Abram la'e parame nare Lot nèti kacui-aai musu
14
Tèu èèna, dhèu aae èpa dhu pa'èci. Rèngu se ka: Amrafel, dhèu aae rai Sinear. Ariok, dhèu aae rai Elasar, Kedarlaomer, dhèu aae rai Elam. Dènge Tideal, dhèu aae rai Goyim. 2 Lod'o èèna, dhèu aae leo dhèu lèmi, pa'èci kahèi. Nuka: Bera, dhèu aae rai Sodom. Birsa, dhèu aae rai Gomora. Sinab, dhèu aae rai Adema. Semeber, dhèu aae rai Seboim. Dènge Bela, dhèu aae rai Soar. Ka èpa dhèu aae se, lasi pamusu dènge lèmi dhèu aae sèra. 3 Dhèu aae, dhèu lèmi sèra pakaboko dènge sordad'u ra, ètu d'ara mamoo Sidim, (dhu limuri ne, ngara na Dhasi Madhe).4 J'aj'aj'i pamusu na, sèmi ne'e ka: Uru èèna, dhèu aae, dhèu lèmi se dhu ta'alo mi dhèu aae Kedarlaomer, canguru dua tèu kèna. Te d'ai tèu ka canguru tèlu, ka rèngu aa'i-aa'i ra lab'a ne.
5 Ka maso tèu ka canguru èpa, Kedarlaomer dènge angalai na dhèu aae dhèu tèlu sera, mai dènge sordad'u ra. Hèia ra pamusu ka, ka ra segi pèri-pèri rai. Nuka: dhèu Refaim ètu rai Asterot-Karnaim; dhèu Susim ètu rai Ham; dhèu Emim ètu rai Sawe-Kiryataim, 6 dènge dhèu Hori dhu ètu ledhe Seir, d'ai sebhe mamoo El Paran. 7 Èle èèna ka, ra lèpa hari asa En Mispat (dhu limuri ne ngara na Kades). Ka ra segi rai dhèu Amalek, dènge dhèu Amori dhu pea ètu rae Haseson-Tamar.
8-9 Hèia, lèmi dhèu aae se ator sordad'u ra ètu d'ara mamoo Sidim, ka lasi pamusu dènge dhèu aae dhèu èpa sèra. 10 Ètu d'ara mamoo èèna, dhu abhu mananga èi dama pèri-pèri. Ropa ra pamusu, dhèu aae Sodom dènge dhèu aae Gomora dènge sordad'u ra, rai. Ka cahag'e manahu asa d'ara mananga èi dama se. Aa cahag'e hari rai asa ledhe lasi. 11 Ka èpa dhèu aae dhu segi se, lasi parame rèti mèdha-panyau dènge nganga'a-nginu nèti Sodom dènge Gomora. Èèna ka, ra lèpa dènge ka.
12 Te ngaa Lot, ana ari Abram, dhu pea ètu Sodom. Ka èpa dhèu aae sèra, ère rèti Lot si, dènge mèdha-panyau ra aa'i-aa'i.
13 Te ngaa dhèu èci rai nèti era èèna. Ka la'e lolo dènge Abram, dhèu Ibrani èèna. (Lod'o èèna, dhèu Amori èci, ngara na Mamre. Aa Abram pea dètu dènge aj'u-aj'u aae unu Mamre. A'ari Mamre dhèu dua, ngara na Eskol dènge Aner. Rèngu se dhu pa'anga dènge Abram.) 14 Ropa Abram tadèngi na dhèu kèpe rèti le Lot, ana ari na, ka Abram pakaboko nare dhèu-dhèu sab'a na dhu re'a pamusu. Aa'i-aa'i ra 318 (tèlu ngasu canguru aru) dhèu. Ka lasi magèla èpa dhèu aae sèra, asa badae aae lasi d'ai rae Dan.
15 Ètu era èèna, Abram hag'e dhèu na sèra, mi pèri-pèri kaboko. D'ara mèda èèna kahèi, lasi age si, dènge j'ara pa'oke. Ka Abram si lasi bate dhèu se d'ai rae Hoba, ètu bèka badae kota Damsik. 16 Hèia Abram abhu hari Lot, dènge dhèu-dhèu nèngu, aa dènge mèdha-panyau ra aa'i-aa'i. Na abhu kahèi dhèu-dhèu leo.
Melkisedek la'e paraga dènge Abram. Nèngu ne, ca dhèu dhèu aae aa ama agama kahèi
17 Ropa Abram segi nare dhèu aae èpa sèra, ka na lèpa. Hèia dhèu aae Sodom mai soru ne ètu d'ara mamoo Sawe (dhu dhèu biasa peka na, Mamoo Dhèu Aae). 18 Tèu èèna, Melkisedek, j'aj'i dhèu aae kota Salem.a Aa nèngu ne j'aj'i kahèi ama agama nèti Ama Lamatua dhu Dedha Risi Eele. Na mai soru Abram, nèti roti dènge èi hua anggor. 19-20 Ka na padhai lii ho hia berkat mi Abram, aku nèngu na, “Ja'a sanao sèna ka Ama Lamatua, dhu Dedha Risi Eele èèna, dhu paj'aj'i dedha-liru dènge rai-haha ne, hia mèngi-nale mi dedha èu. Koa-kio Ama Lamatua dhu hia le èu segi musu.”
Èle èèna ka, Abram bagi hia Melkisedek ca pala nèti canguru pala mèdha-panyau dhu na abhu hari sèra.
21 Hèia dhèu aae Sodom èèna pahaha iisi na mi Abram, peka na, “Ama. Mèdha-panyau dhu èu abhu hari nèti musu ja'a sèra, hud'i laa ama ku abhu aa'i si. Te ngaa dhu ja'a manèngi hari, dhoka dhèu-dhèu ja'a sèra.”
22 Hèia Abram b'ala ne, peka na, “Ja'a subha ètu madha Ama Lamatua dhu Dedha Risi Eele, dhu tao dedha-liru dènge rai-haha, 23 na, ja'a kore boe mèdha-panyau èu, masi ka ciki èèna ka. Masi ka loa hèngu ca'èta sa, ja'a kore boe. Dènge j'ara sèmi ne'e, èu baku peka na, ‘Kakaja Abram sèra mai nèti ja'a.’ 24 Ja'a parluu boe ngaa-ngaa. Dhoka mia dhu dhèu ja'a se pake le, sèra èle le, ale ia ka. Aa hud'i laa, angalai ja'a dhèu tèlu se: Aner, Eskol dènge Mamre, hag'e rare unu rèngu di.”