Manara Babel
11
Uru-uru tèka na, dhèu ètu rai-haha ne, dhoka lii èci di. 2 Lod'o rèngu cahag'e lasi asa ca bèka dhimu, ra d'ai era mera ètu Sinear, ka ra pea ètu èèna.a 3-4 Rèngu aa'i-aa'i rare lii èci, aku rèngu na, “A'ari, ee! Mai ta patitu kota kapai aae cue. Ti tao hadhu bata; ti tunu pa'adhu. Èèna na, èdhi pudhi sa dedha, ho ti tape dènge èi dama. Ho èèna na, ti patitu manara dedha aae èci, dhu kolo nèngu na d'ai dedha-liru, sèna ka èdhi abhu kolongara kapai. Ho sèna ka èdhi j'aj'i ca kabarai aae, dhu pahag'a ia ka.”
5 Hèia LAMATUA puru mai laladhe kota dènge manara dhu ra patitu èèna. 6 Ka Na peka na, “Dhèu rai-haha se, aa'i-aa'i ra ca kabarai, dènge lii èci di. Ngaa dhu rèngu tao ne, heka mulai kèna. Bèli-camèd'a ladhe rèngu aa'i-aa'i ra j'aj'i mi èci sèmi ne'e, èèna na, ngaa dhu rèngu neo tao, j'aj'i aa'i mèu-mèu. 7 De be'a risi, Èdhi puru lati ho tao lii si baka-leo, ho sèna ka èci ne'a boe lii èci.”
8 Hèia Lamatua puru, ka kakeho lii ra. Dènge j'ara sèmi èèna, Na pacèri si palème rai-haha ne. Ka ra pakèd'i taruu heka kota deo na. 9 Nèti èèna ka, ra pangare kota na, Babel (dhu sasoa na ‘pab'ingu’), lula LAMATUA kakeho lii ra, aa pacèri eele si palème rai-haha ne.
Nèti ana-èpu Sem, toke d'ai Abram
10 Se'e se, ana-èpu Sem. Ropa èle èi aae lala dua tèu sa, Sem mamuri cangasu tèu kèna, ka na abhu ana mone ca dhèu, ngara na Arpaksad. 11 Ka Sem mamuri hari d'ai 500 (lèmi ngasu) tèu, na abhu hari ana mone dènge ana bhèni.
12 Lod'o umur Arpaksad d'ai 35 (tèlu nguru lèmi) tèu, na abhu ana mone ca dhèu, ngara na Sela. 13 Ka Arpaksad mamuri hari d'ai 403 (èpa ngasu tèlu) tèu, na abhu hari ana mone dènge ana bhèni.
14 Lod'o umur Sela d'ai 30 (tèlu nguru) tèu, na abhu ana mone ca dhèu, ngara na Eber. 15 Ka Sela mamuri hari d'ai 403 (èpa ngasu tèlu) tèu, na abhu hari ana mone dènge ana bhèni.
16 Lod'o umur Eber d'ai 34 (tèlu nguru èpa) tèu, na abhu ana mone ca dhèu, ngara na Pelek. 17 Ka Eber mamuri era d'ai 430 (èpa ngasu tèlu nguru) tèu, na abhu hari ana mone dènge ana bhèni.
18 Lod'o umur Pelek d'ai 30 (tèlu nguru) tèu, na matana ana mone ca dhèu, ngara na Rehu. 19 Ka Pelek mamuri era d'ai 209 (dua ngasu ceo) tèu, na abhu hari ana mone dènge ana bhèni.
20 Lod'o umur Rehu d'ai 32 (tèlu nguru dua) tèu, na abhu ana mone èci, ngara na Seruk. 21 Ka Rehu mamuri era d'ai 207 (dua ngasu pidhu) tèu, na abhu hari ana mone dènge ana bhèni.
22 Lod'o umur Seruk d'ai 30 (tèlu nguru) tèu, na matana ana mone ca dhèu, ngara na Nahor. 23 Ka Seruk mamuri era d'ai 200 (dua ngasu) tèu, ka na abhu hari ana mone dènge ana bhèni.
24 Lod'o umur Nahor d'ai 29 (dua nguru ceo) tèu, na abhu ana mone èci, ngara na Tera. 25 Ka Nahor mamuri era d'ai 119 (cangasu canguru ceo) tèu, ka na abhu hari ana mone dènge ana bhèni.
26 Lod'o umur Tera d'ai pidhu nguru tèu risi, na abhu ana mone, dhèu tèlu: Abram, Nahor, dènge Haran.
Ana-èpu Tera
27 Ana-èpu Tera, sèmi ne'e: ana mone na, ka: Abram, Nahor, dènge Haran. Haran abhu ana mone ca dhèu, ngara na Lot. 28 Haran madhe ètu rae èta-èsu na, ngara na Ur, rai dhèu Kasdim. Lod'o èèna, ama na Tera mamuri era. 29 Abram madhèdi dènge Sarai. Nahor leo dènge ana bhèni Haran, ngara na Milka. Haran abhu ana mone èci kahèi, ngara na Yiska. 30 Te ngaa Sarai dènge boe ana.