Rai mango noo-noo
8
Masi ka sèmi èèna, Ama Lamatua bhèlu boe Noh si dènge badha-manu aa'i-aa'i dhu ètu dedha kapa. Hèia Na hia ngèlu g'oro, ka èi na kura ka noo-noo. 2 Na katange èi madha aa'i-aa'i ètu rai-haha ne, aa Na taha èj'i kahèi. 3 Ka èi kura noo-noo ka. D'ai cangasu lèmi nguru lod'o, èi marèma heka. 4 Lèke dènge hèru ka pidhu, risi canguru pidhu lod'o, kapa eta ètu kolo ledhe aae èci, ngara na Ararat. 5 Èi kura taruu toke lod'o ka èci, hèru ka canguru, ka kolo-kolo ledhe cèu noo-noo. 6 Risi nèti èpa nguru lod'o, hèia Noh bhoke jendela èci. 7 Ka na patalale lakaa ci'u. Manu-bhui ne lela la'e-mai, toke èi puru. Ka na lèpa heka asa kapa. 8 Hèia Noh patabuli hari, koro j'aha ci'u, sèna ka neo ne'a èi na puru le, do dhae. 9 Te ngaa, lula èi hutu nare dedha-rai era, ka koro ne abhu boe era tèka. Ka lèpa hari asa kapa. Hèia Noh j'ole ai na, kèpe nare, ka na pamaso hari asa d'ara kapa.
10 Ka Noh tatae hari d'ai pidhu lod'o, hèia na patabuli hari koro j'aha deo na. 11 D'ara lod'o nihia sa, koro ne lèpa hari la'e asa Noh, tutu nèti dènge rèu saitun ca rèu dhu heka tutu nare kèna. Nèti èèna ka, Noh heka ne'a kèna, èi na dhu puru le tare'a di. 12 Ka na mate hari d'ai pidhu lod'o, hèia na patalale hari koro j'aha ca hari ni. Te ngaa ca tèka ne, koro ne lèpa heka.
13 Lod'o Noh mamuri d'ai 601 (èna ngasu ca) tèu, lèke lod'o ka èci hèru èci, èi mèti aa'i le. Hèia Noh bhoke jendela, ka na ladhe palème, nèdhi rai dhu mango le. 14 D'ai hèru ka dua, lod'o ka dua nguru pidhu, dedha-rai ne dhu mango meto le.
15 Ka Ama Lamatua peka dènge Noh, 16 “Noh! Aa'i-aa'i mi puru ka nèti dedha kapa èèna. 17 Papuru aa'i badha-manu sèra! Nuka: badha ani, badha hui, badha dhu rod'o, dènge manu-bhui aa'i-aa'i ra. Hud'i si, sèna ka ra bèba, papènu rai-haha ne.”
18-19 Èle èèna ka, Noh dènge dhèu èmu na, dènge ana-ana na, aa dènge dhèu èmu ana na sèra, aa'i-aa'i ra puru nèti dedha kapa èèna. Badha se, aa'i-aa'i ra, kalua ka madhutu anga ra èci-èci.
Noh hia korban makasi mi Lamatua
20 Hèia Noh pudhi hadhu, tao mei korban hia LAMATUA. Nèti badha-badha dhu bisa ra'a sèra, Noh nare ci'u-ci'u, ka na roro, tunu ètu dedha mei deo na, ho j'aj'i mi tadha makasi mi LAMATUA. 21 Ropa LAMATUA sangèd'u nare hèu gèmu korban deo na, d'ara Na karej'e. Ka Na ngee na,
“Nèti deo ne'e ne, Ja'a huku heka rai-haha ne, lula bhabhelu-katub'a dhèu. Masi ka rèngu dhoka ngee bhabhelu di, Ja'a pa'ele iie heka ngaa-ngaa dhu mamuri, sèmi dhu Ja'a heka tao kore èèna. 22 Lod'o rai-haha ne era, hèru dènge tèu, kako madhutu atora. Sèmi: hèru sèla dènge hèru puu-g'ètu, hèru pacuhi dènge hèru sagoro, hèru hadhu dènge hèru èj'i lai, mèu dènge mèda.”