Ama Lamatua pajaji dènge Abram
15
Èle èèna ka, LAMATUA pad'elo iisi Na mi Abram. Ka Na peka, aku Nèngu na, “Abram! Èu baku madha'u. Lula Ja'a ka dhu j'aj'i mi tami ho bhiri èu nèti musu. Aa Ja'a hia a'oto mi dedha èu.”2-3 Te ngaa, aku Abram na, “Masi ka Ama Lamatua hia ae-ae èèna ka, j'aj'i boe mi ngaa sa èci. Lula ja'a ne dènge boe ana matana, ho hia ja'a ana-èpu. De dhu neo unu ae-ae sèmi èèna, tao mi ngaa? Neu-neu ka, noto mi ènu ja'a Elieser, dhèu Damsik èèna. Nèngu ka dhu sèmi nare aa'i-aa'i.”
4 Te ngaa LAMATUA dhaa na, “J'ara na sèmi boe èèna! Ana d'èlu èu ku, dhu unu pusaka sèra. Ènu èu abhu boe.”
5 Hèia nèti Abram asa li'u, ka Na peka, “Èu ladhe ku asa dedha-liru nèi. Ladhe paie ku hua-hètu sèi. Bisa iga more, do aad'o? Bèli-camèd'a, ana-èpu èu sama sèmi hua-hètu sèi!”
6 Ka Abram sèmi nare lii padhai LAMATUA. Aa LAMATUA tadhe ne, dhèu mola, lula Abram lèka Ne.
7 Èle èèna ka, LAMATUA tuhu hari lii Na, “Ja'a ne, Ama Lamatua. Ja'a ka dhu lere kèti èu nèti rae Ur, ètu rai dhèu Kasdim sèra. Aa rai ne'e ne, Ja'a hia èu, sèna ka j'aj'i pusaka mu.”
8 Te ngaa Abram karèi, aku nèngu na, “Tasamia, LAMATUA? Dènge j'ara sa mia ka ho ja'a ke'a na, rai ne j'aj'i pusaka ja'a?”
9 Ka Na dhaa, peka na, “Sèmi ne'e! Mai ti tao madha j'ara èci, dhu pa'èki lii padhai lii Ja'a deo na. De lamu more sapi rena ci'u, kahib'i rena ci'u, dènge kahib'i-kalèbho mone ci'u. Aa'i-aa'i sèra hud'i dhu umur tèlu tèu. Aa mèti kahèi koro iia ci'u, dènge koro j'aha ci'u.”
10 Ka Abram la'e nare badha sèra. Hèia na kacèb'e bagi mi dua, sapi, kahib'i, dènge kahib'i-kalèbho sèra. Ka na pale sisi se mi rai, dhu èci patangara dènge èci, j'aj'i mi dua b'aris. Te ngaa na kacèb'e boe manu-bhui sèra. 11 Ka manu-bhui dhu tema ra'a sisi sèra, mai ho neo ra'a sisi se'e. Te ngaa Abram bhabhoo eele si.
12 Ropa lod'o cèna, Abram bhèj'i luu. Na nii, kuri na maroga mai sarimu nare nèngu, ka na madha'u titu kèna.
13-15 Ka Ama Lamatua peka dènge ne,
“Abram! Èèna na èu mamuri toke heka bhoro, aa madhe dènge be'a, ka ra padhane èu dènge be'a.
Te ngaa ana-èpu èu, èèna na j'aj'i dhèu tao mai ètu kabarai dhèu.
Ho èèna na, dhèu isi rai sèra, tao si sèmi ènu sa, ka ra ènyi aa paj'èra si, toke èpa ngasu tèu.
Te, ladhe èèna na, Ja'a huku si.
Ho èèna na, Ja'a kèti hari ana-èpu èu nèti era èèna, aa dènge mèdha-panyau ra ae-ae.a
16 Aa èèna na, Ja'a ator ho ana-èpu èu dhu ka lèmi kèti hari si asa ne'e mai.
Limuri ne, dhèu Amori dhu pea ètu rai ne'e. Dhèu se'e dhèu bhelu, te ngaa dhae bhelu iia mèka.
Ladhe ana-èpu èu sèra lèpa hari asa era ne'e, Ja'a neo pake si ho huku palaho dhèu Amori sèra. Lula d'ai taa èèna, bhabhelu ra asa hino.”
17 Ropa d'ai mèda sa, cag'ag'a laa ètu era èèna, abhu èru rai èci dhu sèb'u poka-poka, dènge badhu ai èci dhu heo, kako re sasanga sisi dua baris se. 18 Lod'o èèna, LAMATUA pa'èki lii pajaji dènge Abram. Na peka na, “Ja'a jaji mema èu kèna, bèli-camèd'a Ja'a pangèd'u mi ana-èpu èu rai ne'e ne, mulai nèti loko Masir,b d'ai loko Efrat, 19 dènge rai dhèu Keni, dhèu Kenas, dhèu Kadmon, 20 dhèu Het, dhèu Feris, dhèu Refaim, 21 dhèu Amori, dhèu Kana'an, dhèu Girgasi, dènge dhèu Yebus.”