mèdha-papake Esau. Hèia na padhai lii hia mèngi-nale mi Yakob, aku nèngu na,

30 Ropa Isak hia nare mèngi-nale mi Yakob, ka heka bhodho li'u la'e tèke eele ama na, cag'ag'a laa Esau lèpa nèti kataki badha hui. 31 Hèia la'e pananasu, ka sod'e nèti hia ama na. Ka na parèi ama na, aku nèngu na, “Ama, kèd'i mu'a. Ja'a lalau kore le sisi badha dhu ja'a kataki kore. Mu'a more ku, pe hia ja'a berkat.”

32 Te ngaa Isak malaa, ka na karèi, “Hee! Te èu ne, cee hari ne?”

Hèia Esau dhaa, aku nèngu na, “Ja'a ne'e, Esau! Ana uuru ama ku.”

33 Ka Isak cag'ag'a, hèia na karèi, aku nèngu na, “Ladhe sèmi èèna, deo na cee ka dhu hia ja'a sisi, ka ja'a ku'a èèna? Ka ja'a hia ne mèngi-nale. Aa mèngi-nale èèna, bisa heka ère hari.”

34 Ropa tadèngi nare, Esau roe ai ca palèpa, ka na tangi d'ara pèd'a dènge roma iisi, aku nèngu na, “Tasamia ne, ama, ee! Bagi hia ja'a berkat hèi ma.”

35 Hèia Isak peka, “Ari mu ka monya ja'a, ka parame nare berkat dhu pala èu di.”

36 Ka aku Esau na, “Nèngu na leko-monya ja'a dua hari kèna. Uru èèna, parame nare hak a'a. Ka ne'e ne, parame nare hari berkat dhu madhutu iia-iia na unu ja'a. Nèka na, ngara na ‘Yakob’ Te ngaa ele boe ama dhu dènge berkat era, ho hia ja'a. Do, aad'o heka?” (Yakob sasoa na ‘kèpe hui tèdhu’, te ngaa sasoa dhu leo ‘tuka leko-monya’.)

37 Hèia Isak dhaa, aku nèngu na, “Ja'a dhu ded'e le nèngu, j'aj'i lamatua èu. Aa a'ari na aa'i-aa'i ra, j'aj'i mi ènu na. Ja'a hia na le, unu are pènu soka-pènu karo, dènge hua anggor pènu ako-pènu èru. De ana, ee! Mamèngi tasamia hari, dhu ja'a ne pala-bagi mi èu?”

38 Masi ka tadèngi nare le sèmi èèna, te ngaa Esau loe boe dènge pamako ama na, peka na, “Mamèngi na dhodhoka èci di, do? Tatu ama dènge hari mamèngi dhu leo hia ja'a. Masi ka ciki oo'e èèna ka, sad'i ja'a ne abhu!” Ka Esau tangi hari dènge d'ara laho mae-mae.

39 Ka Isak b'ala ne, peka na,

41 Lula j'ara sèmi ne'e ne ka, Esau tèke d'ara dènge ari na Yakob, lula parame nare mamèngi na. Ka Esau pangee na, “Nèbhu heka, ama ku madhe. De hud'i laa, pe d'ai ku lod'o. Ladhe èle beke, ja'a pamadhe ne!”

42-43 Ropa Ribka tadèngi Esau dhu neo ad'u j'ara karehe, ka na peka dènge Yakob, aku nèngu na, “Èu nanene ku lii ne! A'a mu neo b'ala d'ara pèd'a na, de na neo pamadhe èu. De be'a risi, èu ne rai lai-lai asa to'o mu Laban, ètu kota Haran. 44 Lamu asa nèi, pea ako nèbhu, toke èle nanasa a'a mu. 45 Ladhe na bhèlu eele ku tatao èu ne, pe ja'a pua dhèu dhiu paroa èu, sèna ka èu lèpa hari mai. Lula ja'a ko'o boe, sèna ka ana ja'a dua-dua mi ele parènga d'ara ca lod'o èèna ka.”

46 Hèia Ribka roma iisi dènge Isak, peka na, “Ja'a ru'a le dènge dhèu èmu Esau, dhèu Het se! De ladhe Yakob todhe nare hari kahèi ana bhèni nèti dhèu Het se, hua iia ja'a madhe ka laa.”