Èi aae lala
7
Èle èèna ka, LAMATUA peka dènge Noh, “Ja'a ladhe le palème, te ngaa abhu dhoka èu di dhu d'ara mola. Nèti èèna ka, èu dènge bhèni-ana niki èu, lami ka asa d'ara kapa. 2-3 Mèti dènge badha-badha dhu bisa mi'a, aa bisa hia Ja'a kahèi, de mèti pidhu-pidhu pasa asa d'ara kapa. Mèti kahèi rupa-rupa manu-bhui pidhu-pidhu pasa. Te ngaa badha dhu leo, mèti dhoka ca pasa-ca pasa di. Sèna ka badha dènge manu-bhui se, j'aj'i hini, ho baku ma'ète.4 Sanèd'e paie-iie, oo! Di pidhu lod'o ka, Ja'a papuru èj'i aae mai dhu bhoka boe ca lod'o sa, toke d'ai èpa nguru lod'o mèu-mèda. Dènge sèmi ne'e, Ja'a pamadhe aa'i ngaa-ngaa dhu mamuri ètu dedha-rai, dhu Ja'a paj'aj'i kore le.”
5 Ka Noh tao aa'i sèmi lii paredha LAMATUA. 6 Lod'o èi aae lala, umur Noh 600 (èna ngasu) tèu. 7 Noh dènge dhèu èmu na, dènge ana niki na, aa dènge dhèu èmu ana ra di, lasi asa d'ara kapa, ho ra abhu mamuri. 8-9 Madhutu lii paredha LAMATUA, ka Noh pamaso manu-bhui dènge badha leo sèra, èci-èci ka dènge pasa na, nèti dhu bisa ra'a, dènge dhu bisa boe ra'a. 10 Ropa èle pidhu lod'o, cag'ag'a laa èi aae lala, ka rai-haha ne, mulai cène.
11 Lèke dènge umur Noh 600 (èna ngasu) tèu, risi dua hèru, canguru pidhu lod'o, ka mulai èi aae lala. Lod'o èèna, sèmi babèdho liru dhu bhoke eele sa, ka èi na tao sabhori mai. Aa èi madha-èi madha ètu rai-haha sabhoka, ka sèmi tao sabhuu sa dedha. 12 Ka èj'i bhori mai loe boe èpa nguru lod'o mèu-mèda.
13 Te ngaa lod'o èèna, Noh dènge dhèu èmu na, dènge ana mone na dhèu tèlu: Sem, Yafet dènge Ham, dènge dhèu èmu ra, maso lasi asa d'ara kapa. 14 Lasi palere dènge badha aa'i-aa'i ra, sèmi: badha ani, badha hui, badha dhu rod'o, manu-bhui, dènge badha-badha leo dhu dènge èla sèra. 15-16 Ca pasa-ca pasa nèti aa'i-aa'i dhu mamuri, lasi asa d'ara kapa palere dènge Noh, madhutu sèmi lii paredha Ama Lamatua.
Ropa aa'i-aa'i ra d'ai d'ara kapa, LAMATUA bèdho babèdho kapa èèna.
17-19 Èj'i aae puru ma'ète boe d'ai èpa nguru lod'o. Hèia kapa èèna taleb'o. Èi ca'e loe boe toke hutu nare kolo ledhe dhu dedha aae. 20 Èi ca'e taruu, ka marèma na seli èpa rèpa risi nèti kolo ledhe sèra.