Abram dènge Lot pacèri
13
Ka Abram si tèke eele Masir, lasi asa rai Negeb. La'e dènge dhèu èmu na, aa dènge dhèu aa mèdha-panyau aa'i-aa'i ra. Ana ari na Lot madhutu ra kahèi. 2 Abram èèna, kaja ae titu kèna. Badha-manu na, mèdha hualaa dènge mèdha hualaa-pudhi na, ae titu kèna.3 Nèti Negeb, ra pidha-pidha era, ka d'ai hari talora rae Betel dènge rae Ai. Dhu uru èèna, ra pea rèdhi le ètu era èèna. 4 Aa dhu Abram patitu le kahèi mei korban, ho na mangaj'i mi LAMATUA ètu era èèna.
5 Lot dhu madhutu Abram èèna, unu badha-manu dènge dhèu sab'a ae kahèi. 6-7 Te ngaa era èèna taleo boe, ho Abram dènge Lot aa dènge kakaja ra bisa pea pa'èci. Nèti èèna ka, ana madhenge badha Abram dènge Lot sèra j'aj'i patao-palaha, lula j'u'u ètu era èèna d'ai boe hia badha rèngu. (Lod'o èèna, dhèu Kana'an dènge dhèu Feris, dhu pea ètu èèna era.)
8 Ka Abram peka dènge Lot, aku nèngu na, “Èdhi se, pa'a'ari. Mage dhoka èdhi, èci dènge èci be'a boe, lula dhèu sab'a èdhi se patao-palaha taruu. 9 De hua iia dua ti pahag'a ka laa. Rai ne, taleo. De ladhe èu d'èi rai ca bèka kariu na, ja'a abhu re ca bèka g'ana. Te ngaa ladhe èu d'èi re ca bèka g'ana, na ja'a re ca bèka kariu.”
10 Hèia Lot ladhe palème. Ka na ladhe nèdhi rai taleo ètu sebhe loko Yarden dhu madha èi ae, toke d'ai rae Soar. Era ne, rai hèu mèngi sama sèmi oka LAMATUA, dènge rai Masir kahèi. (Lod'o èèna, LAMATUA dhae huku mèka kota Sodom dènge kota Gomora. De rai èèna, be'a era.) 11 Hèia Lot pili nare era sebhe loko Yarden èèna. Ka dua ra pahag'e ka. De Lot la'e sa ca bèka dhimu. 12 Te ngaa Abram pea taruu ètu rai Kana'an. Aa Lot la'e pea ètu rae-rae dhu padètu dènge kota Sodom ètu sebhe loko Yarden. 13 Te ngaa dhèu-dhèu Sodom sèra bhelu-katub'a titu kèna. Rèngu ro'o boe nanene LAMATUA.
14 Ropa Lot pacèri dènge Abram, ka LAMATUA padhai lii dènge Abram, peka na, “Èu ladhe palème aa'i ku, rai aa'i-aa'i nèti era titu èu èèna. Ladhe paie re madha, re kabodho, re ca bèka g'ana, dènge ca bèka kariu mu. 15 Rai aa'i-aa'i dhu èu ladhe mèdhi sèi, bèli-camèd'a Ja'a hia mi èu, dènge ana-èpu èu, sèna ka j'aj'i pusaka ra, toke d'ai mia-mia. 16 Èèna na Ja'a paj'aj'i ana-èpu èu ae sama sèmi salae dhasi, toke dhèu ige rare boe. 17 De lamu kako palème madhutu madhera dènge bhabhèla na. Te rai se aa'i-aa'i ra, Ja'a hia mi èu.”
18 Hèia Abram si lèpa hari asa era pea ra, dhu dètu dènge aj'u-aj'u aae ètu Mamre, dhu padètu dènge Hebron. Èle èèna ka, na pudhi hadhu tao mei korban ho na mangaj'i LAMATUA ètu èèna.