Hagar dènge ana na Ismael
16
1-3 Tèu èèna, Abram lèpa hari le nèti Masir, ka na pea le canguru tèu ètu Kana'an. Dhèu èmu na Sarai abhu mèka kolo. Sarai dènge ènu bhèni ca dhèu nèti Masir, ngara na Hagar.Ca lod'o, Sarai peka dènge Abram, aku nèngu na, “A'a. LAMATUA hia boe ja'a ana. De hua iia, lamu j'unu dènge ènu ja'a, Hagar, sèna ka na hia ja'a ana.”
Ka Abram madhutu lii dhèu èmu na. Ka Sarai hia Hagar j'aj'i dhèu èmu ka dua Abram. 4 Hèia Abram j'unu dènge Hagar, ka na dènge babia. Ropa Hagar ne'a nèngu dènge babia le, ka na padedha iisi na, aa na pahae heka Sarai.
5 Ka Sarai peka dènge Abram, aku nèngu na, “Ja'a ka dhu hia nèngu mi èu j'aj'i dhèu èmu ka dua. Te ngaa ropa na dènge babia, na pusi pahae heka ja'a! Ne'e ne, sala èu! De hud'i laa, sèna ka LAMATUA ka dhu pama'ète lii èdhi dua ti! Heka èu me'a kèna!”
6 Ka Abram dhaa, peka na, “Sèmi ne'e, wee! Èu ne, dhèu èmu uru. Aa nèngu, dhèu èmu limuri. De èu ne dhu mèd'u paredha. De èu neo tao ne tasamia, èèna ètu èu na!” Ka Sarai mulai tao sakaa hua dènge Hagar, hèia na rai.
7 Na rai d'ai d'ara mamoo. Hèia ana pajuu LAMATUA nèti sorga ca dhèu, rage ne dètu dènge madha èi, ètu j'ara la'e asa Sur. 8 Ka na lii, aku nèngu na, “Èu ne Hagar, ènu Sarai. Nga tao ka èu ètu ne'e? Èu mai nèti mia, aa lamu mia?”
Hèia Hagar dhaa, aku nèngu na, “Ja'a rai nèti d'ara èmu lamatua ja'a.”
9 Ka ana pajuu èèna pamako ne, aku nèngu na, “Sèmi ne'e! Be'a risi, èu lèpa hari asa adhe-aai Sarai, lamatua èu. Masi ka na tao èu tasamia èèna ka, sèmi la. 10 Baku madha'u. Bèli-camèd'a, Ja'a pabèba ana-èpu èu pa'ae-ae, toke dhèu ige rare boe. 11 Èu dhu dènge babia. Nèbhu heka, èu mora iisi ana mone ca dhèu. Èèna na mu pangare ne Ismael (dhu sasoa na ‘Lamatua tadèngi’), lula LAMATUA tadèngi le lii roma iisi èu. 12 Ropa ana ne kapai, na mamuri pakaj'èu nèti a'ari na. Lula nèngu ne, sama sèmi jara hui dhu d'èi boe nanene lii paredha. Sad'i dhèu cee èèna ka, na sisu. Aa dhèu aa'i-aa'i lab'a ne kahèi.”
13 Ropa tadèngi nare, Hagar ngee ka ètu d'ara na, aku nèngu na, “Ja'a kèdhi le LAMATUA, dhu ladhe-leru aa madhenge ja'a.” Hèia na hia ngara mi Lamatua, “Lamatua dhu ladhe-leru ja'a.” 14 Nèti èèna ka, dhèu pangare madha èi na, Beer Lahai Roi, dhu sasoa na “Madha èi nèti Nèngu dhu mamuri, dhu ladhe-leru ja'a.” Era na, ètu talora aae nèti rae Kades dènge rae Beret. Madha èi ne, abhu era toke d'ai sange ne'e.