1-2 Lod'o Ama Lamatua paj'aj'i dhèu rai-haha, Na tao si sama sèmi rupa Nèngu. Na paj'aj'i si, dhèu mone dènge dhèu bhèni. Ka Na pangare si ‘dhèu rai-haha’, aa Na hia si berkat.

3 Lod'o Adam d'ai 130 (ca ngasu tèlu nguru) tèu, na matana ana mone ca dhèu, dhu rèhu na nare Adam. Ka pangare na, Set. 4 Ka Adam mamuri hari d'ai 800 (aru ngasu) tèu, hèia na abhu hari ana mone dènge ana bhèni. 5 Umur Adam 930 (ceo ngasu tèlu nguru) tèu, heka madhe kèna.

6 Lod'o Set d'ai 105 (ca ngasu lèmi) tèu, na abhu ana mone ca dhèu, ngara na Enos. 7 Ka Set mamuri hari d'ai 807 (aru ngasu pidhu) tèu, na abhu hari ana mone dènge ana bhèni. 8 Umur Set 912 (ceo ngasu canguru dua) tèu, heka madhe kèna.

9 Lod'o Enos mamuri d'ai 90 (ceo nguru) tèu, na matana ana mone ca dhèu, ngara na Kenan. 10 Ka Enos mamuri hari d'ai 815 (aru ngasu canguru lèmi) tèu, na abhu hari ana mone dènge ana bhèni. 11 Umur Enos 905 (ceo ngasu lèmi) tèu, heka madhe kèna.

12 Lod'o Kenan d'ai 70 (pidhu nguru) tèu, na matana ana mone ca dhèu, ngara na Mahalalel. 13 Ka Kenan mamuri hari d'ai 840 (aru ngasu èpa nguru) tèu, ka na abhu hari ana mone dènge ana bhèni. 14 Umur Kenan 910 (ceo ngasu canguru) tèu, heka madhe kèna.

15 Lod'o Mahalalel d'ai 65 (èna nguru lèmi) tèu, na abhu ana mone ca dhèu, ngara na Yared. 16 Ka Mahalalel mamuri hari d'ai 830 (aru ngasu tèlu nguru) tèu, na abhu hari ana mone dènge ana bhèni. 17 Umur Mahalalel 895 (aru ngasu ceo nguru lèmi) tèu, heka na madhe kèna.

18 Lod'o Yared d'ai 162 (cangasu èna nguru dua) tèu, na abhu ana mone ca dhèu, ngara na Henok. 19 Ka Yared mamuri d'ai 800 (aru ngasu) tèu, na abhu hari ana mone dènge ana bhèni. 20 Umur Yared 962 (ceo ngasu èna nguru dua) tèu, heka madhe kèna.

21 Ropa Henok mamuri d'ai 65 (èna nguru lèmi) tèu, na matana ana mone ca dhèu, ngara na Metusalak. 22 Ele èèna, Henok mamuri d'ara èci dènge Ama Lamatua d'ai 300 (tèlu ngasu) tèu. Ka na abhu hari ana mone dènge ana bhèni. 23-24 Na mamuri d'ara èci dènge Ama Lamatua. Hèia lod'o na d'ai 365 (tèlu ngasu èna nguru lèmi) tèu, ka na ele, lula Ama Lamatua paca'e ne sa dedha.

25 Lod'o Metusalak d'ai 187 (cangasu aru nguru pidhu) tèu, na matana ana mone èci, ngara na Lamek. 26 Èle èèna ka, Metusalak mamuri hari d'ai 782 (pidhu ngasu aru nguru dua) tèu, ka na abhu hari ana mone dènge ana bhèni. 27 Umur Metusalak 969 (ceo ngasu èna nguru ceo) tèu, heka madhe kèna.

28 Lod'o Lamek mamuri d'ai 182 (ca ngasu aru nguru dua) tèu, na matana ana mone ca dhèu. 29 Lamek pangare ne Noh (dhu sasoa na ‘pakarej'e d'ara’), lula na peka na, “Ana ne, èèna na pakarej'e d'ara èdhi nèti sasab'a dhu bia, ètu rai dhu Ama Lamatua dhoo le.” 30 Ka Lamek mamuri taruu d'ai 595 (lèmi ngasu ceo nguru lèmi) tèu, aa na abhu hari ana mone dènge ana bhèni. 31 Umur Lamek 777 (pidhu ngasu pidhu nguru pidhu) tèu, heka na madhe kèna.