Dhèu tèlu mai paraga dènge Abraham
18
Ca tèka, Abraham pea padètu dènge aj'u aae canau ètu Mamre. LAMATUA mai pad'elo iisi Na mi nèngu ètu era èèna. Lii lolo na sèmi ne'e ka: lod'o èèna, sagoro ae titu kèna, ka Abraham madhèdi ètu hèb'a paleo na, sèna ka abhu ngèlu g'oro ciki. 2 Ropa Abraham boti kètu na, ladhe nèdhi dhèu tèlu dhu titu kaj'èu boe nèti era èèna. Hèia na rai la'e soru nare si. Ropa na d'ai madha si, na patitu kètu urutuu na, 3 ka na peka, aku nèngu na, “Ama si. Mai dhuli ku ho minu èi ciki. 4 Ama si ae ciki mi mamaho ne'e. Ho ana-ana iiki rèti èi, sèna ka rasa haga miu. 5 Pe ja'a laku lalau nganga'a-nginu ho ama si mi'a ciki, sèna ka ako kadhii ciki, heka lami taruu kèna. Te ja'a karej'e bisa lalau ama si.”Ka ra dhaa, aku rèngu na, “Ooo. Ji'i dhuli.”
6 Hèia Abraham pamèri sa d'ara paleo, la'e peka dènge Sara, aku nèngu na, “Mèri! More tarigu dhu be'a risi, ca saku, ho tao roti!”a
7 Ka rai la'e hari asa era sapi na, hèia kèpe ana sapi kabèb'u ci'u. Ka na pua dhèu sab'a na sa, pare. 8 Hèia la'e nare susu, keju dènge sisi dhu heka nasu èèna, nèti hia tamu sèra ra'a. Abraham titu taruu ètu mamaho aj'u, ho na lalau si.
9 Hèia ra karèi ne, aku rèngu na, “Dhèu èmu mu Sara, ka mia?”
Na dhaa, aku nèngu na, “Nuka d'ara paleo èèna.”
10 Ka ca dhèu nèti rèngu se padhai lii, aku nèngu na, “Pe d'ai tèu mai nèi, Ja'a lèpa hari mai. Lod'o èèna, dhèu èmu èu Sara nare iisi le ana mone ca dhèu.”
Ropa rèngu padhai lii èèna, Sara nanene nèti kabodho babèdho. 11 Lod'o èèna, Abraham dènge Sara dhu heka bhoro le, ngaa hari Sara dhu abhu heka hèru. 12 Ropa Sara tadèngi padhue-padhai rèngu se, ka na mari kèmu. Na pangee na, “Ja'a dhu heka roto-roto sèmi ne'e ne, aa dhèu èmu ja'a dhu roe nia heka. Tasamia ji'i bisa tao sèmi ana ngèru dhu leo-èmu hiu, ho abhu ana?”
13 Ka LAMATUA peka dènge Abraham, aku Nèngu na, “Nga tao ka Sara mari? Ele boe na ngee na, lii padhai Ja'a ne j'aj'i boe, lula nèngu heka le. 14 Ja'a ne, LAMATUA! Abhu boe ngaa èci sa dhu Ja'a bisa boe tao. Sanèd'e paie. Tèu mai, ladhe Ja'a lèpa hari mai, Sara dhu nara iisi le, ana mone ca dhèu.”
15 Ropa tadèngi lii èèna, Sara j'aj'i madha'u. Ka na pasili, aku nèngu na, “Ja'a mari boe, nga!”
Te ngaa Lamatua b'ala, na, “Deo na, èu mari, nga.”
Abraham pamako Lamatua sèna ka baku huku dhèu Sodom
16 Èle ka, dhèu tèlu se pakèd'i neo lasi asa kota Sodom. Ka Abraham lere si d'ai talora j'ara. Nèti era èèna, ladhe rèdhi kota Sodom. 17 Ka LAMATUA ngee ètu d'ara Na, “Hua iia Ja'a peka dènge Abraham, Ja'a neo palaho kota Sodom. 18 Te ladhe èèna na, ana-èpu na asa tabha ae, aa suku dhu kapai. Aa nèngu ne, èèna na, j'aj'i berkat mi suku aa'i-aa'i ètu rai-haha ne. 19 Ja'a hag'e kore le nèngu, ho na nori ana-èpu na dènge dhèu leo, sèna ka madhutu taruu j'ara LAMATUA, ho ra mamuri dènge mola. Ladhe rèngu mamuri sèmi èèna, Ja'a tao aa'i lii dhu Ja'a pajaji dènge Abraham.”
20 Hèia LAMATUA peka dènge Abraham, aku Nèngu na, “Sèmi ne'e! Ja'a tadèngi le, lii roma iisi dhèu ae, peka na, dhèu kota Sodom dènge Gomora bhabhelu ra seli-kolane. 21 Nèti èèna ka, Ja'a puru madha ku mai, sèna ka kèdhi unu ku, ngaa dhu Ja'a tadèngi sèra, tare'a, do aad'o. Ladhe aad'o, pe Ja'a ke'a unu ku.”
22 Ropa LAMATUA padhai lii era dènge Abraham, dhèu dua se lasi taruu sa kota Sodom. 23 Hèia Abraham la'e padètu dènge Lamatua, ka na pamako Na, peka na, “Tasamia? Ama neo pamadhe aa'i dhèu-dhèu be'a pa'èci dènge dhèu-dhèu bhelu, do? 24 Ladhe abhu dhèu lèmi nguru dhu be'a ètu d'ara kota èèna, Ama pamadhe si hèi? Do, Ama palaho heka kota sèra, lula rèngu se'e, do? 25 Ama baku tao sèmi èèna! Mage dhoka, dhèu be'a sèra madhe hèi, lula Ama neo pamadhe dhèu bhelu sèra. Ama ka dhu pama'ète lii ètu dedha-liru dènge rai-haha. De Ama ku unu Mu dhu me'a j'ara èèna adil boe.”
26 Ka LAMATUA dhaa, peka na, “Ladhe abhu dhèu be'a lèmi nguru dhèu ètu kota Sodom, Ja'a huku boe kota èèna, lula rèngu.”
27 Hèia Abraham padhai lii hari, aku nèngu na, “Ama, ja'a manèngi abho, lula ja'a neo padhai lii hari ciki. Ja'a ne dhoka dhèu goa di, dhu ke'a boe ngaa-ngaa. 28 Sèmi d'ai boe dhèu lèmi nguru dhu be'a, te ngaa dhoka èpa nguru lèmi di, tasamia? Kura dhoka dhèu lèmi di, na Ama neo palaho eele kota èèna, do?”
Ka Lamatua b'ala, aku Nèngu na, “Ladhe Ja'a abhu dhèu be'a èpa nguru lèmi, Ja'a palaho boe kota èèna.”
29 Ka Abraham pamako hari, na, “Sèmi abhu dhoka èpa nguru dhèu be'a di, tasamia, Ama?”
Ka Na dhaa, “Ladhe Ja'a abhu èpa nguru dhèu be'a, Ja'a huku boe si.”
30 Abraham pamako hari, aku nèngu na, “Ama baku nasa. Te abhu dhoka tèlu nguru dhèu be'a di, na tasamia?”
Hèia Na dhaa, “Ladhe Ja'a abhu tèlu nguru dhèu be'a, Ja'a huku boe si.”
31 Hèia Abraham peka hari, “Ama mage nasa ladhe ja'a karèi hari ciki. Sèmi abhu dhoka dhèu dua nguru di dhu be'a, na tasamia?”
Ka Na dhaa hari, aku Nèngu na, “Sèmi abhu dhèu dua nguru di dhu be'a, Ja'a palaho eele boe kota èèna.”
32 Ka Abraham katange lii padhai na, aa na karèi, peka na, “Ama! Ja'a padhai lii hari ca tèka, te ngaa baku nasa dènge ja'a. Tasamia, ladhe abhu dhoka canguru dhèu di dhu be'a?”
Hèia Na dhaa, “Ladhe Ja'a abhu canguru dhèu dhu be'a ètu era èèna, Ja'a palaho boe kota èèna.”
33 Padhai lii èle sèmi èèna, LAMATUA la'e dènge ka, aa Abraham lèpa kahèi.