Abraham leo hari èmu
25
Ka Abraham leo hari èmu dènge bhèni èci, ngara na Ketura. 2 Hèia Ketura matana ana hia ne. Ana se, ngara ra: Simran, Yoksan, Medan, Midian, Isbak, dènge Sua. 3 Ana Yoksan ka: Seba dènge Dedan. Ana-èpu Dedan nuka, dhèu Asyur, dhèu Letus, dènge dhèu Leum. 4 Ana Midian ka: Efa, Efer, Henok, Abida dènge Eldaa. Rèngu aa'i-aa'i se, ana-èpu Ketura.5-6 Lod'o dhu Abraham mamuri era, na hag'e nare le mèdha-panyau hia ana Hagar dènge ana-ana Ketura, èci-èci ka dènge unu na. Èle èèna ka, Abraham pua si lasi pea re bèka dhimu rai Kana'an, sèna ka ra pakaj'èu nèti ana na Isak. Ka pusaka na aa'i-aa'i, na pangèd'u mi ana na Isak.
Abraham madhe
7-8 Lod'o umur Abraham d'ai 175 (ca ngasu pidhu nguru lèmi) tèu, na madhe. 9-10 Ka ana na, Isak dènge Ismael, padhane ne ètu d'ara loe Makpela, dhu padètu dènge Mamre. Rai ne, dhu uru èèna, Abraham hèli nare nèti Efron, ana Sohar, dhèu Het. Ka dhu uru èèna, ra padhane le Sara ètu d'ara loe èèna. 11 Èle madha Abraham, ka Ama Lamatua hia mèngi-nale mi Isak, ka na mamuri mera-milu. Lod'o èèna, Isak pea dètu dènge madha èi Beer Lahai Roi.
Ana-èpu Ismael
12 Ne'e ne, lii lolo nèti mamuri Ismael. Nèngu ne, ana Abraham dènge dhèu èmu limuri na, Hagar, dhu j'aj'i ènu Sara nèti Masir. 13-16 Ana-ana Ismael, mone dhèu canguru dua. Ngara ra dhu madhutu nèti dhu uru tèka d'ai ana limuri tèka, nuka: Nebayot, Kedar, Adbeel, Mibsam, Misma, Duma, Masa, Hadad, Tema, Yetur, Nafis, dènge Kedma. Ana-ana sèra ka, j'aj'i bèi-baki nèti canguru dua suku, dhu èci-èci ka dènge kabarai ra. Ra pangare kabarai ra èci-èci, madhutu ngara bèi-baki ra.
17 Ropa umur Ismael d'ai 137 (cangasu tèlu nguru pidhu) tèu, ka na madhe. 18 Te ngaa ana-èpu na sèra, èci pamusu dènge èci. Ka ra pea pahag'a, mulai nèti rai Hawila d'ai rai Syur, dhu palane dènge rai Masir, toke d'ai rai Asyur.a
Esau dènge Yakob
19 Ne'e ne, lii lolo nèti mamuri Isak, ana Abraham. 20 Lod'o Isak madhèdi dènge Ribka, umur na 40 (èpa nguru) tèu le. Ama Ribka, ngara na Betuel. Ana mone Ribka, ngara na Laban. Rèngu se, dhèu Aram, nèti Padan Aram.b
21 Ribka dhu dènge mèka ana. Nèti èèna ka, Isak manèngi-mangaj'i mi LAMATUA, sèna ka Na bhoke era ana Ribka. Hèia LAMATUA tadèngi lii manèngi Isak, ka Ribka dènge babia. 22 Te ngaa ana dhu Ribka kad'o ne, dhèu dua. Aa ana se paliku taruu ètu d'ara kabake ina ra. Ka Ribka ngee ka ètu d'ara na, “Nga tao ka ana dua se, sèmi ne'e?” Hèia na pakarèi dènge LAMATUA.
23 Ka LAMATUA dhaa, peka na,
“Ètu d'ara kabake èu na, abhu dua suku, dhu èèna na loe boe dènge pamusu.
Dhu limuri èra risi nèti dhu uru.
Ka a'a na, lalau-lalo'o ari na.”
24 Ropa lod'o d'ai, Ribka nara iisi ana mone dhèu dua. 25 Dhu a'a, isi na mea, dènge ngi'u na pènu dènge rèu. Nèti èèna ka, ra pangare ne, Esau (dhu sasoa na ‘dènge rèu’).
26 Èle èèna ka, ari na heka kalua kèna. Te ngaa dhu na kèpe hui tèdhu a'a na. Nèti èèna ka, ra pangare ne, Yakob (dhu sasoa na ‘hui tèdhu’). Lod'o Ribka nara iisi ana na se, umur Isak 60 (èna nguru tèu) kèna.
Yakob monya a'a na Esau
27 Lod'o ana dua se kapai, Esau dhu ne'a mèu kasiro badha hui. Ae ka dhu na pea ètu d'ara j'ami. Te ngaa Yakob dhu mau-mau, dhu d'èi dhoka pea ètu d'ara èmu di. 28 Isak d'èi na'a sisi badha hui. Nèti èèna ka, na sue risi Esau. Te ngaa Ribka sue risi Yakob.
29 Ca lod'o, Yakob dhu tao bubur kab'ui, aa Esau heka lèpa nèti kasiro badha hui kèna. Na lèpa dènge manganga, ka roe titu kèna. 30 Ka na peka dènge Yakob, aku nèngu na, “Ari, ee! Hia ku ja'a bubur kab'ui mea ciki ètu d'ara èru èèna, ho ja'a ku'a! Te ja'a manganga bia.” (Nèti èèna ka, ra pangare na, Edom, dhu sasoa na ‘mea’.)
31 Ka, aku Yakob na, “Be'a a'a. Te ngaa pasilu ku dènge hak a'a èèna!”c
32 Hèia Esau dhaa, aku nèngu na, “Hak a'a ne, ngaa kèna, hud'i nèngu sèna! Neo more, na more la. Te ja'a manganga bia. Sod'e mèti bubur èèna lai-lai mai, te ja'a taha heka.”
33 Te ngaa, aku Yakob hari na, “Mata ku a'a! Èu subha uuru ku, dhu peka na, èu pangèd'u le hak a'a èèna mi ja'a ne.” Ka Esau ded'e subha sèmi dhu Yakob peka. 34 Hèia Yakob sod'e dènge ka hia ne bubur kab'ui deo na dènge roti. Ropa na'a-ninu nare, ka la'e dènge ka.
Dènge j'ara ne'e ka, Esau pusi boe dènge hak a'a na.