Isak monya dhèu aae Abimelek
26
Ca tèka, ètu d'ara rai èèna, lèke tèu manganga, èci èèna ka dènge tèu Abraham mamuri era. Ka Isak la'e manèngi Abimelek, dhèu aae Pilistin, sèna ka na pea ètu Gerar. 2 Na tao sèmi èèna, lula LAMATUA dhu pad'elo le iisi Na mi nèngu, peka na, “Mage lamu ka asa Masir hèi. Pea la mi era dhu èèna na Ja'a paj'uj'u hia èu. 3-4 Ladhe èu manubha ètu era èèna, Ja'a sama-sama dènge èu, aa pala-bagi èu mèngi-nale rupa-rupa. Èèna na, Ja'a pabèba ana-èpu èu sama sèmi hua-hètu ètu dedha-liru. Aa Ja'a hia kateme rai ne mi èu dènge ana-èpu èu. Nèti ana-èpu èu ka, dhèu aa'i-aa'i ètu rai-haha ne abhu mèngi-nale. Dènge j'ara ne'e, Ja'a tao madhutu lii pajaji dhu Ja'a pa'èki le dènge ama mu Abraham.a 5 Ja'a tao sèmi ne'e ne, lula ama mu madhutu dad'èi Ja'a, paredha Ja'a, dènge atora Ja'a.” 6 Ka Isak pea taha ètu Gerar.7 Ribka ne, bhèni iia titu kèna. Ka ropa dhèu ètu Gerar ladhe rèdhi ne, ra pakarèi. Te ngaa Isak peka na, “Ribka ne, ana hèni ja'a.” Na madha'u, ladhe na peka na dhèu èmu nèngu, dhèu se pamadhe ne, aa Ribka parame rare. 8 Isak dhu pea nèbhu le ètu nèi, hèia ca lod'o, dhèu aae nèdhi nèti ro'a jendela na, ladhe laa na Isak dènge Ribka dhu pa'ango. 9 Ka na pua dhèu lasi paroa Isak, hèia na peka, “Isak! Ja'a dhu ke'a le, bhèni ne dhèu èmu èu! Te ngaa tasamia ka, èu peka na, nèngu ne ana hèni èu?”
Hèia Isak dhaa, aku nèngu na, “Sèmi ne'e ama! Ja'a ne madha'u, ladhe ja'a peka na nèngu ne dhèu èmu ja'a, mage dhoka dhèu pamadhe ja'a.”
10 Ka dhèu aae dhaa, peka na, “Sèmi dhèu ètu se'e j'unu dènge dhèu èmu èu, tatu èu pasala ji'i! Tasamia ka, èu ad'u j'ara ne'e mi dedha ji'i se?”
11 Èle èèna ka, dhèu aae Abimelek pasanèd'e ana kabarai na, aku nèngu na, “Miu nanene paie-iie! Cee ka dhu bani gagu dhèu ne'e, do dhèu èmu na, èèna na ja'a huku pamadhe ne.”
Ra patao-palaha lula madha èi
12 Tèu èèna, Isak sèle hini ètu dedha rai dhèu se'e. Lod'o d'ai puu-g'ètu, ka na abhu isi rai cangasu hari, lula LAMATUA hia ne mamèngi. 13 Lula mèdha-panyau na asa ae, ka na kaja titu kèna. 14 Badha-manu na sèmi sapi, kahib'i-kalèbho asa tabha ae. Dhèu-dhèu sab'a na, ae kahèi. Nèti èèna ka, dhèu Pilistin tèka d'ara dènge ne.
15 Uru èèna, Abraham, ama Isak, dhu kèi èi ae-ae. Te ngaa limuri ne, dhèu Pilistin dhènu eele aa'i si dènge rai.
16 Ka dhèu aae Abimelek peka dènge Isak, aku nèngu na, “Isak! Be'a risi èu pakèd'i ka nèti kabarai ne'e. Lula koasa èu, risi eele le nèti ji'i se.”
17 Èle èèna ka, Isak pakèd'i nèti era èèna, ka lasi pea hari ètu d'ara mamoo Gerar. 18 Ètu era ne'e, ra kèi hari madha èi dhu uru èèna, dhèu Pilistin dhènu eele aa'i si. Ka na pangare madha èi se madhutu ngara dhu ama na pangare.
19 Ropa dhèu sab'a Isak se kèi èi ètu d'ara mamoo Gerar, hèi lèke èi madha dhu sabhoka mai. 20 Lula madha èi ne'e ka, dhèu-dhèu madhenge badha nèti Gerar, patao dènge dhèu madhenge badha Isak. Dhèu se peka na, “Ne'e ne, madha èi ji'i!” Nèti èèna ka, Isak pangare madha èi na Esek, dhu sasoa na ‘patao-palaha’.
21 Hèia dhèu-dhèu Isak se, kèi hari èi leo ca madha. Te ngaa ra patao-palaha hari, lula èi èèna. Nèti èèna ka, Isak pangare na Sitna, dhu sasoa na ‘palab'a’.
22 Èle èèna ka, Isak tèke eele era èèna, la'e kèi hari èi èci. D'ai ne'e ne, ra patao-palaha heka. Ka Isak pangare madha èi ne Rehobot, dhu sasoa na ‘era taleo’. Hèia na peka, aku nèngu na, “Limuri ne, Lamatua hia le èdhi pea ètu era taleo. Ho ètu era ne'e ne, èdhi asa bèba-kacanga.”
23 Ka nèti era ne'e, Isak si lasi hari era pea asa Beer Syeba. 24 Ka mèda na, LAMATUA pad'elo iisi Na mi Isak, hèia Na peka, “Isak! Ja'a ne, Ama Lamatua nèti ama mu Abraham. De mage mu madha'u, te Ja'a ladhe-leru èu. Èèna na, Ja'a pala-bagi èu mèngi-nale. Aa ana-èpu èu asa bèba-kacanga. Ja'a ad'u madha j'ara ne'e, lula lii pajaji Ja'a dènge ama mu.”
25 Hèia Isak pudhi hadhu, tao mei korban ètu èèna. Ka na manèngi makasi mi LAMATUA. Hèia, na pea ètu era èèna, ka dhèu sab'a na kèi hari èi.
Dhèu aae Abimelek padame dènge Isak
26 Lod'o èèna, dhèu aae Abimelek mai nèti Gerar. Angalai na Ahusat, dènge kètu kapai sordad'u na, Fikol, mai dènge ne, ho paraga dènge Isak. 27 Ka Isak karèi, aku nèngu na, “Ama dhèu aae! Uru èèna, miu se dhu babège eele ja'a nèti kabarai miu. De ne'e ne, miu se mai tao ngaa hari?”
28 Hèia ra peka na, “Sèmi ne'e. Ji'i dhu nge'a le, Lamatua dhu j'aga pa'ère èu. Nèti èèna ka, ji'i pangee, hua iia èdhi dua ti pa'èki lii pajaji dhu peka sèmi ne'e: èu j'oka subha, peka na, 29 miu se baku tao karehe dènge ji'i, aa ji'i kahèi baku tao karehe dènge miu. Mema ji'i se d'ara be'a dènge miu. Nèti èèna ka, ca hari ni, miu se lami dènge mera-milu nèti kabarai ji'i ne. Ji'i dhu nge'a le, LAMATUA ka dhu pala-bagi mèngi-nale mi miu.”
30 Èle èèna ka, Isak tao pesta, ka ra'a-rinu aa'i-aa'i ra. 31 Ka asa bèli mad'ae èèna, rèngu j'oka lii soo-subha. Hèia Isak patalala si lèpa dènge dame.
32 Lod'o èèna kahèi, dhèu sab'a Isak mai peka lula-nèti èi dhu rèngu kèi, na, “Ama! Ji'i rage le èi.” 33 Hèia Isak pangare madha èi ne Syeba (dhu sasoa na ‘subha’). Ka ra pangare kota èèna Beer Syeba, toke sange ne'e.b
Esau leo dènge bhèni dhèu dua nèti suku leo