Bhabhelu-katub'a dhèu Sodom
19
Ètu d'ara Lamatua dhu padhue-padhai era dènge Abraham, ana pajuu Na dhèu dua, lasi le asa kota Sodom. D'ai nèi, lod'o oe cèna kèna. Ka Lot dhu madhèdi ètu hèb'a tedhe kota.a Ropa nèdhi dhèu dua se, la'e soru nare si. Ka na patitu kètu urutuu, aa pacud'u kètu ètu madha ra. 2 Ka na padhai lii, aku nèngu na, “Mai lati dhuli ku èmu ja'a la. Sèna ka ama si rase haga, aa j'unu ètu èmu ja'a. Pe bèli mad'ae, heka ama si kako hari kèna.”Ra dhaa, aku rèngu na, “Makasi. Te ngaa repo ia ka. Hud'i laa ji'i j'unu ètu d'ara lapa.”
3 Te ngaa Lot pamako si loe boe, ka lasi manubha asa èmu na. Ka Lot si tunu roti, lalau mei, ka ra'a-rinu pa'èci. 4 Dhu dua ra lasi mèka j'unu, cag'ag'a laa, dhèu mone Sodom aa'i-aa'i, ana mone ngèru toke d'ai mone heka, mai reo rare èmu Lot. 5 Dhèu se'e pa'oo-parodha, peka mi Lot, aku rèngu na, “He, Lot! Mone dua deo sa, ètu mia? Bhabhodho si mai, sèna ka ji'i j'unu dènge ra!”
6 Hèia Lot li'u la'e, ka na bèdho hari èmu. 7 Ka na lii, aku nèngu na, “A'ari, ee! Baku miu tao bhelu mi tamu ja'a se. 8 Mi nanene ku ja'a laa! Ana bhèni ja'a, dhèu dua. Dua ra dhu pa'èci mèka dènge dhèu mone. Ja'a hia miu. Mere, ho mi tao tasamia èèna ka, sad'i madhutu dad'èi miu. Sad'i miu baku tao karehe mi tamu ja'a dhèu dua se. Lula madhutu ad'a èdhi, ja'a ka dhu hud'i j'aga si.”
9 Masi ka sèmi èèna, dhèu Sodom se pa'oo ma'ète boe, aku rèngu na, “Èu ne, baku patabha! Te èu ne, dhèu tao mai ètu kabarai ji'i ne! De èu dènge boe hak ho kai ji'i. Hua iia, èu pakaj'èu nèti era ne'e. Te, ladhe lamu boe, ji'i tao èu bia risi nèti dhèu dua se'e!” Ka ra tule eele Lot, hèia aa'i-aa'i ra rai lasi j'èje babèdho èmu.
10 Te ngaa dhèu dua se soro kacui-aai ra, ère pamaso Lot, ka ra patèke èmu nèti d'ara. 11 Dua ra tao pabèdhu ana madha dhèu Sodom aa'i-aa'i ra, ka rèdhi heka ngaa-ngaa. Ra gogo tenge babèdho, te ngaa abhu boe.
Lamatua kalua eele Lot si nèti Sodom
12-13 Hèia tamu dhèu dua se, peka dènge Lot, aku rèngu na, “LAMATUA ne'a le, bhabhelu-katub'a dhèu Sodom se. Nèti èèna ka, Na paleha ji'i dua mi mai, sèna ka palaho eele kota ne. De èu dhu dènge a'ari leo dhu ètu d'ara kota ne, do aad'o? Ladhe dènge ana mone, do ana bhèni, do dhèu èmu ana èu, do, sad'i cee èèna ka, lamu more si, ho rai ka nèti d'ara kota ne lai-lai!”
14 Hèia Lot la'e paraga dènge ana mone dhèu dua, dhu lii d'ai ana bhèni na. Ka na peka, “Dua mi nanene paie! Rai ka nèti d'ara kota ne, te LAMATUA neo palaho eele ne!” Te ngaa ra pangee na, Lot padhai lii paleko di.
15 Bèli mad'ae aae era, ana pajuu Lamatua dhèu dua se, pakaseti Lot si, ho lasi karohe asa era kaj'èu. Ra peka na, “Lami ka! Ère mèti dhèu èmu mu, dènge ana bhèni èu dhèu dua sèra, ho rai ka. Tèke eele kota ne'e! Mage dhoka miu madhe aa'i palere-lere dènge kota ne.”
16 Te ngaa Lot neka-neka era, masi ka LAMATUA neo hia ne mamuri. Nèti èèna ka, tamu dhèu dua se nuni Lot, dhèu èmu na, dènge ana bhèni dhèu dua sèra, rèti asa li'u kota. 17 Hèia ca dhèu nèti tamu dhèu dua sèra paredha si, peka na, “Rai palasa, sèna ka abhu sod'a! Mage mi kabib'a kabodho! Baku ae ètu d'ara mamoo! Rai taruu, asa ledhe nèi, sèna ka miu baku madhe!”
18 Te ngaa Lot peka, aku nèngu na, “Iraa ee! Baku sèmi èèna! 19 Mema ama si pamamuri le ji'i se. Te ngaa ledhe nèi kaj'èu bia nèti ne'e! Mage dhoka ji'i d'ai mèka nèi, j'aj'èra dhu magee nare le ji'i èèna, ètu talora j'ara. 20 Ama ladhe ku laa. Rae iiki cue dhu kaj'èu boe nèti era ne'e. Rae nèi dhu kolongara aad'o. Ladhe ama d'èi, ji'i la'a pasoru iisi asa nèi!”
21 Ka na dhaa, peka na, “Oo! Lami ka! Te èèna na, ja'a palaho boe rae nèi. 22 De rai karohe ka, lami asa nèi! Te ja'a tao mèka ngaa-ngaa, ladhe miu d'ai mèka era nèi.” Karèi nèti lod'o èèna, dhèu pangare rae ne Soar, dhu sasoa na ‘ana iiki-iiki’.
Kota Sodom dènge Gomora kèpu-ladhu ai
23 Ropa lod'o rea, Lot si d'ai Soar. 24 Cag'ag'a laa, LAMATUA sadutu ai dènge èi nasu nèti dedha-liru asa Sodom dènge Gomora. 25 LAMATUA pakèpu-ladhu ai kota dènge rae aa'i-aa'i ètu d'ara rai èèna, dènge ngaa-ngaa dhu mamuri ètu èèna, nuka: dhèu, badha-manu, dènge ana aaj'u.
26 Lod'o rèngu rai, dhèu èmu Lot kabib'a kabodho. Cag'ag'a laa, na j'aj'i agarii masi.
27 Asa bèli èèna, dhu mad'ae aae era, Abraham la'e asa era dhu med'a na, na pamako LAMATUA. 28 Hèia na ladhe sa haha asa Sodom dènge Gomora, aa asa d'ara mamoo èèna. Na ladhe la'a na, sèb'u poka-poka sèna, dhu ca'e asa dedha-liru. Aa ai na'e aa'i le ngaa-ngaa.
29 Ama Lamatua patalale Lot si nèti hahuku èèna, ropa Na pakèpu-ladhu ai kota-kota sèra, lula Na ngee nèdhi lii pajaji Na dènge Abraham.
Lot dènge ana-ana bhèni na
30 Lod'o èèna, Lot madha'u pea taruu ètu rae Soar. Nèti èèna ka, nèngu dènge ana bhèni na dhèu dua sèra, lasi asa ledhe ka ra pea ètu d'ara loe cue.
31 Ca lod'o, ana bhèni uru èèna, peka dènge ari na, aku nèngu na, “Ètu era ne'e ne, abhu boe dhèu mone ca dhèu sa, dhu bisa leo dènge èdhi se. Aa ama èdhi asa heka, de ladhe èèna na, na bisa heka abhu ana. 32 De be'a risi, ti hia ne ninu mahu, sèna ka èdhi dua ti j'unu dènge ne, ho ti abhu kolo hia ama èdhi.”
33 Ka ropa d'ai mèda, dua ra hia ama ra ninu èi anggor toke mahu. Hèia ana bhèni uru èèna, la'e j'unu dènge ama na. Lula ama na dhu mahu ae, ka ne'a boe nèngu dhu j'unu dènge ana na.
34 Hèia asa bèli èèna, a'a na peka dènge ari na, aku nèngu na, “Mèda deo na, ja'a j'unu le dènge ama èdhi. De mèda ne'e, èu kèna. Èdhi hia ne hari ninu mahu, ho lamu j'unu dènge ne. Sèna ka èdhi dua ti abhu ana, ho hia ana-èpu mi ama èdhi.”
35 Ka d'ara mèda na, dua ra hia hari ama ra ninu mahu. Ka ana bhèni limuri ne, la'e ka j'unu dènge ama na. Te ngaa, lula ama ra dhu mahu titu kèna, nèti èèna ka, ne'a boe ngaa dhu nèngu tao mi dedha ana bhèni na.
36 Dènge j'ara ne'e ne ka, dua ra dènge babia nèti ama d'èlu rèngu. 37 Hèia ana bhèni uru èèna nara iisi ana mone ca dhèu. Ka na pangare na Moab (dhu sasoa na ‘mai nèti ama’). Ana ne'e ka dhu j'aj'i bèi-baki nèti dhèu Moab. 38 Ka ana bhèni limuri ne, nara iisi ana mone èci kahèi. Na pangare na Ben Ami (dhu sasoa na ‘mai nèti dhèu ja'a’). Ana ne ka dhu j'aj'i bèi-baki nèti dhèu Amon.b