Abraham monya dhèu aae Abimelek
20
Èle èèna, ka Abraham nèti Mamre, pidha asa rai Negeb, dhu ètu re balèu, ka na pea ètu talora rae Kades, dènge rae Syur. Te ngaa na pea nèbhu boe, ka pidha hari asa rae Gerar. 2 Hèia na peka dènge dhèu ètu sèra, aku nèngu na, “Sara ne, ana hèni ja'a.” Nèti èèna ka, Abimelek dhèu aae Gerar, pua dhèu lasi lii d'ai Sara. Ka nèti ne mai asa d'ara èmu dhèu aae. 3 D'ara ca mèda sa, Ama Lamatua pad'elo iisi Na dènge dhèu aae ètu d'ara nii. Na peka, “Mamadhe èu ne dètu kèna! Lula èu more dhèu èmu dhèu.”4-5 Hèia Abimelek dhaa, peka na, “Lamatua! Ja'a dhae pa'èci mèka dènge bhèni na. Aa ja'a sasala aad'o. Abraham unu na ka dhu peka, bhèni na, ana hèni nèngu! Aa bhèni na dhaa sèmi èèna kahèi. Nèti èèna ka, ja'a hia dhèu lasi lii d'ai ne, dènge d'ara mola. De Lamatua baku pad'ui ja'a sasala!”
6 Ka Lamatua dhaa, peka na, “Tare'a. Mema Ja'a ke'a d'ara èu mola. Nèti èèna ka, Ja'a ka dhu taha èu, ho baku pa'èci dènge ne. Dènge j'ara sèmi èèna, èu tao boe sala mi Ja'a hèi. 7 De èu mèti hari ka bhèni ne, lèpa sa dhèu èmu na. Mone na ka dhu nèti lii padhue-padhai Ja'a. De lamu manèngi ne, sèna ka na sabaj'a hia èu, ho èu baku madhe. Sanèd'e paie! Ladhe èu hia boe bhèni na lèpa, èu dènge kabarai èu madhe aa'i mèu-mèu.”
8 Bèli mad'ae aae èèna, dhèu aae pakaboko nare dhèu-dhèu kapai na aa'i-aa'i, ka na lolo lii nii na. Hèia aa'i-aa'i ra madha'u. 9 Ka dhèu aae paroa Abraham. Na karèi, aku nèngu na, “Ja'a tao sala ngaa mi èu, ka èu neo paj'èra ja'a dènge kabarai ja'a? Èu ne ele-ho'a ka dènge tao madha j'ara sèmi ne'e ne. 10 Ngangee èu tasamia ka, mu tao sèmi ne'e ne?”
11 Ka Abraham dhaa, peka na, “Ama dhèu aae! Ja'a pangee na, miu aa'i-aa'i mi, kabarai ne dhèu dhu tadhe boe Ama Lamatua. De ele boe cahag'e neo pamadhe ja'a, sèna ka parame rare dhèu èmu ja'a. 12 Mema ja'a dhu peka tare'a, nèngu ne, ana hèni ja'a. Lula ji'i dua mi ca ama, te ngaa ina baka-leo. Nèti èèna ka, ji'i dua mi paleo. 13 Ka ropa Ama Lamatua pua ji'i ho tèke eele era paleo-palu'u ji'i, lod'o èèna ja'a peka dènge dhèu èmu ja'a, aku ja'a na, ‘Ladhe èdhi lati asa era leo, ho dhèu karèi èu, dhu èdhi se dhèu èmu-kamali, ladhe èu dhu sue ja'a, na dhaa la, peka na èdhi se, dua ti pa'a'ari.”’
14-16 Èle èèna ka, dhèu aae Abimelek pangèd'u hari Sara la'e asa Abraham. Ka na peka dènge Sara, “Èèna na, ja'a hia ana mone mu doi iia ca riho, sèna ka j'aj'i tadha ja'a tao boe sala ngaa-ngaa mi èu. Ho hud'i sène, dhèu aa'i-aa'i ra re'a!”
Hèia dhèu aae peka dènge Abraham, aku nèngu na, “Kabarai ja'a ne, dhu bhoke tèke hia èu. Èu neo pea mi era mia èèna ka, ja'a hia èu.” Ka Abimelek hia Abraham sapi, kahib'i-ka'ia, dènge kahib'i-kalèbho. Na hia kahèi ènu dhèu mone dènge dhèu bhèni.
17-18 Uru èèna, lula Abimelek nare dhèu èmu Abraham, ka LAMATUA hutu eele era ana nèti bhèni aa'i-aa'i dhu pea ètu kabarai dhèu aae èèna. Te ngaa ropa Abimelek hia Sara lèpa hari sa dhèu èmu na, ka Abraham sabaj'a ho Lamatua bhoke hari era ana nèti bhèni se. Ka ra abhu hari ana.