Ama Lamatua pajaji dènge Noh
9
Hèia Ama Lamatua pala-bagi berkat mi Noh dènge ana-ana na, peka na, “Miu matana pa'ae-ae, sèna ka papènu rai-haha ne. 2 Ladhe èèna na, badha hui, manu-bhui dènge i'a aa'i-aa'i ra madha'u dènge miu. Miu ka dhu ator si. 3 Sisi badha aa'i-aa'i, miu bisa mi'a, sèmi dhu mi'a hua-hela, dènge rèu ana aaj'u se. Aa'i-aa'i se, Ja'a hia miu.4 Dhoka sisi dhu dènge raa era, miu madha mèu mi'a, lula samanga badha ètu raa na. 5-6 Ja'a paj'aj'i dhèu madhutu raropa Ja'a. Nèti èèna ka, baku pamadhe dhèu. Ladhe abhu dhèu, do badha, dhu pamadhe dhèu, na, pamadhe ne kahèi. Ne'e, lii paredha nèti Ja'a. 7 Miu se hud'i matana pa'ae-ae ku, sèna ka papènu hari rai-haha ne.”
8 Ka Ama Lamatua tuhu hari lii padhai lii Na, 9 “De ne'e ne, Ja'a pajaji dènge miu, toke d'ai lai ana lai èpu. 10 Lii pajaji ne, lèke kahèi mi aa'i-aa'i dhu mamuri, sèmi: badha ani, badha hui, dènge manu-bhui. Peka ka laa, lèke aa'i-aa'i dhu kalua palere-lere dènge miu nèti dedha kapa. 11 Lii pajaji Ja'a sèmi ne'e: Ja'a hia heka èi aae lala, ho pamadhe aa'i ngaa-ngaa dhu mamuri, aa dènge pa'ele iie rai-haha ne.
12-13 Ja'a pasa saroo ètu dedha-liru, sèna ka j'aj'i tadha pasanèd'e lii pajaji Ja'a dhu ma'ète boe dènge miu, dènge aa'i-aa'i dhu mamuri, aa dènge rai-haha ne. 14-17 Ladhe abhu ra'i-liru, ho saroo cèu, èèna na pasanèd'e Ja'a nèti lii pajaji èèna. Na peka na, èi aae pa'ele iie heka aa'i-aa'i dhu mamuri. Dènge j'ara ne'e ne ka, lii pajaji Ja'a dhu ma'ète boe, pa'èki tèke le dènge miu, aa dènge aa'i-aa'i dhu mamuri.”
Noh mahu
18 Ana-ana Noh dhu puru nèti dedha kapa, Sem, Yafet dènge Ham (Ham èèna, ama Kana'an). 19 Dhèu aa'i-aa'i ra ètu rai-haha ne, j'aj'i nèti ana Noh dhèu tèlu sèra.
20 Noh èèna, dhèu sab'a oka-tedhe. Nèngu ka dhu uru j'ara tao oka anggor. 21 Ca tèka, na ninu èi anggor, ka na mahu titu kèna. Hèia na puru eele mèdha-papake nèti ua na. Ka na j'unu lega-loli dènge boe mèdha-papake ètu d'ara paleo na. 22 Ropa Ham ladhe nèdhi era makae ama na, ka rai li'u la'e, lolo dènge a'a na, Sem dènge Yafet. 23 Hèia dua ra rare sig'i-kalolo ca bèla, ka ra bhoke mema ètu kabela-kao ra. Ka dua ra kako kabodho lasi asa d'ara paleo ama ra, sèna ka ra pahutu mi ngi'u na. Dènge sèmi èèna, rèdhi boe era makae ama ra. Èle èèna ka, ra kalua sa li'u.
24 Ropa Noh mase'a, na ne'a tatao nèti ana limuri na, Ham. 25 Ka na peka, aku nèngu na, “He! Ama Kana'an! Ja'a dhoo èu! Èu ne, èèna na j'aj'i ènu nèti a'a mu si!
26 Koa-kio LAMATUA, lula Sem!
Te ngaa Kana'an j'aj'i ènu Sem.
27 Hud'i laa, Ama Lamatua pataleo rai unu Yafet.
Aa ana-èpu na mamuri mera-milu dènge ana-èpu Sem.
Te ngaa hud'i Kana'an j'aj'i ènu Yafet.”