Bhabhelu-katub'a dhèu rai-haha
6
Taa èèna, dhèu rai-haha, asa bèba-kacanga. Ka ra papala-palème rai-haha. Dhèu se matana kahèi ana-ana bhèni. 2 Ana-ana mone nèti Lamatuaa ladhe rèdhi ana bhèni nèti dhèu rai-haha se, bhèni iia hua. Ka lasi todhe rare ana bhèni mia dhu ra d'èi. 3 Ka LAMATUA peka na, “Ja'a roca le dènge tatao dhèu dhu lèke-lèke boe se. Roh Ja'a dhu pamamuri rèngu sa, d'èi heka hia ra mamuri manèro.b Hud'i rèngu madhe ku. De èèna na, mamuri rèngu se dhoka d'ai 120 (ca ngasu dua nguru) tèu di.”4 Taa èèna, dènge taa-tebho dhu limuri nèti èèna hari, abhu le dhèu raksasa ètu rai-haha ne.c Ropa ana mone nèti Lamatua leo rare ana bhèni dhèu rai-haha se, ka rara iisi dhèu kapai, nuka: kapala musu, dhèu re'a madhutu lii lolo uru-uru sèra.
5 Taa èèna, LAMATUA ladhe nèdhi bhabhelu-katub'a dhèu rai-haha dhu seli-kolane. D'ara rèngu pangee dhoka bhabhelu di. 6 Ka LAMATUA manyasa, lula Na paj'aj'i le rèngu se ho pea ètu rai-haha ne. Tatao rèngu ne'e ka dhu papèd'a d'ara Lamatua. 7 Nèti èèna ka, Na peka na, “Dènge tatao rèngu sèmi èèna na, Ja'a huku pamadhe dhèu rai-haha aa'i-aa'i dhu paj'aj'i kore si le. Manu-bhui dènge badha leo sèra, Ja'a palaho aa'i si kahèi. Te Ja'a manyasa, nèti Ja'a ka paj'aj'i si.” 8 Te ngaa Noh di dhu pakarej'e d'ara LAMATUA.
Lii lolo Noh
9-10 Lii lolo Noh sèmi ne'e ka: Ana mone na, dhèu tèlu, nuka Sem, Yafet dènge Ham. Noh mamuri dènge mola, koe-kapengo boe. Taa èèna, nèngu di dhu mamuri mola. D'ara na dhodhoka ètu Ama Lamatua.
11-12 Te ngaa dhèu leo se, Ama Lamatua ladhe ra bhelu aa'i mèu-mèu. Ètu mia-mia èèna ka, j'ara mamuri dhèu se ele iie aa'i. Ama Lamatua nèdhi dhodhoka bhabhelu di, ètu rai-haha ne. 13 Hèia Ama Lamatua peka dènge Noh, aku Nèngu na, “Ja'a kèdhi dhoka bhabhelu dhèu di, dhu pale-lème rai-haha ne. Ka Ja'a pama'ète kore le, sèna ka Ja'a palaho aa'i rai-haha ne dènge isi na aa'i-aa'i. 14 De sèmi ne'e, Noh! Èu tao kapa aae cue, dhu tao nèti aj'u adhu. Re d'ara roa na, èu bagi mi kama-kama. Aa re d'ara dènge li'u kapa, èu lame dènge èi dama. 15 Mu sab'e kapa na, madhera na 133 (ca ngasu tèlu nguru tèlu) meter; bhabhèla na 22 (dua nguru dua) meter; dènge katitu na 13 (canguru tèlu) meter. 16 Èu tao èmu ètu dedha kapa na. Te ngaa paconga ca laa ai nèti kadidhi re dedha. Èu bagi kapa ne mi tèlu tad'a. Aa re karasa na, tao babèdho èci.
17 Sanèd'e paie-iie! Bèli-camèd'a, Ja'a papuru èi aae lala, ho pacène eele rai-haha ne, sèna ka pamadhe aa'i dhu mamuri. 18 Te ngaa Ja'a pa'èki lii pajaji dènge èu. Èèna na, èu maso d'ara kapa èèna, mèti dènge dhèu èmu èu, ana-ana èu, dènge dhèu èmu ana-ana èu.
19-20 Badha aa'i-aa'i ra, èu hag'e more ca pasa-ca pasa, eo mèti asa d'ara kapa, ho ra abhu mamuri dènge èu kahèi. Sèmi: badha ani, manu-bhui, dènge badha dhu rod'o, sèna ka ra abhu mamuri. 21 Èu hud'i mèti dènge nganga'a-nganginu, pala miu dènge pala badha sèra hèi.”
22 Ka Noh sab'e madhutu sèmi lii paredha Ama Lamatua aa'i-aa'i sèra.