Dua ra kapai ka, Habel j'aj'i dhèu madhenge badha. Aa a'a na Kaen, sab'a oka-tedhe. 3 Ca lod'o, Kaen nèti isi rai na cahag'e, ka hia LAMATUA. 4 Habel nèti ana-ana uuru kahib'i-kalèbho na. Na roro kahib'i-kalèbho se, ka nèti sisi dhu be'a hia Lamatua. D'ara Ama Lamatua karej'e ropa ladhe nèdhi korban nèti Habel ne. 5 Te ngaa Na d'èi boe korban unu Kaen. Hèia Kaen nasa bia, ka rèhu na mare boe.

6 Ka LAMATUA lii dènge Kaen, aku Nèngu na, “Kaen! Nga tao ka èu nasa sèmi èèna, ka rèhu èu mare boe? 7 Ladhe tatao èu be'a, na Ja'a sèmi èu dènge hua iia. De mu pangee uuru ku! Ladhe èu tao bhelu, na bhabhelu èèna na'e hari èu, sama sèmi meo neo pacèli maraho. De sèmi èu neo tao bhabhelu, be'a risi core eele ka!”

8 Ca tèka, Kaen gale Habel, na peka na, “Mai lati ngad'o oka, we.”^a Ropa dua ra d'ai d'ara oka, Kaen kalabhe pamadhe ari na.

9 Ka LAMATUA karèi Kaen, aku Nèngu na, “Kaen! Ari mu ka mia?”

Hèia Kaen dhaa, aku nèngu na, “Ja'a ke'a boe na ètu mia! Èu ngee na, ja'a dhèu kèpe haga na, do?”

10 Ka Lamatua b'ala, “Nga tao ka èu bhelu sèmi èèna? Baku pangee na, èu pahuni more le raa ari èu ètu d'ara rai, te Ja'a dhu kèdhi aa'i-aa'i le! 11 De lii dhoo lèke le mi dedha èu. Lod'o èu pamadhe ari èu, rai sakid'o nare raa na. De limuri ne, rai bisa heka nèti mamuri mi èu. 12 De ladhe èu sab'a oka-tedhe, rai ne hia heka èu ngaa-ngaa. Nèti deo ne'e, èu lu'u sa haa-sa dhimu, sèmi dhèu dhu dènge boe era paleo-palu'u.”

13 Te ngaa Kaen b'ala LAMATUA, aku nèngu na, “Haii! Ama Lamatua, ee! Lamatua dhoo ja'a bia titu kèna, de ja'a pasae mèke boe nga. 14 Lula Lamatua bège eele ja'a nèti era ne'e, ja'a kaj'èu nèti Ama Lamatua. Ja'a kako lole-laa asa mia-mia. De ladhe paraga dènge dhèu, èèna na ra pamadhe ja'a.”

15 Te ngaa LAMATUA dhaa na, “Aad'o sèmi èèna! Dhèu cee dhu pamadhe èu, èèna na Ja'a huku ne, babia na pidhu hari risi nèti èu.” Hèia LAMATUA tao tadha mi Kaen, sèna ka dhèu re'a ho baku pamadhe ne. 16 Hèia Kaen tèke eele dènge era èèna. La'e pakaj'èu nèti LAMATUA, asa era èci, ètu bèka dhimu oka Eden. Era ne'e, ngara na Nod dhu sasoa na, ‘lole-laa’. Ka na pea ètu era èèna.

17 Hèia Kaen leo-èmu, ka dhèu èmu na dènge babia. Ka nara iisi ana mone ca dhèu, dhu pangare na Henok. Hèia Kaen patitu rae cue, ngara na Henok, madhutu ngara ana na. 18 Ka Henok matana Irad. Hèia Irad matana Mehuyael. Mehuyael matana Metusael. Aa ana Metusael, Lamek.

19 Dhèu èmu Lamek, dhèu dua. Èci ngara na Ada, aa ca dhèu hari, ngara na Sila. 20 Ana Ada, ngara na Yabal. Ana-èpu na, j'aj'i dhèu piara badha. Mamuri ra ètu boe ca era, aa ra pea dhoka ètu d'ara paleo di. 21 Ari Yabal, ngara na Yubal. Ana-èpu Yubal, j'aj'i dhèu gai sasadhu, dènge tiu sakino.

22 Dhèu èmu Lamek èci hari, Sila, nara iisi Tubal Kaen. Ana-èpu na j'aj'i tuka bèsi, ka ra tuku mèdha ae-ae tao nèti bèsi, dènge tabaga. Ana hèni Tubal Kaen, ngara na Na'ama.

23 Ca tèka, Lamek padedha iisi na ètu madha dhèu èmu dua ra, peka na, “Mi nanene, ee! Deo na, ana mone ngèru èci neo game ja'a. Te ngaa ja'a dhadhedhe ne, toke madhe. 24 Dhèu dhu pamadhe Kaen, abhu huku pidhu hari. Te ngaa cee ka dhu neo b'ala ho pamadhe ja'a, abhu huku pidhu nguru pidhu hari.”

25 Ka Hawa nara iisi hari ana mone ca dhèu. Hèia ra pangare ne, Set (dhu sasoa na, ‘hia’), lula aku Hawa na, “Ama Lamatua hia ja'a ana ne, sèna ka gati madha Habel, dhu Kaen pamadhe ne.” 26 Pe d'ai nèbhu ku, Set abhu ana mone ca dhèu, dhu pangare na Enos.

Tèu èèna, dhèu mulai manèngi-mangaj'i mi Ama LAMATUA.