3 Hèia Abram patitu kètu urutuu, ka na pacud'u kètu d'ai rai. Ka Ama Lamatua tuhu hari lii padhai lii Na, aku Nèngu na, 4-5 “Lii pajaji Ja'a dènge èu sèmi ne'e ka: èèna na, èu j'aj'i bèi-baki nèti suku ae-ae. Nèti èèna ka, èu pake ia ka ngara èu Abram (dhu sasoa na ‘ama dhu dhèu tadhe’), te ngaa Abraham (dhu sasoa na ‘bèi-baki nèti suku ae-ae’). 6 Ja'a neo pabèba kacanga ana-èpu èu ae-ae. Ja'a paj'aj'i si suku ae-ae. Aa Ja'a ded'e dhèu aae ae nèti rèngu sèra.

7 Ja'a sanèd'e taruu lii pajaji Ja'a dènge èu, aa dènge ana-èpu èu sèra. Lii pajaji ne ma'ète boe toke taa-taa, lula Ja'a ne'e ka Ama Lamatua nèti èu dènge ana-èpu mu. 8 Rai Kana'an ne aa'i-aa'i, bèli-camèd'a Ja'a hia mi èu dènge ana-èpu èu. Ne'e ne, èu dhoka pea manubha di ètu ne'e. Te ngaa èèna na, j'aj'i mi unu ana-èpu èu toke taa-taa. Aa Ja'a j'aj'i Ama Lamatua rèngu sèra kahèi. 9-10 Te ngaa èu dènge ana-èpu èu sèra, hud'i kèpe pa'èra lii pajaji ne, dènge d'ara kateme ku. Dhèu mone aa'i-aa'i ra, hud'i suna ku. 11-13 Ne'e ne, mone aa'i-aa'i hud'i suna, mulai nèti umur aru lod'o. A'ari èu, dhèu-dhèu sab'a èu, dènge ènu dhu èu hèli more nèti rai leo, aa'i-aa'i ra hud'i suna si. Suna na j'aj'i tadha mi ngi'u miu, dhu pa'èki èdhi taa-taa. 14 Mone mia dhu suna boe, rèngu sèra maso boe ètu d'ara lii pajaji Ja'a ne, aa rèngu sèra j'aj'i boe dhèu Ja'a kahèi.”

15 Èle èèna ka, Ama Lamatua peka hari, aku Nèngu na, “Nèti deo ne'e ne, èu paroa ia ka ngara dhèu èmu mu Sarai, te ngaa Sara. 16 Èèna na Ja'a hia mamèngi ae-ae mi Sara, sèna ka nara iisi hia èu, ana mone ca dhèu. Tare'a! Bèli-camèd'a, Sara j'aj'i bèi nèti suku ae-ae. Aa èèna na, Ja'a ded'e dhèu aae ae-ae nèti ana-èpu nèngu.”

17 Hèia Abraham patitu kètu urutuu ka pacud'u kètu d'ai rai. Te ngaa na mari ètu d'ara. Na pangee, na, “Mone heka bhora dhu cangasu tèu sama sèmi ja'a ne, bisa abhu ana era? Aa Sara dhu heka gagoo-gagehu ne, dhu ceo nguru tèu kèna, nara iisi hari sa mia?” 18 Ka na peka dènge Lamatua, aku nèngu na, “Hud'i ka laa, Ismael ka dhu abhu pusaka ja'a èèna ka, ngaa-ngaa tao boe.”

19 Te ngaa aku Ama Lamatua na, “Aad'o sèmi èèna! Bèli-camèd'a, dhèu èmu mu Sara, nara iisi ana mone ca dhèu. Pangare ne Isak. Lii jaji Ja'a ne, lèke mi nèngu dènge ana-èpu na toke mia-mia. 20 Ja'a tadèngi le ngaa dhu èu manèngi kahèi, hia Ismael. Nèti èèna ka, Ja'a hia berkat mi nèngu kahèi, aa hia ana-èpu na tabha ae. Bèli-camèd'a ana-èpu Ismael ne, j'aj'i mi canguru dua kapala suku. Aa ana-èpu na suku èci dhu kapai. 21 Masi ka sèmi èèna, lii pajaji Ja'a ne, lèke dhoka mi ana mu Isak di. Tèu mai ni, hèru sèmi ne'e kahèi, Sara nara iisi le.” 22 Ropa padhai lii nare, ka Ama Lamatua tèke eele Abraham.

23-27 Lod'o èèna kahèi, Abraham tao dènge ka, madhutu sèmi lii paredha Ama Lamatua. Ka na suna. Na suna ana na, Ismael, dènge dhèu mone aa'i-aa'i dhu pea dènge ne. Lod'o èèna, umur Abraham 99 (ceo nguru ceo) tèu le, aa Ismael 13 (canguru tèlu) tèu.