Ama Lamatua pili nare Abram
12
Lod'o èèna, LAMATUA peka le dènge Abram, peka na, “Abram! Èu pakèd'i nèti era èu ne, tèke eele ina-ama èu, èmu ina-ama mu, dènge rae-lesa èu. Lamu asa era èci, dhu pe Ja'a peka dènge èu.2 Èèna na, Ja'a hia mèngi-nale mi èu.
Aa ana-èpu èu, èèna na, bèba-kacanga,
j'aj'i suku dhu kapai, toke dhèu tadhe kolongara èu.
Ho bèli-camèd'a, èu j'aj'i berkat hia dhèu leo kahèi.
3 Èèna na, Ja'a hia berkat mi dhèu dhu hia berkat mi èu.
Te ngaa Ja'a huku dhèu cee dhu dhoo èu.
Nanene paie!
Pe èèna na, dhèu aa'i-aa'i ètu rai-haha ne abhu berkat lula èu.”
4-5 Lod'o èèna, umur Abram 75 (pidhu nguru lèmi) tèu. Na nèti dhèu èmu na Sarai, aa dènge ana ari na, Lot, dènge mèdha-panyau ra aa'i-aa'i, aa dènge dhèu sab'a na aa'i-aa'i dhu na abhu ètu kota Haran. Hèia Abram si lasi ka, tèke eele kota Haran, asa era dhu LAMATUA peka le dènge ne. Ka ra kako taruu, d'ai rai èci, ngara na Kana'an.
6 D'ai era èèna, Abram kako palème rai ne, toke d'ai padètu dènge rae èci, ngara na Sikem. Ka ra pea taha ètu èèna, padètu dènge aj'u aae ca kapua ètu More. Lod'o èèna, dhèu Kana'an dhu pea ètu èèna era. 7 Ètu era èèna ka, LAMATUA pad'elo iisi Na mi Abram, peka na, “Èèna na, Ja'a hia ana-èpu èu rai ne'e ne.” Ka Abram pudhi hadhu tao mei korban hia LAMATUA dhu pad'elo iisi Na dènge nèngu ètu era èèna.
8 Èle èèna ka, Abram si pidha hari asa ledhe re balèu. Ka ra pea taha ètu talora rae Betel dènge rae Ai. Ètu èèna, na patitu mei korban èci ho na mangaj'i mi LAMATUA. 9 Èle èèna ka, na pidha-pidha era, d'ai rai Negeb re ca bèka balèu nèti rai Kana'an.
Abram la'e asa rai Masir
10 Ca tèka, rai Kana'an lèke manganga aae. Nèti èèna ka, Abram si lasi asa bèka balèu, ka ra d'ai rai Masir. Ka ra manubha taha ètu nèi. 11 Ropa oe d'ai Masir, Abram peka dènge dhèu èmu na, Sarai, aku nèngu na, “Sarai, èu bhèni iia, nia boe. 12 De ladhe dhèu Masir rèdhi èu bhèni iia sèmi ne'e, mage dhoka ra pamadhe ja'a, lula ja'a dhèu èmu-kamali èu. Dènge sèmi èèna, ra parame rare èu. 13 De be'a risi, èu peka dènge ra, na ja'a ne, ana mone èu. Dènge sèmi èèna ka, rèngu pamadhe boe ja'a, aa ra be'a-be'a dènge ja'a, lula èu ne.”
14 Ropa Abram si d'ai Masir, dhèu ètu èèna, ladhe laa na, Sarai ne bhèni iia titu kèna. 15 Ropa dhèu sab'a dhèu aae sèra ladhe rèdhi ne, aa ra koa bhabhèni iia na ètu madha dhèu aae. Ka rèti bhèni ne, asa èmu dhèu aae. 16 Hèia dhèu aae be'a-be'a ka dènge Abram, lula Sarai. Ka na parasee Abram mèdha rupa-rupa. Nuka badha sèmi: kahib'i-kalèbho, kahib'i-ka'ia, sapi, keled'ei, dènge onta. Na parasee kahèi, ènu dhèu mone dènge dhèu bhèni.
17 Lula na nare dhèu èmu dhèu asa d'ara èmu na, nèti èèna ka, LAMATUA hia huku rupa-rupa mi dhèu aae dènge isi èmu na. 18 Hèia dhèu aae Masir paroa Abram, ka na karèi ne, aku nèngu na, “Èu ne tao tasamia mi ja'a ne? Nga tao ka èu peka boe na, bhèni ne dhèu èmu èu? 19 Te ngaa aku èu na, nèngu ne ana hèni èu! Nèti èèna ka, ja'a oe kore ne j'aj'i dhèu èmu ja'a! Dhèu èmu èu ka ne'e! More hari ka, aa pakaj'èu ka nèti madha ja'a!” 20 Hèia dhèu aae paredha dhèu sab'a na sèra, babège eele Abram, dhèu èmu na, rèti dènge dhèu aa mèdha-panyau aa'i-aa'i ra, kalua nèti rai èèna.